Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
V. Mahā-Vagga
45. Magga Saŋyuttaa
IV. Paṭipatti Vagga

Sutta 34

Pāraŋgama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayam Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuɱ.|| ||

Bhagavā etad avoca:|| ||

"Aṭṭh'ime bhikkhave, dhammā bhāvitā bahulīkatā apārā pāraŋgamanāya saŋvattanti.|| ||

Katame aṭṭha?|| ||

Seyyathīdaɱ:|| ||

Sammā-diṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Ime kho bhikkhave, aṭṭha dhammā bhāvitā bahulīkatā apārā pāraŋgamanāya saŋvattantī" ti.|| ||

Idam avoca Bhagavā.|| ||

Idaɱ vatvā sugato athāparaɱ etad avoca satthā:|| ||

Appakā te manussesu ye janā pāragāmino,||
Athāyaɱ itarā pajā tīram evānudhāvati.|| ||

Ye ca kho sammad akkhāte dhamme dhammānuvattino,||
Te janā pāram essanti maccudheyyaɱ suduttaraɱ.|| ||

Kaṇhaɱ dhammaɱ vippahāya sukkaɱ bhāvetha paṇḍito,||
Okā anokaɱ āgamma viveke yattha dūramaɱ.|| ||

Tatrābhiratim iccheyya hitvā kāme akiñcano,||
Pariyodapeyya attānaɱ cittaklesehi paṇḍito.|| ||

Yesaŋ sambodhiaŋgesu sammā cittaɱ subhāvitaɱ,||
Ādānapaṭinissagge anupādāya ye ratā||
Khīṇāsavā jutīmanto te loke parinibbutā ti.|| ||

 


Contact:
E-mail
Copyright Statement   Webmaster's Page