Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
46. Bojjhanga Saŋyutta

Sutta 51

Āhāra Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Pañcannaɱ ca vo bhikkhave, nīvaraṇānaɱ sattannaɱ ca bojjhaŋgānaɱ āhārañ ca anāhārañ ca desissāmi.|| ||

Taɱ suṇātha.|| ||

II. Āhāro Nīvaraŋāɱ

3. Ko ca bhikkhave, āhāro anuppannassa vā kāmacchandassa uppādāya uppannassa vā kāmacchandassa bhiyyobhāvāya [103] vepullāya?|| ||

Atthi bhikkhave, subhanimittaɱ.|| ||

Tattha ayonisomanasikāra-bahulīkāro,||
ayam āhāro anuppannassa vā kāmacchandassa uppādāya uppannassa vā kāmacchandassa bhiyyobhāvāya vepullāya.|| ||

4. Ko ca bhikkhave, āhāro anuppannassa vā byāpādassa uppādāya uppannassa vā byāpādassa bhiyyobhāvāya vepullāya?|| ||

Atthi bhikkhave, paṭighanimittaɱ.|| ||

Tattha ayonisomanasikāra-bahulīkāro,||
ayam āhāro anuppannassa vā byāpādassa uppādāya uppannassa vā byāpādassa bhiyyo bhāvāya vepullāya.|| ||

5. Ko ca bhikkhave, āhāro anuppannassa vā thīnamiddhassa uppādāya uppannassa vā thīnamiddhassa bhiyyobhāvāya vepullāya?|| ||

Atthi bhikkhave, arati tandi-vijambhitā bhattasammado cetaso ca līnattaɱ.|| ||

Tattha ayonisomanasikāra-bahulīkāro,||
ayam āhāro anuppannassa vā thīnamiddhassa uppādāya uppannassa vā thīnamiddhassa bhiyyobhāvāya vepullāya.|| ||

6. Ko ca bhikkhave, āhāro anuppannassa vā uddhaccakukkuccassa uppādāya uppannassa vā uddhaccakukkuccassa bhiyyobhāvāya vepullāya?|| ||

Atthi bhikkhave, cetaso avupasamo.|| ||

Tattha ayonisomanasikāra-bahulīkāro,||
ayam āhāro anuppannassa vā uddhaccakukkuccassa uppādāya uppannassa vā uddhaccakukkuccassa bhiyyobhāvāya vepullāya.|| ||

7. Ko ca bhikkhave, āhāro anuppannassa vā vicikicchāya uppādāya uppannassa vā vicikicchāya bhiyyobhāvāya vepullāya?|| ||

Atthi bhikkhave, vicikicchāṭṭhāniyā dhammā.|| ||

Tattha ayonisomanasikāra-bahulīkāro,||
ayam āhāro anuppannassa vā vicikicchāya uppādāya uppannassa vā vicikicchāya bhiyyobhāvāya vepullāya.|| ||

II. Āhāro Bojjhaŋgānaɱ

8. Ko ca bhikkhave, āhāro anuppannassa vā sati-sambojjhaŋgassa uppādāya uppannassa vā sati-sambojjhaŋgassa bhāvanā pāripūriyā?|| ||

Atthi bhikkhave, satisambojjhaŋgaṭṭhāniyā [104] dhammā.|| ||

Tattha yonisomanasikāra-bahulīkāro,||
ayam āhāro anuppannassa vā sati-sambojjhaŋgassa uppādāya uppannassa vā sati-sambojjhaŋgassa bhāvanā pāripūriyā.|| ||

Ko ca bhikkhave, āhāro anuppannassa vā dhammavicaya-sambojjhaŋgassa uppādāya uppannassa vā dhammavicaya-sambojjhaŋgassa bhāvanā pāripūriyā?|| ||

Atthi bhikkhave,||
kusalākusalā dhammā,||
sāvajjānavajjā dhammā,||
hīnappaṇītā dhammā,||
kaṇhasukkasappaṭibhāgā dhammā.|| ||

Tattha yonisomanasikāra-bahulīkāro,||
ayam āhāro anuppannassa vā dhammavicaya-sambojjhaŋgassa uppādāya uppannassa vā dhammavicaya-sambojjhaŋgassa bhāvanā pāripūriyā.|| ||

Ko ca bhikkhave, āhāro anuppannassa vā viriya-sambojjhaŋgassa uppādāya uppannassa vā viriya-sambojjhaŋgassa bhāvanā pāripūriyā?|| ||

Atthi bhikkhave, ārambhadhātu nikkhamadhātu parakkamadhātu.|| ||

Tattha yonisomanasikāra-bahulīkāro,||
ayam āhāro anuppannassa vā viriya-sambojjhaŋgassa uppādāya uppannassa vā viriya-sambojjhaŋgassa bhāvanā pāripūriyā.|| ||

Ko ca bhikkhave, āhāro anuppannassa vā pīti-sambojjhaŋgassa uppādāya uppannassa vā pīti-sambojjhaŋgassa bhāvanā pāripūriyā?|| ||

Atthi bhikkhave, pītisambojjhaŋgaṭṭhāniyā dhammā.|| ||

Tattha yonisomanasikāra-bahulīkāro,||
ayam āhāro anuppannassa vā pīti-sambojjhaŋgassa uppādāya uppannassa vā pīti-sambojjhaŋgassa bhāvanā pāripūriyā.|| ||

Ko ca bhikkhave, āhāro anuppannassa vā passaddhi-sambojjhaŋgassa uppādāya uppannassa vā passaddhi-sambojjhaŋgassa bhāvanā pāripūriyā?|| ||

Atthi bhikkhave, kāyapassaddhi,||
cittapassaddhi.|| ||

Tattha yonisomanasikāra-bahulīkāro,||
ayam āhāro anuppannassa vā passaddhi-sambojjhaŋgassa uppādāya uppannassa vā passaddhi-sambojjhaŋgassa bhāvanā pāripūriyā. [105] Ko ca bhikkhave, āhāro anuppannassa vā samādhi-sambojjhaŋgassa uppādāya uppannassa vā samādhi-sambojjhaŋgassa bhāvanā pāripūriyā?|| ||

Atthi bhikkhave, samathanimittaɱ,||
abyagganimittaɱ.|| ||

Tattha yonisomanasikāra-bahulīkāro,||
ayam āhāro anuppannassa vā samādhi-sambojjhaŋgassa uppādāya uppannassa vā samādhi-sambojjhaŋgassa bhāvanā pāripūriyā.|| ||

Ko ca bhikkhave, āhāro anuppannassa vā upekhā-sambojjhaŋgassa uppādāya uppannassa vā upekhā-sambojjhaŋgassa bhāvanā pāripūriyā?|| ||

Atthi bhikkhave, upekhāsambojjhaŋgaṭṭhāniyā dhammā.|| ||

Tattha yonisomanasikāra-bahulīkāro,||
ayam āhāro anuppannassa vā upekhā-sambojjhaŋgassa uppādāya uppannassa vā upekhā-sambojjhaŋgassa bhāvanā pāripūriyā.|| ||

Ko ca bhikkhave, anāhāro anuppannassa vā kāmacchandassa uppādāya uppannassa vā kāmacchandassa bhiyyobhāvāya vepullāya?|| ||

Atthi bhikkhave, asubhanimittaɱ.|| ||

Tattha yoniso manasikāra-bahulīkāro,||
ayamanāhāro anuppannassa vā kāmacchandassa uppādāya,||
uppannassa vā kāmacchandassa bhiyyobhāvāya vepullāya.|| ||

Ko ca bhikkhave, anāhāro anuppannassa vā byāpādassa uppādāya uppannassa vā byāpādassa bhiyyobhāvāya vepullāya?|| ||

Atthi bhikkhave, mettācetovimutti.|| ||

Tattha yoniso manasikāra-bahulīkāro,||
ayamanāhāro anuppannassa vā byāpādassa uppādāya uppannassa vā byāpādassa bhiyyobhāvāya vepullāya.|| ||

Ko ca bhikkhave, anāhāro anuppannassa vā thīnamiddhassa uppādāya uppannassa vā thīnamiddhassa bhāvanā pāripūriyā?|| ||

Atthi bhikkhave, ārambhadhātu nikkhammadhātu parakkamadhātu.|| ||

Tattha yoniso manasikāra-bahulīkāro,||
ayamanāhāro anuppannassa vā thīnamiddhassa [106] uppādāya uppannassa vā thīnamiddhassa bhiyyobhāvāya vepullāya.|| ||

Ko ca bhikkhave, anāhāro anuppannassa vā uddhaccakukkuccassa uppādāya uppannassa vā uddhaccakukkuccassa bhiyyobhāvāya vepullāya?|| ||

Atthi bhikkhave, cetaso vūpasamo.|| ||

Tattha yoniso manasikāra-bahulīkāro,||
ayamanāhāro anuppannassa vā uddhaccakukkuccassa uppādāya, uppannassa vā uddhaccakukkuccassa bhiyyobhāvāya vepullāya.|| ||

Ko ca bhikkhave, anāhāro anuppannassa vā vicikicchāya uppādāya uppannassa vā vicikicchāya bhiyyobhāvāya vepullāya?|| ||

Atthi bhikkhave,||
kusalākusalā dhammā,||
sāvajjānavajjā dhammā,||
hīnappaṇītā dhammā,||
kaṇhasukkasappaṭibhāgā dhammā.|| ||

Tattha yoniso manasikāra-bahulīkāro,||
ayamanāhāro anuppannassa vā vicikicchāya uppādāya,||
uppannassa vā vicikicchāya bhiyyobhāvāya vepullāya.|| ||

Ko ca bhikkhave, anāhāro anuppannassa vā sati-sambojjhaŋgassa uppādāya,||
uppannassa vā sati-sambojjhaŋgassa bhāvanā pāripūriyā?|| ||

Atthi bhikkhave, satisambojjhaŋṭṭhāniyā dhammā.|| ||

Tattha amanasikāra-bahulīkāro,||
ayamanāhāro anuppannassa vā satisambojjhaŋagassa uppādāya, uppannassa vā sati-sambojjhaŋgassa bhāvanā pāripūriyā.|| ||

Ko ca bhikkhave, anāhāro anuppannassa vā dhammavicaya-sambojjhaŋgassa uppādāya uppannassa vā dhammavicaya-sambojjhaŋgassa bhāvanā pāripūriyā?|| ||

Atthi bhikkhave, kusalākusalā dhammā,||
sāvajjānavajjā dhammā,||
hīnappaṇītā dhammā,||
kaṇhasukkasappaṭibhāgā dhammā.|| ||

Tattha amanasikāra-bahulīkāro,||
ayamanāhāro anuppannassa vā dhammavicaya-sambojjhaŋgassa uppādāya uppannassa vā dhammavicaya-sambojjhaŋgassa bhāvanā pāripūriyā.|| ||

Ko ca bhikkhave, anāhāro anuppannassa vā viriya-sambojjhaŋgassa uppādāya uppannassa vā viriya-sambojjhaŋgassa [107] bhāvanā pāripūriyā?|| ||

Atthi bhikkhave, ārambhadhātu nikkhamadhātu parakkamadhātu.|| ||

Tattha amanasikāra-bahulīkāro,||
ayamanāhāro anuppannassa vā viriya-sambojjhaŋgassa uppādāya uppannassa vā viriya-sambojjhaŋgassa bhāvanā pāripūriyā.|| ||

Ko ca bhikkhave, anāhāro anuppannassa vā pīti-sambojjhaŋgassa uppādāya uppannassa vā pīti-sambojjhaŋgassa bhāvanā pāripūriyā?|| ||

Atthi bhikkhave, pītisambojjhaŋgaṭṭhāniyā dhammā.|| ||

Tattha amanasikāra-bahulīkāro,||
ayamanāhāro anuppannassa vā pīti-sambojjhaŋgassa uppādāya uppannassa vā pīti-sambojjhaŋgassa bhāvanā pāripūriyā.|| ||

Ko ca bhikkhave, anāhāro anuppannassa vā passaddhi-sambojjhaŋgassa uppādāya uppannassa vā passaddhi-sambojjhaŋgassa bhāvanā pāripūriyā?|| ||

Atthi bhikkhave, kāyapassaddhi,||
cittapassaddhi.|| ||

Tattha amanasikāra-bahulīkāro,||
ayamanāhāro anuppannassa vā passaddhi-sambojjhaŋgassa uppādāya uppannassa vā passaddhi-sambojjhaŋgassa bhāvanā pāripūriyā.|| ||

Ko ca bhikkhave, anāhāro anuppannassa vā samādhi-sambojjhaŋgassa uppādāya uppannassa vā samādhi-sambojjhaŋgassa bhāvanā pāripūriyā?|| ||

Atthi bhikkhave, samathanimittaɱ abyagganimittaɱ.|| ||

Tattha amanasikāra-bahulīkāro,||
ayamanāhāro anuppannassa vā samādhi-sambojjhaŋgassa uppādāya uppannassa vā samādhi-sambojjhaŋgassa bhāvanā pāripūriyā.|| ||

Ko ca bhikkhave, anāhāro anuppannassa vā upekhā-sambojjhaŋgassa uppādāya uppannassa vā upekhā-sambojjhaŋgassa bhāvanā pāripūriyā?|| ||

Atthi bhikkhave, upekhāsambojjhaŋgaṭṭhāniyā dhammā.|| ||

Tattha amanasikāra-bahulīkāro,||
ayamanāhāro anuppannassa vā upekhā-sambojjhaŋgassa uppādāya uppannassa vā upekhā-sambojjhaŋgassa bhāvanā pāripūriyā.|| ||

 


Contact:
E-mail
Copyright Statement   Webmaster's Page