Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
V. MahāVagga
46. Bojjhaŋga Saŋyuttaa
Chapter VI: Bojjangasakaccam

Sutta 53

Aggi Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh][than] Evam me sutaɱ:|| ||

2. Atha kho sambahulā bhikkhū pubbaṇhasamayaɱ nivāsetvā pattacīvaramādāya Sāvatthiɱ piṇḍāya pavisiɱsu.|| ||

3. Atha kho tesaɱ bhikkhūnaɱ etad ahosi:|| ||

"Atippago kho tāva Sāvatthiyaɱ piṇḍāya carituɱ.|| ||

Yaɱ nūna mayaɱ yena aññatitthiyānaɱ paribabājakānaɱ ārāmo ten'upasaŋkameyyāmā" ti.|| ||

4. Atha kho te bhikkhū yena aññatitthayānaɱ paribbājakānaɱ ārāmo ten'upasaŋkamiɱsu.|| ||

Upasaŋkamitvā tehi aññatitthiyehi paribbājakehi saddhiɱ sammodiɱsu.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdiɱsu.|| ||

Eka-m-antaɱ nisinne kho te bhikkhū te aññatitthiyā paribbājakā etad avocuɱ:|| ||

5. "Samaṇo āvuso Gotamo sāvakānaɱ evaɱ dhammaɱ deseti.|| ||

"Etha tumhe bhikkhave, pañca nīvaraṇe pahāya cetaso upakkilese paññāya dubbalīkaraṇe satta bojjhaŋge yathābhūtaɱ bhāvethā" ti.|| ||

Mayam pi kho āvuso, sāvakānaɱ evaɱ dhammaɱ desema.|| ||

"Etha tumhe āvuso, pañca nīvaraṇe pahāya cetaso upakkilese paññāya dubbalīkaraṇe satta bojjhaŋge yathābhūtaɱ bhāvethā" ti.|| ||

Idha no āvuso ko viseso, ko adhippāyo.|| ||

Kiɱ nānākaraṇaɱ, samaṇassa vā Gotamassa amhākaɱ vā yad idaɱ dhammadesanāya vā dhammadesanaɱ anusāsaniyā vā anusāsanin" ti.|| ||

6. Atha kho te bhikkhū tesaɱ aññatitthiyānaɱ paribbājakānaɱ bhāsitaɱ n'eva abhinandiɱsu, na paṭikkosiɱsu.|| ||

Anabhinanditvā appaṭikkositvā uṭṭhāy'āsanā pakkamiɱsu,|| ||

"Bhagavato santike etassa bhāsitassa atthaɱ ājānissāmā" ti.|| ||

7. Atha kho te bhikkhū Sāvatthiyaɱ piṇḍāya caritvā pacchābhantaɱ piṇḍapātapaṭikkantā yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

8. Eka-m-antaɱ nisinnā kho te bhikkhū Bhagavantaɱ etad avocuɱ:|| ||

"Idha mayaɱ bhante pubbaṇhasamayaɱ nivāsetvā pattacīvaram ādāya Sāvatthiɱ piṇḍāya pavisimha.|| ||

Tesaɱ no bhante, amhākaɱ etad ahosi:|| ||

"Atippago kho tāva Sāvatthiyaɱ piṇḍāya carituɱ yaɱ nūna mayaɱ yena aññatitthiyānaɱ paribbājakānaɱ ārāmo ten'upasaŋkameyyāmā ti.|| ||

Atha kho mayaɱ bhante, yena aññatitthiyānaɱ paribbājakānaɱ ārāmo ten'upasaŋkamimha.|| ||

Upasaŋkamitvā tehi aññatitthiyehi paribbājakehi saddhiɱ sammodimha.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdimha.|| ||

Eka-m-antaɱ nisinne kho amhe bhante, te aññatitthiyā paribbājakā etad avocuɱ:|| ||

9. "Samaṇo āvuso Gotamo sāvakānaɱ evaɱ dhammaɱ deseti.|| ||

"Etha tumhe bhikkhave, pañca nīvaraṇe pahāya cetaso upakkilese paññāya dubbalīkaraṇe satta bojjhaŋge yathā-bhūtaɱ bhāvethā" ti.|| ||

Mayam pi kho āvuso, sāvakānaɱ evaɱ dhammaɱ desema:|| ||

"Etha tumhe āvuso, pañca nīvaraṇe pahāya cetaso upakkilese paññāya dubbalīkaraṇe, satta bojjhaŋge yathā-bhūtaɱ bhāvethā" ti.|| ||

Idha no āvuso, ko viseso ko adhippāyo.|| ||

Kiɱ nānākaraṇaɱ samaṇassa vā Gotamassa amhākaɱ vā yad idaɱ dhammadesanāya vā dhammadesanaɱ anusāsaniyā vā anusāsanin ti.|| ||

10. Atha kho mayaɱ bhante, tesaɱ aññatitthiyānaɱ paribbājakānaɱ bhāsitaɱ n'eva abhinandimha, na paṭikkosimha.|| ||

Anabhinanditvā appaṭikkositvā uṭṭhāy āsanā pakkamimha.|| ||

"Bhagavato santike etassa bhāsitassa atthaɱ ājānissāmā" ti.|| ||

11. Evaɱ vādino bhikkhave, aññatitthiyā paribbājakā evam assu vacanīyā:|| ||

"Yasmiɱ āvuso, samaye līnaɱ cittaɱ hoti.|| ||

Katamesaɱ tasmiɱ samaye bojjhaŋgānaɱ akālo bhāvanāya. Katamesaɱ tasmiɱ samaye bojjhaŋgānaɱ kālo bhāvanāya:|| ||

Yasmiɱ pan'āvuso samaye uddhataɱ cittaɱ hoti. Katamesaɱ tasmiɱ samaye bojjhaŋgānaɱ akālo bhāvanāya.|| ||

Katamesaɱ tasmiɱ samaye bojjhaŋgānaɱ kālo bhāvanāyā" ti.|| ||

Evaɱ puṭṭhā bhikkhave, aññatitthiyā paribbājakā na c'eva sampāyissanti,||
uttariñ ca vighātaɱ āpajjissanti.|| ||

12. Taɱ kissa hetu?|| ||

Yathā taɱ bhikkhave avisayasmiɱ.|| ||

Nāhaɱ taɱ bhikkhave, passāmi sadevake loke samārake sabrahmake sassamaṇabrāhmaṇiyā pajāya sadeva-manussāya yo imesaɱ pañhānaɱ veyyākaraṇena cittaɱ ārādheyya aññatra Tathāgatena vā Tathāgatasāvakena vā ito vā pana sutvā.|| ||

I. Akālo

13. Yasmiɱ bhikkhave, samaye līnaɱ cittaɱ hoti.|| ||

Akālo tasmiɱ samaye passaddhisambojjhaŋssa bhāvanāya.|| ||

Akālo samādhisambojjhaŋgassa bhāvanāya.|| ||

Akālo upekhāsambojjhaŋgassa bhāvanāya.|| ||

Taɱ kissa hetu?|| ||

Līnaɱ bhikkhave cittaɱ.|| ||

Taɱ etehi dhammehi dussamuṭṭhāpayaɱ hoti.|| ||

14. Seyyathā pi bhikkhave, puriso parittaɱ aggiɱ ujjāletukāmo assa.|| ||

So tattha allāni c'eva tiṇāni pakkhipeyya, allāni ca gomayāni pakkhipeyya,||
allāni c'eva kaṭṭhani pakkhipeyya,||
udakavātañ ca dadeyya,||
paɱsukena ca okireyya,||
bhabbo nu kho so puriso parittaɱ aggiɱ ujjāletuɱ?|| ||

No h'etaɱ bhante.|| ||

Evam eva kho bhikkhave, yasmiɱ samaye līnaɱ cittaɱ hoti.|| ||

Akālo tasmiɱ samaye passaddhisambojjhaŋgassa bhāvanāya.|| ||

Akālo samādhisambojjhaŋgassa bhāvanāya.|| ||

Akālo upekhāsambojjhaŋgassa bhāvanāya.|| ||

Taɱ kissa hetu?|| ||

Līnaɱ bhikkhave cittaɱ.|| ||

Taɱ etehi dhammehi dussamuṭṭhāpayaɱ hoti.|| ||

II. Kālo

15. Yasmiɱ ca kho bhikkhave, samaye līnaɱ cittaɱ hoti.

Kālo tasmiɱ samaye dhammavicayasambojjhaŋgassa bhāvanāya.|| ||

Kālo viriyasambojjhaŋgassa bhāvanāya.|| ||

Kālo pītisambojjhaŋgassa bhāvanāya.|| ||

Taɱ kissa hetu?|| ||

Līnaɱ bhikkhave cittaɱ.|| ||

Taɱ etehi dhammehi susamuṭṭhāpayaɱ hoti.|| ||

16. Seyyathā pi bhikkhave, puriso parittaɱ aggiɱ ujjāletukāmo assa.|| ||

So tattha sukkhāni c'eva tiṇāni pakkhipeyya,||
sukkhāni gomayāni pakkhipeyya,||
sukkhāni kaṭṭhāni pakkhipeyya.|| ||

Mukhavātaɱ ca dadeyya,||
na ca paɱsukena okireyya.|| ||

Bhabbo nu kho so puriso parittaɱ aggiɱ ujjāletun ti.|| ||

Evaɱ bhante.|| ||

Evam eva kho bhikkhave, yasmiɱ samaye līnaɱ cittaɱ hoti.|| ||

Kālo tasmiɱ samaye dhammavicayasambojjhaŋgassa bhāvanāya.|| ||

Kālo viriyasambojjhaŋgassa bhāvanāya.|| ||

Kālo pītisambojjhaŋgassa bhāvanāya.|| ||

Taɱ kissa hetu?|| ||

Līnaɱ bhikkhave cittaɱ.|| ||

Taɱ etehi dhammehi susamuṭṭhāpayaɱ hoti.|| ||

III. Akālo

Yasmiɱ bhikkhave, samaye uddhataɱ cittaɱ hoti.|| ||

Akālo tasmiɱ samaye dhammavicayasambojjhaŋgassa bhāvanāya.|| ||

Akālo viriyasambojjhaŋgassa bhāvanāya.|| ||

Akālo pītisambojjhaŋgassa bhāvanāya.|| ||

Taɱ kissa hetu?|| ||

Uddhataɱ bhikkhave cittaɱ.|| ||

Taɱ etehi dhammehi duvūpasamaɱ hoti.|| ||

18. Seyyathā pi bhikkhave, puriso mahantaɱ aggikkhandhaɱ nibbāpetukāmo assa.|| ||

So tattha sukkhāni c'eva tiṇāni pakkhipeyya, sukkhāni gomayāni pakkhipeyya,||
sukkhāni kaṭṭhāni pakkhipeyya,||
mukhavātañ ca dadeyya,||
na ca paɱsukena okireyya.|| ||

Bhabbo nu kho so puriso mahantaɱ aggikkhandhaɱ nibbāpetun ti?|| ||

No h'etaɱ bhante.|| ||

Evam eva kho bhikkhave, yasmiɱ samaye uddhataɱ cittaɱ hoti.|| ||

Akālo tasmiɱ samaye dhammavicayasambojjhaŋgassa bhāvanāya.|| ||

Akālo viriyasambojjhaŋgassa bhāvanāya.|| ||

Akālo pītisambojjhaŋgassa bhāvanāya.|| ||

Taɱ kissa hetu?|| ||

Uddhataɱ bhikkhave cittaɱ.|| ||

Taɱ etehi dhammehi duvūpasamaɱ hoti.|| ||

IV. Kālo

19. Yasmiɱ ca kho bhikkhave, samaye uddhataɱ cittaɱ hoti.|| ||

Kālo tasmiɱ samaye passaddhisambojjhaŋssa bhāvanāya.|| ||

Kālo samādhisambojjhaŋgassa bhāvanāya.|| ||

Kālo upekhāsambojjhaŋgassa bhāvanāya.|| ||

Taɱ kissa hetu?|| ||

Uddhataɱ bhikkhave cittaɱ.|| ||

Taɱ etehi dhammehi suvūpasamaɱ hoti.|| ||

20. Seyyathā pi bhikkhave, puriso mahantaɱ aggikkhandhaɱ nibbāpetukāmo assa.|| ||

So tattha allāni c'eva tiṇāni pakkhipeyya,||
allāni c'eva gomayāni pakkhipeyya,||
allāni ca kaṭṭhāni pakkhipeyya,||
udakavātañ ca dadeyya.|| ||

Paɱsukena ca okireyya.|| ||

Bhabbo nu kho so puriso parittaɱ aggikkhandhaɱ nibbāpetun ti?|| ||

Evaɱ bhante.

Evam eva kho bhikkhave, yasmiɱ samaye uddhakaɱ cittaɱ hoti.|| ||

Kālo tasmiɱ samaye passaddhisambojjhaŋgassa bhāvanāya.|| ||

Kālo samādhisambojjhaŋgassa bhāvanāya.|| ||

Kālo upekhāsambojjhaŋgassa bhāvanāya.|| ||

Taɱ kissa hetu?|| ||

Uddhakaɱ bhikkhave cittaɱ.|| ||

Taɱ etehi dhammehi suvūpasamaɱ hoti.|| ||

21. Satiɱ khvāhaɱ bhikkhave sabbatthikaɱ vadāmī ti.|| ||

 


Contact:
E-mail
Copyright Statement   Webmaster's Page