Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya,
V: Mahā-Vagga
46. Bojjhanga Saɱyutta
IV. Nīvaraṇa-Vaggo

Sutta 33

Paṭhama Kilesa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[92]

[1][pts][bodh] Evam me sutaɱ:|| ||

Ekaɱ samayam Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Pañc'ime bhikkhave, jāta-rūpassa upakkilesā.|| ||

Ye hi upakkilesehi upakkiliṭṭhaɱ jāta-rūpaɱ na c'eva mudu hoti.|| ||

Na ca kammaniyaɱ||
na ca pabhassaraɱ pabhaŋgu ca,||
na ca sammā upeti kammāya.|| ||

Katame pañca?|| ||

Ayo bhikkhave, jāta-rūpassa upakkileso,||
yena upakkilesena upakkiliṭṭhaɱ jāta-rūpaɱ||
na c'eva mudu hoti||
na ca kammaniyaɱ||
na ca pabhassaraɱ||
pabhaŋgu ca,||
na ca sammā upeti kammāya.|| ||

Lohaɱ bhikkhave, jāta-rūpassa upakkileso,||
yena upakkilesena upakkiliṭṭhaɱ jāta-rūpaɱ||
na c'eva mudu hoti||
na ca kammaniyaɱ||
na ca pabhassaraɱ||
pabhaŋgu ca,||
na ca sammā upeti kammāya.|| ||

Tipu bhikkhave, jāta-rūpassa upakkileso,||
yena upakkilesena upakkiliṭṭhaɱ jāta-rūpaɱ||
na c'eva mudu hoti||
na ca kammaniyaɱ||
na ca pabhassaraɱ||
pabhaŋgu ca,||
na ca sammā upeti kammāya.|| ||

Sīsaŋ bhikkhave, jāta-rūpassa upakkileso,||
yena upakkilesena upakkiliṭṭhaɱ jāta-rūpaɱ||
na c'eva mudu hoti||
na ca kammaniyaɱ||
na ca pabhassaraɱ||
pabhaŋgu ca,||
na ca sammā upeti kammāya.|| ||

Sajjhu bhikkhave, jāta-rūpassa upakkileso,||
yena upakkilesena upakkiliṭṭhaɱ jāta-rūpaɱ||
na c'eva mudu hoti||
na ca kammaniyaɱ||
na ca pabhassaraɱ||
pabhaŋgu ca,||
na ca sammā upeti kammāya.|| ||

Ime kho bhikkhave, pañca jāta-rūpassa upakkilesā,||
yehi upakkilesehi upakkiliṭṭhaɱ jāta-rūpaɱ||
na c'eva mudu hoti||
na ca kammaniyaɱ||
na ca pabhassaraɱ||
pabhaŋgu ca,||
na ca sammā upeti kammāya.|| ||

 


 

Evam eva kho bhikkhave, pañc'ime cittassa upakkilesā.|| ||

Ye hi upakkilesehi upakkiliṭṭhaɱ cittaɱ||
na c'eva mudu hoti||
na ca kammaniyaɱ||
na ca pabhassaraɱ||
pabhaŋgu ca,||
na ca sammā-samādhiyati āsavānaɱ khayāya.|| ||

Katame pañca?|| ||

Kāma-c-chando bhikkhave, cittassa upakkileso||
yena upakkilesena upakkiliṭṭhaɱ cittaɱ||
na c'eva mudu hoti||
na ca kammaniyaɱ||
na ca pabhassaraɱ||
pabhaŋgu ca,||
na ca sammā-samādhiyati āsavānaɱ khayāya.|| ||

Vyāpādo bhikkhave, cittassa upakkileso||
yena upakkilesena upakkiliṭṭhaɱ cittaɱ||
na c'eva mudu hoti||
na ca kammaniyaɱ||
na ca pabhassaraɱ||
pabhaŋgu ca,||
na ca sammā-samādhiyati āsavānaɱ khayāya.|| ||

Thīna-middhaɱ bhikkhave, cittassa upakkileso||
yena upakkilesena upakkiliṭṭhaɱ cittaɱ||
na c'eva mudu hoti||
na ca kammaniyaɱ||
na ca pabhassaraɱ||
pabhaŋgu ca,||
na ca sammā-samādhiyati āsavānaɱ khayāya.|| ||

Uddhacca-kukkuccaɱ bhikkhave, cittassa upakkileso||
yena upakkilesena upakkiliṭṭhaɱ cittaɱ||
na c'eva mudu hoti||
na ca kammaniyaɱ||
na ca pabhassaraɱ||
pabhaŋgu ca,||
na ca sammā-samādhiyati āsavānaɱ khayāya.|| ||

Vicikicchā bhikkhave, cittassa upakkileso||
yena upakkilesena upakkiliṭṭhaɱ cittaɱ||
na c'eva mudu hoti||
na ca kammaniyaɱ||
na ca pabhassaraɱ||
pabhaŋgu ca,||
na ca sammā-samādhiyati āsavānaɱ khayāya.|| ||

[93] Ime kho bhikkhave, pañca cittassa upakkilesā,||
yehi upakkilesehi upakkiliṭṭhaɱ cittaɱ||
na c'eva mudu hoti,||
na ca kammaniyaɱ,||
na ca pabhassaraɱ,||
pabhaŋgu ca,||
na ca sammā-samādhiyati āsavānaɱ khayāyā" ti.|| ||

 


Contact:
E-mail
Copyright Statement