Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
46. Bojjhanga Saŋyutta
I. Pabbata-Vaggo

Sutta 3

Sīla Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][olds][bodh] Evam me sutaɱ:|| ||

Ekaɱ samayam Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi Bhikkhavo ti.|| ||

Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

"Ye te bhikkhave bhikkhu sīlasampannā||
samādhisampannā||
paññāsampannā||
vimuttisampannā||
vimuttiñāṇadassanasampannā|| ||

Dassanam pāham bhikkhave,||
tesaɱ bhikkhūnaɱ bahukāraɱ vadāmi.|| ||

3. Savanam pāham bhikkhave,||
tesaɱ bhikkhūnaɱ bahukāraɱ vadāmi.|| ||

Upasaŋkamanam pāham bhikkhave,||
tesaɱ bhikkhūnaɱ bahukāraɱ vadāmi.|| ||

Payirupāsanam pāham bhikkhave,||
tesaɱ bhikkhūnaɱ bahukāraɱ vadāmi.|| ||

Anussatim pāham bhikkhave,||
tesaɱ bhīkkhūnaɱ bahukāraɱ vadāmi.|| ||

Anupabbajjam pāham bhikkhave,||
tesaɱ bhikkhūnaɱ bahukāraɱ vadāmi.|| ||

4. Taɱ kissa hetu?|| ||

Tathārūpānam bhikkhave||
bhikkhūnaɱ dhammaɱ sutvā||
dvayena vūpakāsena vūpakaṭṭho viharati||
kāyavūpakāsena ca||
cittavūpakāsena ca.|| ||

So tathā vūpakaṭṭho viharanto taɱ dhammaɱ anussarati anuvitakketi.|| ||

5. Yasmiɱ samaye bhikkhave,||
bhikkhu tathā vūpakaṭṭho viharanto taɱ dhammaɱ anussarati anuvitakketi [68] satisambojjhaŋgo tasmiɱ samaye tassa bhikkhuno āraddho hoti.|| ||

Satisambojjhaŋgaɱ yasmiɱ samaye bhikkhu bhāveti,||
satisambojjhaŋgo tasmiɱ samaye bhikkhuno bhāvanā pāripūriɱ gacchati.|| ||

So tathā sato viharanto taɱ dhammaɱ paññāya pavicinati pavicarati parivīmaɱsam āpajjati.|| ||

6. Yasmiɱ samaye bhikkhave,||
bhikkhu tathā sato viharanto taɱ dhammaɱ paññāya pavicinati pavicarati parivīmaɱsam āpajjati,||
dhammavicayasambojjhaŋgo tasmiɱ samaye tassa bhikkhuno āraddho hoti.|| ||

Dhammavicayasambojjhaŋgaɱ yasmiɱ samaye bhikkhu bhāveti,||
dhammavicayasambojjhaŋgo tasmiɱ samaye bhikkhuno bhāvanā pāripūriɱ gacchati.|| ||

Tassa taɱ dhammaɱ paññāya pavicinato pavicarato parivīmaɱsam āpajjato āraddhaɱ hoti viriyaɱ asallīnaɱ.|| ||

7. Yasmiɱ samaye bhikkhave,||
bhikkhuno taɱ dhammaɱ paññāya pavicinato pavicarato parivīmaɱsam āpajjato āraddhaɱ hoti viriyaɱ asallīṇaɱ,||
viriyasambojjhaŋgo tasmiɱ samaye bhikkhuno āraddho hoti.|| ||

Viriyasambojjhaŋgaɱ yasmiɱ samaye bhikkhu bhāveti,||
viriyasambojjhaŋgo tasmiɱ samaye bhikkhuno bhāvanā pāripūriɱ gacchati.|| ||

Āraddhaviriyassa uppajjati pīti nirāmisā.|| ||

8. Yasmiɱ samaye bhikkhave,||
bhikkhuno āraddhaviriyassa uppajjati pīti nirāmisā,||
pītisambojjhaŋgo tasmiɱ samaye bhikkhuno āraddho hoti.|| ||

Pītisambojjhaŋgaɱ yasmiɱ samaye bhikkhu bhāveti,||
pītisambojjhaŋgo tasmiɱ samaye bhikkhuno bhāvanā pāripūriɱ gacchati.|| ||

Pītimanassa kāyo pi passambhati cittam pi passambhati.|| ||

9. Yasmiɱ samaye bhikkhave,||
bhikkhuno pītimanassa kāyo pi passambhati cittam pi passambhati,||
passaddhisambojjhaŋgo tasmiɱ samaye bhikkhuno āraddho hoti.|| ||

Passaddhisambojjhaŋgaɱ yasmiɱ samaye bhikkhu bhāveti,||
passaddhisambojjhaŋgo tasmiɱ samaye bhikkhuno bhāvanā [69] pāripūriɱ gacchati.|| ||

Passaddhakāyassa sukhaɱ hoti.|| ||

Sukhino cittaɱ samādhiyati.|| ||

10. Yasmiɱ samaye bhikkhave,||
bhikkhuno passaddhakāyassa sukhino cittaɱ samādhiyati,||
samādhisambojjhaŋgo tasmiɱ samaye bhikkhuno āraddho hoti.|| ||

Samādhisambojjhaŋgaɱ yasmiɱ samaye bhikkhu bhāveti,||
samādhisambojjhaŋgo tasmiɱ samaye bhikkhuno bhāvanā pāripūriɱ gacchati.|| ||

So tathā samāhitaɱ cittaɱ sādhukaɱ ajjhupekkhitā hoti.|| ||

11. Yasmiɱ samaye bhikkhave,||
bhikkhu tathā samāhitaɱ cittaɱ sādhukaɱ ajjhupekkhitā hoti||
upekhāsambojjhaŋgo tasmiɱ samaye bhikkhuno āraddho hoti.|| ||

Upekhāsambojjhaŋgaɱ yasmiɱ samaye bhikkhu bhāveti,||
upekhāsambojjhaŋgo tasmiɱ samaye bhikkhuno bhāvanā pāripūriɱ gacchati.|| ||

12. Evaɱ bhāvitesu kho bhikkhave sattasu bojjhaŋgesu evaɱ bahulīkatesu satta phalā satt'ānisaɱsā pāṭikaŋkhā.|| ||

Katame satta phalā satt'ānisaɱsā:|| ||

13. Diṭṭhe va dhamme paṭihacca aññaɱ ārādheti.|| ||

14. No ce diṭṭhe va dhamme paṭihacca aññaɱ ārādheti,||
atha maraṇakāle aññaɱ ārādheti.|| ||

15. No ce diṭṭhe va dhamme paṭihacca aññaɱ ārādheti,||
no ce maraṇakāle aññaɱ ārādheti,||
atha pañcannaɱ orambhāgiyānaɱ saɱyojanānaɱ parikkhayā antarāparinibbāyī hoti.|| ||

16. No ce diṭṭhe va dhamme paṭihacca aññaɱ ārādheti,||
no ce maraṇakāle aññaɱ ārādheti,||
no ce pañcannaɱ orambhāgiyānaɱ saɱyojanānaɱ parikkhayā antarāparinibbāyī hoti,||
atha pañcannaɱ orambhāgiyānaɱ saɱyojanānaɱ parikkhayā upahacca parinibbāyī hoti.|| ||

17. No ce diṭṭhe va dhamme paṭihacca aññaɱ ārādheti,||
no ce maraṇakāle aññaɱ ārādheti,||
no ce pañcannaɱ [70] orambhāgiyānaɱ saɱyojanānaɱ parikkhayā antarāparinibbāyī hoti,||
no ce pañcannaɱ orambhāgiyānaɱ saɱyojanānaɱ parikkhayā upahacca parinibbāyī hoti,||
atha pañcannaɱ orambhāgiyānaɱ saɱyojanānaɱ parikkhayā asaɱkhāraparinibbāyī hoti.|| ||

18. No ce diṭṭhe va dhamme paṭihacca aññaɱ ārādheti,||
no ce maraṇakāle aññaɱ ārādheti,||
no ce pañcannaɱ orambhāgiyānaɱ saɱyojanānaɱ parikkhayā antarā parinibbāyī hoti,||
no ce pañcannaɱ orambhāgiyānaɱ saɱyojanānaɱ parikkhayā upahacca parinibbāyī hoti,||
no ce pañcannaɱ orambhāgiyānaɱ saɱyojanānaɱ parikkhayā asaɱkhāraparinibbāyī hoti,||
atha pañcannaɱ orambhāgiyānaɱ saɱyojanānaɱ parikkhayā sasaɱkhāraparinibbāyī hoti.|| ||

19. No ce diṭṭhe va dhamme paṭihacca aññaɱ ārādheti,||
no ce maraṇakāle aññaɱ ārādheti,||
no ce pañcannaɱ orambhāgiyānaɱ saɱyojanānaɱ parikkhayā antarā parinibbāyī hoti,||
no ce pañcannaɱ orambhāgiyānaɱ saɱyojanānaɱ parikkhayā upahacca parinibbāyī hoti,||
no ce pañcannaɱ orambhāgiyānaɱ saɱyojanānaɱ parikkhayā asaɱkhāra parinibbāyī hoti,||
no ce pañcannaɱ orambhāgiyānaɱ saɱyojanānaɱ parikkhayā sasankhāra parinibbāyī hoti,||
atha pañcannaɱ orambhāgiyānaɱ saɱyojanānaɱ parikkhayā uddhaɱsoto hoti Akaniṭṭhagāmī.|| ||

20. Evaɱ bhāvitesu kho bhikkhave,||
sattasu bojjhaŋgesu evaɱ bahulīkatesu ime satta phalā sattānisaɱsā pāṭikaŋkhā ti.|| ||


Contact:
E-mail
Copyright Statement   Webmaster's Page