Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
46. Bojjhanga Saŋyutta
II. Gilāna-Vaggo

Sutta 15

Dutiya Gilāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayam Bhagavā Rājagahe viharati veluvane kalandakanivāpe.|| ||

Tena kho pana samayena āyasmā Mahā Moggallāno pipphaliguhāyaɱ viharati ābādhiko dukkhito bāḷhagilāno.|| ||

Atha kho Bhagavā sāyaṇhasamayaɱ paṭisallanā vuṭṭhito yenāyasmā Mahā Moggallāno ten'upasaŋkami.||
Upasaŋkamitvā paññatena āsane nisīdi.|| ||

Nisajja kho Bhagavā āyasmantaɱ Mahā Moggallāno etad avoca:|| ||

"Kacci te Moggallāno, khamanīyaɱ?|| ||

Kacci yāpanīyaɱ?|| ||

Kacci dukkhā vedanā?|| ||

Paṭikkamanti no abhikkaman ti?|| ||

Paṭikkamosānaɱ paññāyati no abhikkamo" ti?|| ||

"Na me bhante, khamanīyaɱ.|| ||

Na yāpanīyaɱ bāḷhā me dukkhā vedanā abhikkamanti, no paṭikkamanti.|| ||

Abhikkamosānaɱ paññāyati, no paṭikkamo" ti.|| ||

"Satt'ime Moggallāno bojjhaŋgā mayā sammadakkhātā bhāvitā bahulīkatā abhiññāya sambodhāya nibbāṇaya saɱvattanti.|| ||

Katame satta?|| ||

Sati-sambojjhaŋgo kho Moggallāna, mayā sammadakkhāto bhāvito bahulīkato.|| ||

Abhiññāya sambodhāya nibbānāya saɱvattati.|| ||

Dhamma-vicaya-sambojjhaŋgo kho Moggallāna, mayā sammadakkhāto bhāvito bahulīkato.|| ||

Abhiññāya sambodhāya nibbānāya saɱvattati.|| ||

Viriya-sambojjhaŋgo kho Moggallāna, mayā sammadakkhāto bhāvito bahulīkato.|| ||

Abhiññāya sambodhāya nibbānāya saɱvattati.|| ||

Pīti-sambojjhaŋgo kho Moggallāna, mayā sammadakkhāto bhāvito bahulīkato.|| ||

Abhiññāya sambodhāya nibbānāya saɱvattati.|| ||

Passaddhi-sambojjhaŋgo kho Moggallāna, mayā sammadakkhāto bhāvito bahulīkato.|| ||

Abhiññāya sambodhāya nibbānāya saɱvattati.|| ||

Samādhi-sambojjhaŋgo kho Moggallāna, mayā sammadakkhāto bhāvito bahulīkato.|| ||

Abhiññāya sambodhāya nibbānāya saɱvattati.|| ||

Upekhāsambojjhaŋgo kho Moggallāno, mayā sammadakkhāto bhāvito bahulīkato.|| ||

Abhiññāya sambodhāya nibbānāya saɱvattati.|| ||

Ime kho Moggallāno, satta bojjhaŋgā mayā sammadakkhānā bhāvitā bahulīkatā abhiññāya sambodhāya nibbānāya saɱvattantī" ti.|| ||

"Taggha Bhagava, bojjhaŋgā!|| ||

Taggha sugata, bojjhaŋgā" ti!|| ||

Idam avoca Bhagavā.|| ||

Attamano āyasmā Mahā Moggallāno Bhagavato bhāsitaɱ abhinandi.|| ||

Vuṭṭhāhi cāyasmā Mahā Moggallāno tamhā ābādhā.|| ||

Tathā pahīno ca āyasmato Mahā Moggallāno so ābādho ahosī ti.|| ||

 


Contact:
E-mail
Copyright Statement   Webmaster's Page