Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya,
V: Mahā-Vagga
47. Satipaṭṭhana Saɱyutta
2. Nālandā Vagga

Sutta 20

Janapadakalyāṇī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evam me sutaɱ:|| ||

Ekaɱ samayaɱ Bhagavā Sumhesu viharati Sedakaɱ nāma Sumhānaɱ nigamo.|| ||

[170] Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Seyyathā pi bhikkhave,||
jana-pada-kalyāṇī jana-pada-kalyāṇī||
kho bhikkhave, mahā-jana-kāyo sannipateyya.|| ||

Sā kho pan'assa jana-pada-kalyāṇī paramapāsāvinī nacce,||
paramapāsāvinī gīte.|| ||

'Janapadakalyāṇī naccati gāyatī' ti kho bhikkhave, bhiyosomattāya mahā-janakāyo santipateyya.|| ||

Atha puriso āgaccheyya jīvitukāmo amaritukāmo sukha-kāmo dukkha-paṭikkūlo||
tam enaɱ evaɱ vadeyyuɱ:|| ||

'Ayaɱ te ambho purisa,||
samatittiko telapatto antarena ca mahāsamajjaɱ antarena ca jana-pada-kalyāṇiɱ parihātabbo,||
puriso ca te ukkhittā-siko||
piṭṭhito piṭṭhito||
anubandhi'ssati yatth'eva naɱ thokam pi chaḍḍessati tatth'eva te siro pātessatī' ti.|| ||

Taɱ kiɱ maññatha bhikkhave?|| ||

Api nu so puriso amuɱ telapattaɱ amana-sikaritvā bahiddhā pamādaɱ āhareyyā" ti?|| ||

"No h'etaɱ bhante."|| ||

"Upamā kho myāyaɱ bhikkhave, katā atthassa viññāpanāya.|| ||

Ayaɱ c'ev'ettha attho:|| ||

'Samatittiko telapatto' ti kho bhikkhave, kāya-gatāya etaɱ satiyā adhivacanaɱ.|| ||

Tasmā ti ha bhikkhave, evaɱ sikkhitabbaɱ:|| ||

'Kāyagatā no sati bhāvitā bhavissati bahulī-katā yānī-katā vatthu-katā anuṭṭhitā paricitā susamāraddhā' ti.|| ||

Evaɱ hi vo bhikkhave, sikkhitabban" ti.|| ||

 

Nālandavaggo dutiyo

 


Contact:
E-mail
Copyright Statement