Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: Mahā-Vagga
45. Magga Saŋyutta

Sutta 9

Suka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayam Bhagavā Sāvatthiyaɱ viharati Jetavane Anāthapindikassa ārāme.|| ||

Tatra kho Bhagavā bhikkhū āmantesi Bhikkhavo ti.|| ||

Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

"Seyyathā pi bhikkhave, sālisūkaɱ vā||
yava-sūkaɱ vā micchā-paṇihitaɱ||
hatthena vā pādena vā akkantaɱ hatthaɱ vā pādaɱ vā bhindissati lohitaɱ vā uppādessatī ti||
n'etaɱ ṭhānaɱ vijjati.|| ||

Taɱ kissa hetu?|| ||

Micchā-paṇihitattā bhikkhave, sūkassa.|| ||

Evam eva kho bhikkhave, so vata bhikkhu micchā-paṇihitāya diṭṭhiyā||
micchā-paṇihitāya magga-bhāvanāya||
avijjaɱ bhecchati||
vijjaɱ uppādessati||
nibbānaɱ sacchikarissatī ti||
n'etaɱ ṭhānaɱ vijjati.|| ||

Taɱ kissa hetu?|| ||

Micchāpaṇihitattā bhikkhave, diṭṭhiyā.|| ||

Seyyathā pi bhikkhave, sālisūkaɱ vā yavasūkaɱ vā sammā-paṇihitaɱ,||
hatthena vā pādena vā akkantaɱ hatthaɱ vā pādaɱ vā bheindissati lohitaɱ vā uppādessatīti||
ṭhāname taɱ vijjati.|| ||

Taɱ kissa hetu?|| ||

Sammā-paṇihitattā bhikkhave, [11] sūkassa.|| ||

Evam eva kho bhikkhave, so vata bhikkhu sammā-paṇihitāya diṭṭhiyā||
sammā-paṇihitāya magga-bhāvanāya||
avijjaɱ bhindissati||
vijjaɱ uppādessati||
nibbānaɱ sacchikarissatī ti||
Ṭhāname taɱ vijjati.|| ||

Taɱ kissa hetu?|| ||

Sammā-paṇihitattā bhikkhave, diṭṭhiyā.|| ||

Kathañ ca bhikkhave, bhikkhu sammā-paṇihitāya diṭṭhiyā||
sammā-paṇihitāya magga-bhāvanāya||
avijjaɱ bhindati||
vijjaɱ uppādeti||
nibbānaɱ sacchikaroti ti?|| ||

Idha bhikkhave, bhikkhu sammā-diṭṭhiɱ bhāveti||
viveka-nissataɱ||
virāga-nissitaɱ||
nirodha-nissitaɱ||
vossagga-pariṇāmiɱ;|| ||

sammā-saŋkappaɱ bhāveti||
viveka-nissataɱ||
virāga-nissitaɱ||
nirodha-nissitaɱ||
vossagga-pariṇāmiɱ;|| ||

sammā-vācaɱ bhāveti||
viveka-nissataɱ||
virāga-nissitaɱ||
nirodha-nissitaɱ||
vossagga-pariṇāmiɱ;|| ||

sammā-kammantaɱ bhāveti||
viveka-nissataɱ||
virāga-nissitaɱ||
nirodha-nissitaɱ||
vossagga-pariṇāmiɱ;|| ||

sammā-ājīvaɱ bhāveti||
viveka-nissataɱ||
virāga-nissitaɱ||
nirodha-nissitaɱ||
vossagga-pariṇāmiɱ;|| ||

sammā-vāyāmaɱ bhāveti||
viveka-nissataɱ||
virāga-nissitaɱ||
nirodha-nissitaɱ||
vossagga-pariṇāmiɱ;|| ||

sammā-satiɱ bhāveti||
viveka-nissataɱ||
virāga-nissitaɱ||
nirodha-nissitaɱ||
vossagga-pariṇāmiɱ;|| ||

sammā-samādhiɱ bhāveti||
viveka-nissataɱ||
virāga-nissitaɱ||
nirodha-nissitaɱ||
vossagga-pariṇāmiɱ.|| ||

Evaɱ ce so bhikkhave, bhikkhu sammā-paṇihitāya diṭṭhiyā||
sammā-paṇihitāya magga-bhāvanāya||
avijjaɱ bhindati||
vijjaɱ uppādeti||
nibbānaɱ sacchikarotī" ti.|| ||

 


Contact:
E-mail
Copyright Statement   Webmaster's Page