Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
46. Bojjhanga Saŋyutta
I. Pabbata-Vaggo

Namo tassa Bhagavato arahato sammā sambuddhassa

Sutta 1

Himavanta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evam me sutaɱ:|| ||

Ekaɱ samayam Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuɱ.|| ||

Bhagavā etad avoca:|| ||

[63] "Himavantaɱ bhikkhave,||
pabbatarājānaɱ nissāya nāgā kāyaɱ vaḍḍhenti balaɱ gāhenti.|| ||

Te tattha kāyaɱ vaḍḍhetvā balaɱ gāhetvā kussubbhe otaranti.|| ||

Kussubbhe otaritvā mahāsobbhe otaranti.|| ||

Mahāsobbhe otaritvā kunnadiyo otaranti.|| ||

Kunnadiyo otaritvā mahānadiyo otaranti.|| ||

Mahānadiyo otaritvā mahāsamuddaɱ sāgaraɱ otaranti.|| ||

Te tattha mahantattaɱ vepullattaɱ āpajjanti kāyena.|| ||

Evam eva kho bhikkhave bhikkhu sīlaɱ nissāya||
sīle patiṭṭhāya||
satta-bojjhaŋge bhāvento||
satta-bojjhaŋge bahulīkaronto||
mahantattaɱ||
vepullattaɱ||
pāpuṇāti dhammesu.|| ||

Kathañ ca bhikkhave, bhikkhu sīlaɱ nissāya||
sīle patiṭṭhāya||
sattabojjhaŋge bhāvento||
sattabojjhaŋge bahulīkaronto||
mahantattaɱ||
vepullattaɱ||
pāpuṇāti dhammesu?|| ||

Idha bhikkhave, Bhikkhu||
sati-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

[64] Dhamma-vicaya-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Viriya-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Pīti-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Passaddhi-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Samādhi-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Upekkhā-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Evaɱ kho bhikkhave bhikkhu sīlaɱ nissāya||
sīle patiṭṭhāya||
sattabojjhaŋge bahulīkaronto||
mahantattaɱ||
vepullattaɱ||
pāpuṇāti dhammesū" ti.|| ||

 


Contact:
E-mail
Copyright Statement   Webmaster's Page