Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: Mahā-Vagga
45. Magga Saŋyutta||
II. Vihāra Vagga

Sutta 19

Dutiya Kukkuṭārāma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayaɱ āyasmā ca Ānando āyasmā ca Bhaddo Pāṭaliputte viharanti Kukkuṭārāme.|| ||

Atha kho āyasmā Bhaddo sāyanhasamayaɱ paṭisallāṇā vuṭṭhito yenāyasmā Ānando ten'upasaŋkami.|| ||

Upasaŋkamitvā āyasmatā Ānandena saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho āyasmā bhaddo āyasmantaɱ Ānandaɱ etad avoca:|| ||

"'Brahmacariyaɱ brahmacariyan'||
ti āvuso Ānanda, vuccati.|| ||

Katamaɱ nu kho āvuso brahmacariyan?|| ||

Katamaɱ brahmacariya-pariyosānan" ti?|| ||

"Sādhu sādhu āvuso Bhadda,||
bhaddako te āvuso Bhadda ummaggo,||
bhaddakaɱ paṭibhānaɱ,||
kalyāṇī paripucchā evaɱ hi tvaɱ āvuso Bhadda,||
pucchasi:|| ||

'"Brahmacariyaɱ brahmacariyan"' ti āvuso Ānanda vuccati.|| ||

Katamaɱ nu kho āvuso brahmacariyan?|| ||

Katamaɱ brahmacariya-pariyosānan?'" ti?|| ||

"Evam āvuso" ti.|| ||

"Ayam eva kho āvuso ariyo aṭṭhaŋgiko maggo brahmacariyaɱ.|| ||

Seyyathīdaɱ:|| ||

Sammā-diṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhī|| ||

Yo kho āvuso rāgakkhayo||
dosakkhayo||
mohakkhayo||
idaɱ brahmacariyo-pariyosānan" ti.|| ||

 


Contact:
E-mail
Copyright Statement   Webmaster's Page