Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
46. Bojjhanga Saŋyutta
IV. Nīvaraṇa-Vaggo

Sutta 32

Dutiya Kusalā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayam Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Ye keci bhikkhave, dhammā kusalā kusala-bhāgiyā kusala-pakkhiyā,||
sabbe te yoniso-manasi-kāra-mūlakā||
yoniso-manasikāra-samosaraṇā||
yoniso-manasikāro tesaŋ dhammānaɱ aggamakkhāyati.|| ||

Yoniso-manasikāra-sampannass'etaɱ bhikkhave, bhikkhuno pāṭikaŋkhaɱ satta bojjhaŋge bhāvessati||
satta bojjhaŋge bahulī-karissati.|| ||

Kathañ ca bhikkhave, bhikkhu||
appamatto satta bojjhaŋge bhāveti,||
satta bojjhaŋge bahulī-karoti?|| ||

Idha bhikkhave, Bhikkhu||
sati-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Dhamma-vicaya-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Viriya-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Pīti-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Passaddhi-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Samādhi-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Upekkhā-sambojjhaŋgaɱ bhāveti,||
viveka-nissitaɱ,||
virāga-nissitaɱ,||
nirodha-nissitaɱ,||
vossagga-pariṇāmiɱ.|| ||

Evaɱ kho bhikkhave, bhikkhu yoniso-manasikāra-sampanno satta bojjhaŋge bhāveti,||
satta bojjhaŋge bahulīkarotī" ti.|| ||

 


Contact:
E-mail
Copyright Statement   Webmaster's Page