Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya,
V: Mahā-Vagga
47. Satipaṭṭhana Saɱyutta
2. Nālandā Vagga

Sutta 15

Bāhiya (or Bāhika) Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayam Bhagavā Sāvatthiyaɱ viharati Jetavane Anāthapindikassa ārāme.|| ||

Atha kho āyasmā Bāhiyo yena Bhagavā ten'upasankami|| ||

Upasaŋkamitvā Bhagavanataɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Bāhiyo Bhagavantaɱ etad avoca:|| ||

"Sādhu me bhante Bhagavā saŋkhittena dhammaɱ desetu.|| ||

Yam ahaɱ Bhagavato dhammaɱ sutvā||
eko||
vūpakaṭṭho||
appamatto||
ātāpī||
pahit'atto vihareyyan" ti.|| ||

"Tasmā ti ha tvaɱ Bāhiya,||
ādimeva visodhehi kusalesu dhammesu.|| ||

Kocādi kusalānaɱ dhammānaɱ?|| ||

Sīlañ ca suvisuddhaɱ,||
diṭṭhi ca ujukā.|| ||

Yato kho te Bāhiya, sīlañ ca suvisuddhaɱ bhavissati,||
diṭṭhi ca ujukā.|| ||

Tato tvaɱ Bāhiya, sīlaɱ nissāya||
sīle patiṭṭhāya||
cattāro sati-paṭṭhāne bhāveyyāsi.|| ||

Katame cattāro?|| ||

Idha Bāhiya, bhikkhu kāye kāy'ānupassī viharati||
ātāpī||
sampajāno||
satimā||
vineyya loke abhijjhā-domanassaɱ.|| ||

Vedanāsu vedan'ānupassī viharati.|| ||

Ātāpī||
sampajāno||
satimā||
vineyya loke abhijjhā-domanassaɱ.|| ||

Citte citt'ānupassī viharati||
ātāpī||
sampajāno||
satimā||
vineyya loke abhijjhā-domanassaɱ.|| ||

Dhammesu Dhamm'ānupassī viharati||
ātāpī||
sampajāno||
satimā||
vineyya loke abhijjhā-domanassaɱ.|| ||

Yato kho tvaɱ Bāhiya, sīlaɱ nissāya||
sīle patiṭṭhāya||
ime cattāro sati-paṭṭhāne||
evaɱ bhāvessasi||
tato tuyhaɱ bāhiya,||
yā ratti vā divaso vā||
āgamissati vuddhi yeva pāṭikaŋkhā kusalesu dhammesu,||
no parihānī" ti.|| ||

[166] Atha kho āyasmā Bāhiyo Bhagavato bhāsitaɱ abhinan'ditvā anumo-ditvā uṭṭhāy āsanā Bhagavantaɱ abhivādetvā padakkhiṇaɱ katvā pakkāmi.|| ||

Atha kho āyasmā Bāhiyo eko vūpakaṭṭho appamatto ātāpī pahit'atto viharanto na cirass'eva yass'atthāya kuputtā samma'd'eva agārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

'Khīṇā jāti,||
vusitaɱ Brahma-cariyaɱ,||
kataɱ karaṇīyaɱ,||
nāparaɱ itthattāyā' ti abbhaññāsi.|| ||

Aññataro ca pan'āyasmā Bāhiyo arahataɱ ahosī.|| ||

 


Contact:
E-mail
Copyright Statement