Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
47. Satipaṭṭhana Saŋyutta
5. Amata-Vagga

Sutta 43

Magga Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

2. Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Ekam idāhaɱ bhikkhave, samayaɱ Uruvelāyaɱ viharāmi,||
najjā Nerañjarāya tīre Ajapālanigrodhe paṭhamābhi-sammuddho.|| ||

Tassa mayhaɱ bhikkhave, rahogatassa patisallīnassa evaɱ cetaso parivitakko udapādi:|| ||

"Ekāyano'yaɱ maggo sattānaɱ visuddhiyā||
sokapariddavānaɱ||
samatikkamāya||
dukkhadomanassānaɱ attha-gamāya||
ñāyassa adhigamāya||
nibbānassa sacchikiriyāya||
yad idaɱ cattāro satipaṭṭhānā.|| ||

Katame cattāro?|| ||

Kāye vā bhikkhu kāye kāyānupassī vihareyya||
ātāpī||
sampajāno||
satimā||
vineyya loke abhijjhādomanassaɱ.|| ||

Vedanāsu vā bhikkhu vedanānupassī vihareyya||
ātāpī||
sampajāno||
satimā||
vineyya loke abhijjhādomanassaɱ.|| ||

Citte vā bhikkhu cittānupassī vihareyya||
ātāpī||
sampajāno||
satimā||
vineyya loke abhijjhādomanassaɱ.|| ||

Dhammesu vā bhikkhu dhammānupassī vihareyya||
ātāpī||
sampajāno||
satimā||
vineyya loke abhijjhādomanassaɱ.|| ||

"Ekāyano'yaɱ maggo sattānaɱ visuddhiyā||
sokapariddavānaɱ||
samatikkamāya||
dukkhadomanassānaɱ attha-gamāya||
ñāyassa adhigamāya||
nibbānassa sacchikiriyāya||
yad idaɱ cattāro satipaṭṭhānā.|| ||

 


 

Atha kho bhikkhave, Brahmā Sahampati||
mama cetasā ceto parivitakkamaññāya||
seyyathā pi nāma balavā puriso sammiñjitaɱ vā bāhaɱ pasāreyya,||
pasāritaɱ vā bāhaɱ sammiñjeyya.|| ||

Evam evaɱ brahmaloke antarahito mama purato pāturahosi.|| ||

Atha kho bhikkhave, Brahmā Sahampati ekaɱsaŋ uttarāsaŋgaɱ karitvā yenāhaɱ tenañjaliɱ panāmetvā maɱ etad avoca:|| ||

'Evam etaɱ Bhagavā,||
evam etaɱ sugata,||
ekāyano'yaɱ maggo sattānaɱ visuddhiyā||
sokapariddavānaɱ||
samatikkamāya||
dukkhadomanassānaɱ attha-gamāya||
ñāyassa adhigamāya||
nibbānassa sacchikiriyāya||
yad idaɱ [186] cattāro satipaṭṭhānā.|| ||

Katame cattāro?|| ||

Kāye vā bhikkhu kāye kāyānupassī vihareyya||
ātāpī||
sampajāno||
satimā||
vineyya loke abhijjhādomanassaɱ.|| ||

Vedanāsu vā bhikkhu vedanānupassī vihareyya||
ātāpī||
sampajāno||
satimā||
vineyya loke abhijjhādomanassaɱ.|| ||

Citte vā bhikkhu cittānupassī vihareyya||
ātāpī||
sampajāno||
satimā||
vineyya loke abhijjhādomanassaɱ.|| ||

Dhammesu vā bhikkhu dhammānupassī vihareyya||
ātāpī||
sampajāno||
satimā||
vineyya loke abhijjhādomanassaɱ.|| ||

"Ekāyano'yaɱ maggo sattānaɱ visuddhiyā||
sokapariddavānaɱ||
samatikkamāya||
dukkhadomanassānaɱ attha-gamāya||
ñāyassa adhigamāya||
nibbānassa sacchikiriyāya||
yad idaɱ cattāro satipaṭṭhānā' ti.

Idam avoca Bhikkhave Brahmā Sahampati.|| ||

Idaɱ vatvā athāparaɱ etad avoca:|| ||

'Ekāyanaɱ jātikhayantadassī||
Maggaɱ pajānāti hitānukampī||
Etena maggena ataɱsu pubbe||
Tarissanti ye ca taranti oghan' ti" ti.|| ||

 


Contact:
E-mail
Copyright Statement   Webmaster's Page