Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya,
V: Mahā-Vagga
47. Satipaṭṭhana Saɱyutta
2. Nālandā Vagga

Sutta 19

Sedaka (or Ekantaka) Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evam me sutaɱ:|| ||

Ekaɱ samayaɱ Bhagavā Sumhesu viharati Sedakaɱ nāma Sumbhānaɱ nigamo.|| ||

Tatra kho Bhagavā bhikkhū āmantesi:|| ||

"Bhūta-pubbaɱ bhikkhave, caṇḍāla-vaŋsiko caṇḍāla-vaŋsaɱ ussāpetvā Medakathālikaɱ antevāsiɱ āmantesi:|| ||

"Ehi tvaɱ samma Medakathālike, caṇḍāla-vaŋsaɱ abhirūhitvā mama upari-k-khandhe tiṭṭhāhī" ti.|| ||

Evaɱ ācariyāti kho bhikkhave, Medakathālikā antevāsī caṇḍāla-vaŋsikassa paṭissutvā caṇḍāla-vaŋsaɱ abhirūhitvā ācariyassa upari-k-khandhe aṭṭhāsi.|| ||

Atha kho bhikkhave, caṇḍāla-vaŋsiko Medakathālikaɱ antevāsiɱ etad avoca:|| ||

"Tvaɱ samma Medakathālike, mamaɱ rakkha||
ahaɱ tvaɱ rakkhissāmi||
evaɱ mayaɱ [169] añña-mañña-guttā añña-mañña-rakkhitā sippāni c'eva dassessāma, lābhe ca lacchāma,||
sotthinā ca caṇḍāla-vaŋsā orohissāmā" ti.|| ||

Evaɱ vutte bhikkhave, Medakathālikā antevāsī caṇḍāla-vaŋsikaɱ etad avoca:|| ||

"Na kho pan'etaɱ ācariya,||
evaɱ bhavissati.|| ||

Tvaɱ ācariya,||
attānaɱ rakkha,||
ahaɱ attānaɱ rakkhissāmi.|| ||

Evaɱ mayaɱ attaguttā attarakkhitā sippāni c'eva dassessāma,||
lābhañ ca lacchāma,||
sotthinā ca caṇḍāla-vaŋsā orohessāmā.|| ||

So tattha ñāyo" ti|| ||

Bhagavā avoca:|| ||

"Yathā Medakathālikā antevāsī ācariyaɱ avoca.|| ||

Attānaɱ bhikkhave, 'rakkhissāmī' ti sati-paṭṭhānaɱ sevitabbaɱ.|| ||

Paraɱ 'rakkhissāmī' ti sati-paṭṭhānaɱ sevitabbaɱ.|| ||

Attānaɱ bhikkhave, rakkhanto paraɱ rakkhati.|| ||

Paraɱ rakkhanto attānaɱ rakkhati.|| ||

Kathañ ca bhikkhave, attānaɱ rakkhanto paraɱ rakkhati?|| ||

Āsevanāya||
bhāvanāya||
bahulī-kammena.|| ||

Evaɱ kho bhikkhave, attānaɱ rakkhanto paraɱ rakkhati.|| ||

Kathañ ca bhikkhave, paraɱ rakkhanto attānaɱ rakkhati?|| ||

Khantiyā avihiɱsāya||
mettatāya||
anuddayatāya.|| ||

Evaɱ kho bhikkhave, paraɱ rakkhanto attānaɱ rakkhati.|| ||

Attānaɱ bhikkhave, 'rakkhissāmī' ti sati-paṭṭhānaɱ sevitabbaɱ.|| ||

Paraɱ 'rakkhissāmī' ti sati-paṭṭhānaɱ sevitabbaɱ,||
attānaɱ bhikkhave rakkhanto paraɱ rakkhati.|| ||

Paraɱ rakkhanto attānaɱ rakkhatī" ti.|| ||

 


Contact:
E-mail
Copyright Statement