Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
47. Satipaṭṭhana Saŋyutta
2. Nālandāvaggo

Sutta 12

Nālandā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayaɱ Bhagavā Nālandāyaɱ viharati Pāvārikambavane.|| ||

Atha kho āyasmā Sāriputto yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Sāriputto Bhagavantaɱ etad avoca:|| ||

"Evaɱ pasanno'haɱ bhante, Bhagavati:|| ||

Na cāhu||
na ca bhavissati,||
na c'etarahi vijjati,||
añño samaṇo vā brāhmaṇo vā||
Bhagavatā bhiyyo'bhiññataro||
yad idaɱ sambodhiyan" ti.|| ||

"Uḷārā kho tyāyaɱ Sāriputta,||
āsabhī vācā bhāsitā,||
ekaɱso gahito,||
sīhanādo nadito:|| ||

'Evaɱ pasanno'haɱ bhante, Bhagavati:|| ||

Na cāhu||
na ca bhavissati,||
na c'etarahi vijjati,||
añño samaṇo vā brāhmaṇo vā||
Bhagavatā bhiyyo'bhiññataro||
yad idaɱ sambodhiyan' ti.|| ||

Kin nu te Sāriputta,||
ye te ahesuɱ atītam addhānaɱ arahanto sammāsambuddhā,||
sabbe te Bhagavanto||
cetasā ceto paricca viditā:|| ||

Evaɱ sīlā te Bhagavanto ahesuɱ iti vā,||
evaɱ dhammā te Bhagavanto ahesuɱ iti vā,||
evaɱ paññā te Bhagavanto ahesuɱ iti vā,||
evaɱ vihārino te Bhagavanto ahesuɱ iti vā,||
evaɱ vimuttā te Bhagavanto ahesuɱ iti vā" ti?|| ||

[160] "No h'etaɱ bhante."|| ||

Kim pana te Sāriputta,||
ye te bhavissanti anāgatam addhānaɱ arahanto sammāsambuddhā,||
sabbe te Bhagavanto||
cetasā ceto paricca viditā:|| ||

Evaɱ sīlā te Bhagavanto bhavissanti iti vā,||
evaɱ dhammā te Bhagavanto bhavissanti iti vā,||
evaɱ paññā te Bhagavanto bhavissanti iti vā,||
evaɱ vihārino te Bhagavanto, bhavissanti iti vā,||
evaɱ vimuttā te Bhagavanto bhavissanti iti vā" ti?|| ||

"No h'etaɱ bhante"|| ||

"Kiɱ pana te Sāriputta, etarahi arahaɱ sammāsambuddho||
cetasā ceto paricca vidito:|| ||

Evaɱ sīlo Bhagavā iti vā,||
evaɱ dhammo Bhagavā iti vā,||
evaɱ pañño Bhagavā iti vā,||
evaɱ vihārī Bhagavā iti vā,||
evaɱ vimutto Bhagavā iti vā" ti?|| ||

"No h'etaɱ bhante."|| ||

"Ettha ca te Sāriputta, atītānāgatapaccupannesu arahantesu sammāsambuddhesu ceto-pariyañāṇaɱ n'atthi.|| ||

Atha kiñ carahi tayā Sāriputta,||
uḷārā āsabhī vācā bhāsitā||
ekaɱso gahito,||
sīhanādo nadito:|| ||

"Evaɱ pasanno'haɱ bhante, Bhagavati:|| ||

Na cāhu||
na ca bhavissati,||
na c'etarahi vijjati,||
añño samaṇo vā brāhmaṇo vā||
Bhagavatā bhiyyo'bhiññataro||
yad idaɱ sambodhiyan" ti.|| ||

"Na kho me bhante, atītānāgatapaccuppannesu arahantesu sammāsambuddhesu ceto-pariyañāṇaɱ atthi.|| ||

Api ca dhammanvayo vidito.|| ||

Syethā pi, bhante, rañño paccantimaɱ nagaraɱ daḷhuddāpaɱ daḷhapākāratoraṇaɱ ekadvāraɱ.|| ||

Tatr'assa dovāriko paṇḍito vyatto medhāvī aññātānaɱ nivāretā,||
ñātānaɱ pavesetā,||
so tassa nagarassa samantā anupariyāya pathaɱ anukkamamāno na passeyya pākārasandhiɱ vā pākāravivaraɱ vā antamaso biḷālanissakkhanamattam pi.|| ||

Tassa evam assa.|| ||

'Ye kho keci olārikā pāṇā imaɱ nagaraɱ pavisanti vā nikkhamanti vā sabbe te iminā va dvārena pavisanti vā nikkhamanti vā' ti.|| ||

Evam eva kho me bhante, dhammanvayo vidito:|| ||

'Ye pi te bhante ahesuɱ atītam addhānaɱ arahanto sammāsambuddhā||
sabbe te Bhagavanto pañca nīvaraṇe pahāya||
cetaso upakkilese paññāya||
dubbalīkaraṇe catusu satipaṭṭhānesu sūpaṭṭhitacittā||
sattabojjhaŋge [161] yathā-bhūtaɱ bhāvetvā||
anuttaraɱ sammāsambodhiɱ abhisambujjhiɱsu.|| ||

Ye pi te bhante bhavissanti anāgatam addhānaɱ arahanto sammāsambuddhā||
sabbe te Bhagavanto pañcanīvaraṇe pahāya||
cetaso upakkilese paññāya||
dubbalīkaraṇe catusu satipaṭṭhānesu sūpaṭṭhitacittā||
sattabojjhaŋge yathā-bhūtaɱ bhāvetvā||
anuttaraɱ sammāsambodhiɱ abhisambujjhissanti.|| ||

Bhagavā pi bhante, etarahi arahaɱ sammāsambuddho pañcanīvaraṇe pahāya||
cetaso upakkilese paññāya||
dubbalīkaraṇe catusu satipaṭṭhānesu sūpaṭṭhitacitto||
sattabojjhaŋge yathā-bhūtaɱ bhāvetvā||
anuttaraɱ sammāsambodhiɱ abhisambuddho" ti.|| ||

"Sādhu sādhu Sāriputta, tasmā ti ha tvaɱ Sāriputta,||
imaɱ dhamma-pariyāyaɱ abhikkhaṇaɱ bhāseyyāsi,||
bhikkhūnaɱ bhikkhunīnaɱ upāsakānaɱ upāsikānaɱ.|| ||

Yesam pi hi Sāriputta, moghapurisānaɱ bhavissati Tathāgate kaŋkhā vā vimati vā tesam pimaɱ dhamma-pariyāyaɱ sutvā yā Tathāgate kaŋkhā vā vimati vā sā pahīyissatī" ti.|| ||

 


Contact:
E-mail
Copyright Statement   Webmaster's Page