Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya,
V: Mahā-Vagga
47. Satipaṭṭhana Saɱyutta
2. Nālandā Vagga

Sutta 13

Cunda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh][than][nypo] Evam me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Tena kho pana samayen'āyasmā Sāriputto Magadhesu viharati Nālagāmake.|| ||

Ābādhiko dukkhito bāḷha-gilāno.|| ||

Cundo ca samaṇ'uddeso āyasmato Sāriputtassa upaṭṭhāko hoti.|| ||

Atha kho āyasmā Sāriputto tena ābādhena parinibbāyi.|| ||

Atha kho Cundo samaṇ'uddeso āyasmato Sāriputtassa patta-cīvaraɱ ādāya yena Sāvatthi Jetavanaɱ Anāthapiṇḍikassa ārāmo yen'āyasmā Ānando ten'upasankami.|| ||

Upasaŋkamitvā āyasmantaɱ Ānandaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Cundo samaṇ'uddeso [162] āyasmantaɱ Ānandaɱ etad avoca:|| ||

"Āyasmā bhante, Sāriputto parinibbuto.|| ||

Idam assa patta-cīvaran" ti.|| ||

Atthi kho idaɱ āvuso kathā-pābhataɱ Bhagavantaɱ dassanāya.|| ||

Āyām āvuso Cunda, yena Bhagavā ten'upasankamissāma.|| ||

Upasaŋkamitvā Bhagavato etam atthaɱ ārocessāmāti.|| ||

"Evaɱ bhante" ti kho Cundo samaṇ'uddeso āyasmato Ānandassa paccassosi.|| ||

Atha kho āyasmā ca Ānando Cundo ca samaṇuddoso yena Bhagavā ten'upasankamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinno kho āyasmā Ānando Bhagavantaɱ etad avoca:|| ||

"Ayaɱ bhante, Cundo samaṇ'uddeso evam āha.|| ||

'Āyasmā bhante, Sāriputto parinibbuto.|| ||

Idam assa patta-cīvaran' ti.|| ||

Api ca me bhante, madhura-kajāto viya kāyo.|| ||

Disā pi me na pakkhāyanti.|| ||

Dhammā pi me na paṭibhanti.|| ||

'Āyasmā Sāriputto parinibbuto' ti sutvā" ti.|| ||

"Kin nu te Ānanda, Sāriputto||
sīla-k-khandhaɱ vā ādāya parinibbuto,||
samādhi-k-khandhaɱ vā ādāya parinibbuto,||
paññā-k-khandhaɱ vā ādāya parinibbuto,||
vimutti-k-khandhaɱ vā ādāya parinibbuto,||
vimutti-ñāṇa-dassana-k-khandhaɱ vā ādāya parinibbuto" ti?|| ||

"Na ca kho me tam bhante Āyasmā Sāriputto||
sīla-k-khandhaɱ vā ādāya parinibbuto,||
samādhi-k-khandhaɱ vā ādāya parinibbuto,||
paññā-k-khandhaɱ vā ādāya parinibbuto,||
vimutti-k-khandhaɱ vā ādāya parinibbuto,||
vimutti-ñāṇa-dassana-k-khandhaɱ vā ādāya parinibbuto.|| ||

Api ca me bhante, āyasmā Sāriputto ovādako ahosi,||
viññapako sandassako||
samādapako||
samuttejako||
sampahaɱsako||
akilāsu dhamma-desanāya,||
anuggāhako sabrahma-cārīnaɱ.|| ||

Taɱ mayaɱ āyasmato Sāriputtassa dhammojaɱ||
dhammabhogaɱ||
dhammānuggahaɱ anussarāmā" ti.|| ||

"Nanu taɱ Ānanda, mayā paṭigacc'eva akkhātaɱ:|| ||

'Sabbehi piyehi||
manāpehi||
nānābhāvo||
vinābhāvo||
aññathā- [163] bhāvo,||
taɱ kut'ettha Ānanda, labbhā.|| ||

Yaɱ taɱ jātaɱ||
bhūtaɱ||
saŋkhataɱ||
paloka-dhammaɱ||
taɱ vata mā palujjīti,||
n'etaɱ ṭhānaɱ vijjti.|| ||

Seyyathā pi Ānanda, mahato rukkhassa tiṭṭhato sāravato||
yo mahantataro khandho so palujjeyya.|| ||

Evam eva kho Ānanda, mahato bhikkhu-sanghassa tiṭṭhato sāravato Sāriputto parinibbuto,||
taɱ kut'ettha Ānanda, labbhā||
yaɱ taɱ jātaɱ||
bhūtaɱ||
saŋkhataɱ||
paloka-dhammaɱ||
taɱ vata mā palujjīti,||
n'etaɱ ṭhānaɱ vijjati.|| ||

Tasmā ti h'Ānanda, atta-dīpā viharatha,||
atta-saraṇā||
anañña-saraṇā||
dhamma-dīpā||
dhamma-saraṇā||
anañña-saraṇā.|| ||

Kathañ c'Ānanda, bhikkhu atta-dīpo viharati atta-saraṇo anañña-saraṇo||
Dhamma-dīpo dhamma-saraṇo anañña-saraṇā?|| ||

Idh'Ānanda, bhikkhu kāye kāy'ānupassī viharati,||
ātāpī||
sampajāno||
satimā||
vineyya loke abhijjhā-domanassaɱ.|| ||

Vedanāsu vedan'ānupassī viharati,||
ātāpī||
sampajāno||
satimā||
vineyya loke abhijjhā-domanassaɱ.|| ||

Citte citt'ānupassī viharati,||
ātāpī||
sampajāno||
satimā||
vineyya loke abhijjhā-domanassaɱ.|| ||

Dhammesu Dhamm'ānupassī viharati,||
ātāpī||
sampajāno||
satimā||
vineyya loke abhijjhā-domanassaɱ.|| ||

Evaɱ kho Ānanda, bhikkhu atta-dīpo viharati||
atta-saraṇo||
anañña-saraṇo||
dhamma-dīpo||
dhamma-saraṇo||
anañña-saraṇo.|| ||

Ye hi keci Ānanda, etarahi vā mam'accaye vā atta-dīpā viharissantī||
atta-saraṇā||
anañña-saraṇā||
dhamma-dīpā||
dhamma-saraṇā||
anañña-saraṇā.|| ||

Tama-t-agge p'ete Ānanda, bhikkhu bhavissanti||
ye keci sikkhākāmā" ti.|| ||

 


Contact:
E-mail
Copyright Statement