Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
46. Bojjhanga Saŋyutta
II. Gilāna-Vaggo

Sutta 13

Dutiya Suriyassa Upamā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayam Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi Bhikkhavo ti.|| ||

Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

"Suriyassa bhikkhave,||
udayato etaɱ pubbaŋgamaɱ||
etaɱ pubbanimittaɱ||
yad idaɱ aruṇaggaɱ.|| ||

Evam eva kho bhikkhave bhikkhuno||
sattannaɱ bojjhaŋgānaɱ uppādāya||
etaɱ pubbaŋgamaɱ||
etaɱ pubbanimittaɱ||
yad idaɱ yoniso-manasikāro.|| ||

Yoniso-manikāra-sampannassas etaɱ bhikkhave,||
bhikkhuno pāṭikaŋkhaɱ sattabojjhaŋge bhāvessati||
satta bojjhaŋge bahulīkarissati.|| ||

Kathañ ca bhikkhave, bhikkhu yoniso-manasikāra-sampanno||
sattabojjhaŋge bhāveti||
sattabojjhaŋge bahulīkaroti?|| ||

Idha bhikkhave, Bhikkhu||
sati-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Dhamma-vicayasambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Viriyasambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Pītisambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Passaddhisambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Samādhisambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Upekkhāsambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Evaɱ kho bhikkhave, bhikkhu yoniso-manasikāra-sampanno||
satta bojjhaŋge bhāveti||
satta bojjhaŋge bahulīkarotī" ti.|| ||

 


Contact:
E-mail
Copyright Statement   Webmaster's Page