Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
5. Mahā-Vagga
47. Sati-Paṭṭhāna Saɱyutta
3. Sīla-ṭ-Ṭhiti Vagga

Sutta 30

Mānadiṇṇa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[178]

[1][pts][bodh] Evam me sutaɱ:|| ||

Ekaɱ samayaɱ āyasmā Rājagahe viharati Veḷuvane Kalandakanivāpe.|| ||

Tena kho pana samayena Mānadiṇṇo gahapati ābādhiko hoti dukkhito bāḷha-gilāno.|| ||

Atha kho Mānadiṇṇo gahapati aññataraɱ purisaŋ āmantesi:|| ||

"Ehi tvaɱ ambho purisa,||
yenāsmato Ānando ten'upasankama,||
upasankamitvā mama vacanena āyasmato Ānandassa pāde sirasā vanda,|| ||

'Mānadiṇṇo bhante Ānandassa pāde sirasā vandatī' ti.|| ||

Evañ ca vadehi:|| ||

'Sādhu kira bhante,||
āyasmā Ānando yena ca Mānadiṇṇassa gahapatino nivesanaɱ||
ten'upasankamatu||
anukampaɱ upādāyā'" ti.|| ||

"Evaɱ bhante" ti kho so puriso Mānadiṇṇassa gahapatissa paṭi-s-sutvā yen'āyasmā Ānando ten'upasankami.|| ||

Upasaŋkamitvā āyasmantaɱ Ānandaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so puriso āyasmantaɱ Ānandaɱ etad avoca:|| ||

"Mānadiṇṇo bhante, gahapati ābādhiko dukkhito bāḷha-gilāno,||
so āyasmato Ānandassa pāde sirasā vandati,||
evañ ca vadeti:|| ||

'Sādhu kira bhante,||
āyasmā Ānando yena Mānadiṇṇassa gahapatissa nivesanaɱ,||
ten'upasankamatu,||
anukampaɱ upādāyā'" ti.|| ||

Adhivāsesi kho āyasmā Ānando tuṇhī-bhāvena.|| ||

Atha kho āyasmā Ānando pubbaṇha-samayaɱ nivāsetvā patta-cīvaram ādāya yena Mānadiṇṇassa gahapatissa nivesanaɱ ten'upasankami.|| ||

Upasaŋkamitvā paññatena āsane nisīdi.|| ||

Nisajja kho āyasmā Ānando Mānadiṇṇaɱ gahapatiɱ etad avoca:|| ||

"Kacci te gahapati khamanīyaɱ,||
kacci yāpanīyaɱ,||
kacci dukkhā vedanā paṭi-k-kamanti||
no abhi-k-kamanti,||
paṭikkamosānaɱ paññāyati||
no abhi-k-kamo" ti?|| ||

"Na me bhante khamanīyaɱ,||
na yāpanīyaɱ bāḷhā me dukkhā vedanā abhi-k-kamanti||
no paṭi-k-kamanti,||
abhi-k-kam'osānaɱ paññāyati||
no paṭikkamo" ti.|| ||

"Tasmā'ti ha te gahapati,||
evaɱ sikkhitabbaɱ:|| ||

'Kāye kāy'ānupassī viharissāmi||
ātāpī sampajāno satimā||
vineyya loke abhijjhā-domanassaɱ.|| ||

Vedanāsu vedan'ānupassī viharissāmi||
ātāpī sampajāno satimā||
vineyya loke abhijjhā-domanassaɱ.|| ||

Citte citt'ānupassī viharissāmi||
ātāpī sampajāno satimā||
vineyya loke abhijjhā-domanassaɱ.|| ||

Dhammesu Dhamm'ānupassī viharissāmi||
ātāpī sampajāno satimā||
vineyya loke abhijjhā-domanassaɱ.|| ||

Evaɱ hi te gahapati sikkhitabban" ti.|| ||

"Ye'me bhante, Bhagavatā cattāro sati-paṭṭhānā desitā,||
saŋvijjanti te dhammā mayi.|| ||

Ahañ ca tesu dhammesu sandissāmi.|| ||

Ahaɱ bhante, kāye kāy'ānupassī viharāmi||
ātāpī sampajāno satimā||
vineyya loke abhijjhā-domanassaɱ.|| ||

Vedanāsu vedan'ānupassī viharāmi||
ātāpī sampajāno satimā||
vineyya loke abhijjhā-domanassaɱ.|| ||

Citte citt'ānupassī viharāmi||
ātāpī sampajāno satimā||
vineyya loke abhijjhā-domanassaɱ.|| ||

Dhammesu Dhamm'ānupassī viharāmi||
ātāpī sampajāno satimā||
vineyya loke abhijjhā-domanassaɱ.|| ||

Yāni c'imāni bhante, Bhagavatā pañc'ora-m-bhāgiyāni saŋyojanāni desitāni,||
n-ā-haɱ tesaŋ kiñci attani a-p-pahīnaɱ samanupassāmī" ti.|| ||

"Lābhā te gahapati,||
su-laddhaɱ te gahapati,||
Anāgāmi-phalaɱ tayā gahapati,||
vyākatantī" ti.|| ||

 


Contact:
E-mail
Copyright Statement