Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
5. Mahā-Vagga
47. Sati-Paṭṭhāna Saɱyutta
2. Nālandā Vagga

Sutta 11

Mahā-Purisa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[158]

[1][pts][olds][bodh] Evam me sutaɱ:|| ||

Ekaɱ samayaɱ Bhagavā Sāvatthiyaɱ viharati
Jetavane Anāthapiṇḍikassa ārāme.|| ||

2. Atha kho āyasmā Sāriputto yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Sāriputto Bhagavantaɱ etad avoca:|| ||

3. "'Mahā-puriso mahā-puriso' ti bhante, vuccati.|| ||

Kittāvatā nu kho:||
bhante, 'mahā-puriso' hotī" ti?|| ||

"Vimutta-cittattā kho'haɱ Sāriputta||
'mahā-puriso' ti vadāmi.|| ||

Avimutta-cittttā||
no 'mahā-puriso' ti vadāmi.|| ||

Kathañ ca Sāriputta,||
vimutta-citto hoti?|| ||

4. Idha Sāriputta, bhikkhu kāye kāy'ānupassī viharati||
atāpī sampajāno satimā vineyya loke abhijjhā-domanassaɱ.|| ||

Tassa kāye kāy'ānupassino viharato cittaɱ virajjati,||
vimuccati,||
anupādāya āsavehi.|| ||

Vedanāsu vedan'ānupassī viharati||
atāpī sampajāno satimā vineyya loke abhijjhā-domanassaɱ.|| ||

Tassa vedanāsu vedan'ānupassino viharato cittaɱ virajjati,||
vimuccati,||
anupādāya āsavehi.|| ||

Citte citt'ānupassī viharati||
atāpī sampajāno satimā vineyya loke abhijjhā-domanassaɱ.|| ||

Tassa citte citt'ānupassino viharato cittaɱ virajjati,||
vimuccati,||
anupādāya āsavehi.|| ||

Dhammesu Dhamm'ānupassī viharati||
atāpī sampajāno satimā vineyya loke abhijjhā-domanassaɱ.|| ||

Tassa dhammesu Dhamm'ānupassino viharato cittaɱ virajjati,||
vimuccati,||
anupādāya āsavehi.|| ||

Evaɱ kho Sāriputta, vimutta-citto hoti,||
vimutta-cittttā kho'haɱ Sāriputta,||
'mahā-puriso' ti vadāmi.|| ||

Avimutta-cittttā||
no 'mahā-puriso' ti vadāmī" ti.|| ||

 


Contact:
E-mail
Copyright Statement