Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
45. Magga Saŋyutta

Sutta 3

Sāriputta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayam Bhagavā Sakkesu viharati,||
nāgarakaɱ nāma Sakkānaɱ nigamo.|| ||

2. Atha kho āyasmā Sāriputto yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Sāriputto Bhagavantaɱ etad avoca:|| ||

Sakalamevidaɱ bhante, brahmacariyaɱ yad idaɱ kalyāṇamittatā kalyāṇasahāyatā kalyāṇasampavaŋkatāti.|| ||

Sādhu, sādhu Sāriputta.|| ||

Sakalam eva h'idaɱ Sāriputta,||
brahmacariyaɱ yad idaɱ kalyāṇamittatā kalyāṇasahāyatā kalyāṇasampavaŋkatā.|| ||

Kalyāṇamittass'etaɱ Sāriputta,||
bhikkhuno pāṭikaŋkhaɱ kalyāṇasahāyassa kalyāṇasampavaŋkassa ariyaɱ aṭṭhaŋgikaɱ maggaɱ bhāvessati||
ariyaɱ aṭṭhaŋgikaɱ maggaɱ bahulīkarissati.|| ||

4. Kathañ ca Sāriputta, bhikkhu kalyāṇamitto kalyāṇasahāyo kalyāṇasampavaŋko||
ariyaɱ aṭṭhaŋgikaɱ maggaɱ bhāveti,||
ariyaɱ aṭṭhaŋgikaɱ maggaɱ bahulīkaroti?|| ||

Idha Sāriputta, bhikkhu||
sammā-diṭṭhiɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ||
sammā-saŋkappaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ,||
sammā-vācaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ,||
sammā-kammantaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ,||
sammā-ājīvaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ,||
sammā-vāyāmaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ,||
sammā-satiɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ,||
sammā-samādhiɱ bhāveti vivekanissitaɱ virāganissitaɱ [4] nirodhanissitaɱ vossaggapariṇāmiɱ.|| ||

Evaɱ kho Sāriputta, bhikkhu kalyāṇamitto kalyāṇasahāyo kalyāṇasampaŋko||
ariyaɱ aṭṭhaŋgikaɱ maggaɱ bhāveti||
ariyaɱ aṭṭhaŋgikaɱ maggaɱ bahulītaroti.|| ||

Tad aminā p'etaɱ Sāriputta, pariyāyena veditabbaɱ.|| ||

Yathā sakalam eva h'idaɱ brahmacariyaɱ yad idaɱ kalyāṇamittatā kalyāṇasahāyatā kalyāṇasampavaŋkatā.|| ||

Mamaɱ hi Sāriputta, kalyāṇamittaɱ āgamma jātidhammā sattā jātiyā parimuccanti,||
jarādhammā sattā jarāya parimuccanti.|| ||

Maraṇadhammā sattā maraṇena parivuccanti,||
sokaparideva-dukkha-domanassupāyā-sadhammā sattā sokaparideva-dukkha-domanassupayāsehi parimuccanti.|| ||

Iminā kho etaɱ Sāriputta, pariyāyena veditabbaɱ.|| ||

Yathā sakalam eva h'idaɱ brahmacariyaɱ yad idaɱ kalyāṇamittatā kalyāṇasahāyatā kalyāṇasampavaŋkatā ti.|| ||

 


Contact:
E-mail
Copyright Statement   Webmaster's Page