Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
45. Magga Saŋyutta

Sutta 4

Brāhmaṇa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayam Bhagavā Sāvatthiyaɱ viharati|| ||

Atha kho āyasmā Ānando pubbanhasamayaɱ nivāsetvā pattacīvaram ādāya Sāvatthiɱ piṇḍāya pāvisi.|| ||

Addasā kho āyasmā Ānando Jāṇussoniɱ brāhmaṇaɱ sabbasetena vaḷabhīrathena1 Sāvatthiyaɱ niyyāyan taɱ.|| ||

Setā sudaɱ assā yuttā honti.|| ||

Setālaŋkārā||
seto ratho||
setaparivāro||
setā rasmiyo||
setā patodalaṭṭhi||
setaɱ chattaɱ||
setaɱ uṇhīsaŋ||
setāni vatthāni||
setā upāhanā||
setāya sudaɱ vālavījaniyā vījiyyati.|| ||

Tam enaɱ jano disvā evam āha:|| ||

"Brahmaɱ vata bho yānaɱ!|| ||

Brahmayānarūpaɱ vata bho" ti.|| ||

Atha kho āyasmā Ānando Sāvatthiyaɱ piṇḍāya caritvā pacchābhattaɱ piṇḍapātapaṭikkanto yena Bhagavā [5] ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Ānando Bhagavantaɱ etad avoca:|| ||

"Idhāhaɱ bhante pubbaṇhasamayaɱ nivāsetvā pattacīvaram ādāya Sāvatthiɱ piṇḍāya pāvisiɱ.|| ||

Addasaŋ khvāhaɱ bhante Jāṇussoniɱ brāhmaṇaɱ sabbasetena vaḷabhīrathena Sāvatthiyā niyyāyan taɱ.|| ||

Setā sudaɱ assā yuttā honti.|| ||

Setālaŋkārā||
seto ratho||
setaparivāro||
setā rasmiyo||
setā patodalaṭṭhi||
setaɱ chattaɱ||
setaɱ uṇhīsaŋ||
setāni vatthāni||
setā upāhanā||
setāya sudaɱ vālavījaniyā vījiyyati.|| ||

Tam enaɱ jano disvā evam āha:|| ||

'Brahmaɱ vata bho yānaɱ!|| ||

Brahmayānarūpaɱ vata bho' ti.|| ||

Sakkā nu kho bhante imasmiɱ dhammavinaye brahmayānaɱ paññāpetun" ti?|| ||

"Sakkā ānandā" ti Bhagavā avoca.|| ||

"Imass'eva kho etaɱ Ānanda||
ariyassa aṭṭhaŋgikassa maggassa adhivacanaɱ||
'brahmayānaɱ' iti pi||
'dhammayānaɱ' iti pi||
'anuttaro saŋgāma-vijayo' iti pi.|| ||

Sammā-diṭṭhi Ānanda bhāvitā bahulīkatā||
rāga-vinaya-pariyosānā hoti,||
dosa-vinaya-pariyosānā hoti,||
moha-vinaya-pariyosānā hoti;|| ||

sammā-saŋkappo Ānanda bhāvitā bahulīkatā||
rāga-vinaya-pariyosānā hoti,||
dosa-vinaya-pariyosānā hoti,||
moha-vinaya-pariyosānā hoti;|| ||

sammā-vācā Ānanda bhāvitā bahulīkatā||
rāga-vinaya-pariyosānā hoti,||
dosa-vinaya-pariyosānā hoti,||
moha-vinaya-pariyosānā hoti;|| ||

sammā-kammanto Ānanda bhāvitā bahulīkatā||
rāga-vinaya-pariyosānā hoti,||
dosa-vinaya-pariyosānā hoti,||
moha-vinaya-pariyosānā hoti;|| ||

sammā-ājīvo Ānanda bhāvitā bahulīkatā||
rāga-vinaya-pariyosānā hoti,||
dosa-vinaya-pariyosānā hoti,||
moha-vinaya-pariyosānā hoti;|| ||

sammā-vāyāmo [7] Ānanda bhāvitā bahulīkatā||
rāga-vinaya-pariyosānā hoti,||
dosa-vinaya-pariyosānā hoti,||
moha-vinaya-pariyosānā hoti;|| ||

sammā-sati Ānanda bhāvitā bahulīkatā||
rāga-vinaya-pariyosānā hoti,||
dosa-vinaya-pariyosānā hoti,||
moha-vinaya-pariyosānā hoti;|| ||

sammā-samādhi Ānanda bhāvitā bahulīkatā||
rāga-vinaya-pariyosānā hoti,||
dosa-vinaya-pariyosānā hoti,||
moha-vinaya-pariyosānā hoti;|| ||

Iminā kho etaɱ Ānanda pariyāyena veditabbaɱ.|| ||

Yathā imass'ev'etaɱ ariyassa aṭṭhaŋgikassa maggassa adhivacanaɱ||
'brahmayānaɱ' iti pi||
'dhammayānaɱ' iti pi||
'anuttaro saŋgāma-vijayo' iti pi.|| ||

Idam avoca Bhagavā||
idaɱ vatvā sugato athāparaɱ etad avoca satthā:|| ||

Yassa saddhā ca paññā ca dhammā yuttā sadā dhuraɱ,||
Hiri īsā mano yottaɱ sati ārakkhasārathī.|| ||

Ratho sīlaparikkhāro jhānakkho cakkavīriyo,||
Upekhā dhurasamādhi anicchā parivāraṇaɱ.|| ||

Avyāpādo avihiɱsā - viveko yassa āvudhaɱ,||
Titikkhā vammasannāho yogakkhemāya vattati.|| ||

Etad attaniyam bhūtaɱ brahmayānaɱ anuttaraɱ||
Nīyyanti dhīrā lokamhā añña-d-atthu jayaɱ jayanti.|| ||

 


Contact:
E-mail
Copyright Statement   Webmaster's Page