Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
46. Bojjhanga Saŋyutta
I. Pabbata-Vaggo

Sutta 2

Kāya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh][olds] Evam me sutaɱ:|| ||

Ekaɱ samayam Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuɱ.|| ||

Bhagavā etad avoca:|| ||

"Seyyathā pi bhikkhave, ayaɱ kāyo āhāraṭṭhiko||
āhāraɱ paṭicca tiṭṭhati,||
anāhāro no tiṭṭhati.|| ||

Evam eva kho bhikkhave,||
pañca nīvaraṇā āhāraṭṭhitikā||
āhāraɱ paṭicca tiṭṭhanti,||
anāhārā no tiṭṭhanti.|| ||

Ko ca bhikkhave āhāro anuppannassa vā||
kāmacchandassa uppādāya uppannassa vā||
kāmacchandassa bhiyyobhāvāya vepullāya?|| ||

Atthi bhikkhave subha-nimittaɱ.|| ||

Tattha ayoniso-manasikāra-bahulīkāro ayam āhāro anuppannassa vā||
kāmacchandassa uppādāya uppannassa vā||
kāmacchandassa bhiyyobhāvāya vepullāya.|| ||

Ko ca bhikkhave āhāro anuppannassa vā||
vyāpādassa uppādāya uppannassa vā||
vyāpādassa bhiyyobhāvāya vepullāya?|| ||

Atthi bhikkhave paṭighanimittaɱ.|| ||

Tattha ayoniso-mana-sikāra-bahulīkāro,||
ayam āhāro anuppannassa vā||
vyāpādassa uppādāya uppannassa vā||
vyāpādassa bhiyyobhāvāya vepullāya.|| ||

Ko ca bhikkhave āhāro anuppannassa vā||
thīnamiddhassa uppādāya, uppannassa vā||
thīnamiddhassa bhiyyobhāvāya vepullāya?|| ||

Atthi bhikkhave arati||
tandi||
vijambhikā||
bhatta-sammado||
cetaso līnattaɱ.|| ||

Tattha ayoniso [65] manasikārabahulīkāro,||
ayam āhāro anuppannassa vā||
thīnamiddhassa uppādāya uppannassa vā||
thīnamiddhassa bhiyyobhāvāya vepullāya.|| ||

Ko ca bhikkhave āhāro anuppannassa vā||
uddhacca-kukkucca uppādāya uppannassa vā||
uddhacca-kukkuccassa bhiyyobhāvāya vepullāya?|| ||

Atthi bhikkhave cetaso avupasamo.|| ||

Tattha ayoniso-mana-sikāra-bahulīkāro ayam āhāro anuppannassa vā||
uddhacca-kukkuccassa uppādāya uppannassa vā||
uddhacca-kukkuccassa bhiyyobhāvāya vepullāya.|| ||

Ko ca bhikkhave āhāro anuppannāya vā||
vicikicchāya uppādāya uppannāya vā||
vicikicchāya bhiyyobhāvāya vepullāya?|| ||

Atthi bhikkhave vicikicchā-ṭhāniyā dhammā.|| ||

Tattha ayoniso-mana-sikāra-bahulīkāro ayam āhāro anuppannāya vā||
vicikicchāya uppādāya uppannāya vā||
vicikicchāya bhiyyobhāvāya vepullāya.|| ||

Seyyathā pi bhikkhave, ayaɱ kāyo āhāraṭṭhitiko āhāraɱ paṭicca tiṭṭhati.|| ||

Anāhāro no tiṭṭhati.|| ||

Evam eva kho bhikkhave ime pañca nīvaraṇā āhāraṭṭhitikā āhāraɱ paṭicca tiṭṭhanti||
anāhārā no tiṭṭhanti.|| ||

 


 

Seyyathā pi bhikkhave, ayaɱ kāyo āhāraṭṭhitiko āhāraɱ paṭicca tiṭṭhati||
anāhāro no tiṭṭhati.|| ||

Evam eva kho bhikkhave satta bojjhaŋgā āhāraṭṭhitikā āhāraɱ paṭicca tiṭṭhanti||
anāhārā no tiṭṭhanti.|| ||

Ko ca bhikkhave āhāro anuppannassa vā||
sati-sambojjhaŋgassa uppādāya uppannassa vā||
sati-sambojjhaŋgassa bhāvanāya pāripūriyā?|| ||

Atthi bhikkhave sati-sambojjhaŋgaṭṭhānīyā dhammā.|| ||

Tattha yoniso-mana-sikāra-bahulīkāro, ayam āhāro anuppannassa vā||
sati-sambojjhaŋgassa uppādāya uppannassa vā||
sati-sambojjhaŋgassa bhāvanāya pāripuriyā.|| ||

[66] Ko ca bhikkhave āhāro anuppannassa vā||
dhamma-vicaya-sambojjhaŋgassa uppādāya uppannassa vā||
dhamma-vicaya-sambojjhaŋgassa bhāvanāya pāripūriyā?|| ||

Atthi bhikkhave kusalākusalā dhammā||
sāvajjānavajjā dhammā||
hīnappaṇītā dhammā||
kaṇha-sukka-sappaṭibhāgā dhammā.|| ||

Tattha yoniso-mana-sikāra-bahulīkāro ayam āhāro anuppannassa vā||
dhamma-vicaya-sambojjhaŋgassa uppādāya uppannassa vā||
dhamma-vicaya-sambojjhaŋgassa bhāvanāya pāripūriyā.|| ||

Ko ca bhikkhave āhāro anuppannassa vā||
viriya-sambojjhaŋgassa uppādāya uppannassa vā||
viriya-sambojjhaŋgassa bhāvanāya pāripūriyā?|| ||

Atthi bhikkhave ārambha-dhātu||
nikkama-dhātu||
parakkama-dhātu.|| ||

Tattha yoniso-mana-sikāra-bahulīkāro,||
ayam āhāro anuppannassa vā||
viriya-sambojjhaŋgassa uppādāya uppannassa vā||
viriya-sambojjhaŋgassa bhāvanāya pāripūriyā.|| ||

Ko ca bhikkhave āhāro anuppannassa vā||
pīti-sambojjhaŋgassa uppādāya uppannassa vā||
pīti-sambojjhaŋgassa bhāvanāya pāripūriyā?|| ||

Atthi bhikkhave pīti-sambojjhaŋgaṭṭhāniyā dhammā.|| ||

Tattha yoniso-mana-sikāra-bahulīkāro,||
ayam āhāro anuppannassa vā||
pīti-sambojjhaŋgassa uppādāya, uppannassa vā||
pīti-sambojjhaŋgassa bhāvanāya pāripūriyā.|| ||

Ko ca bhikkhave āhāro anuppannassa vā||
passaddhi-sambojjhaŋgassa uppādāya, uppannassa vā||
passaddhi-sambojjhaŋgassa bhāvanāya pāripūriyā?|| ||

Atthi bhikkhave kāyapassaddhi,||
cittapassaddhi.|| ||

Tattha yoniso-mana-sikāra-bahulīkāro,||
ayam āhāro anuppannassa vā||
passaddhi-sambojjhaŋgassa uppādāya,||
uppannassa vā||
passaddhi-sambojjhaŋgassa bhāvanāya pāripūriyā.|| ||

Ko ca bhikkhave āhāro anuppannassa vā||
samādhi-sambojjhaŋgassa uppādāya uppannassa vā||
samādhi-sambojjhaŋgassa bhāvanāya pāripūriyā?|| ||

Atthi bhikkhave samatha-nimittaɱ avyagga-nimittaɱ.|| ||

Tattha yoniso-mana-sikāra-bahulīkāro,||
ayam āhāro anuppannassa vā||
samādhi-sambojjhaŋgassa uppādāya,||
uppannassa vā||
samādhi-sambojjhaŋgassa bhāvanāya pāripūriyā.|| ||

[67] Ko ca bhikkhave āhāro anuppannassa vā||
upekhā-sambojjhaŋgassa uppādāya uppannassa vā||
upekhā-sambojjhaŋgassa bhāvanāya pāripūriyā?|| ||

Atthi bhikkhave upekhā-sambojjhaŋgaṭṭhānīyā dhammā.|| ||

Tattha yoniso-mana-sikāra-bahulīkāro,||
ayam āhāro anuppannassa vā||
upekhā-sambojjhaŋgassa uppādāya,||
uppannassa vā||
upekhā-sambojjhaŋgassa bhāvanāya pāripūriyā.|| ||

Seyyathā pi bhikkhave, ayaɱ kāyo āhāraṭṭhitiko āhāraɱ paṭicca tiṭṭhati||
anāhāro no tiṭṭhati.|| ||

Evam eva kho bhikkhave ime satta bojjhaŋgā āhāraṭṭhitikā āhāraɱ paṭicca tiṭṭhanti||
anāhārā no tiṭṭhantī" ti.|| ||

 


Contact:
E-mail
Copyright Statement   Webmaster's Page