Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
48. Indriya Saŋyutta
I. Suddhika-vaggo

Sutta 7

Dutiya Samaṇabrāhmaṇā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayam Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuɱ.|| ||

Bhagavā etad avoca:|| ||

"Pañcimāni bhikkhave, indriyāni.|| ||

Katamāni pañca?|| ||

Saddhindriyaɱ,||
viriyindriyaɱ,||
satindriyaɱ,||
samādhindriyaɱ,||
paññindriyaɱ.|| ||

Imāni kho bhikkhave, pañca indriyānī.|| ||

Ye hi keci, bhikkhave, samaṇā vā brāhmaṇā vā||
saddhindriyaɱ nappajānanti,||
saddhindriya-samudayaɱ nappajānanti,||
saddhindriya-nirodhaɱ nappajānanti,||
saddhindriya-nirodha-gāminī-paṭipadaɱ nappajānanti;|| ||

viriyindriyaɱ nappajānanti,||
viriyindriya-samudayaɱ nappajānanti,||
viriyindriya-nirodhaɱ nappajānanti,||
viriyindriya-nirodha-gāminī-paṭipadaɱ nappajānanti;|| ||

satindriyaɱ nappajānanti,||
Satindriya-samudayaɱ nappajānanti,||
satindriya-nirodhaɱ nappajānanti,||
satindriya-nirodha-gāminī-paṭipadaɱ nappajānanti;|| ||

samādhindriyaɱ nappajānanti,||
samādhindriya-samudayaɱ nappajānanti,||
samādhindriya-nirodhaɱ nappajānanti,||
samādhindriya-nirodha-gāminī-paṭipadaɱ nappajānanti;|| ||

paññindriyaɱ nappajānanti,||
paññindriya-samudayaɱ nappajānanti,||
paññindriya-nirodhaɱ nappajānanti,||
paññindriya-nirodha-gāminī-paṭipadaɱ nappajānanti;|| ||

namete bhikkhave, samaṇā vā brāhmaṇā vā||
samaṇesu vā samaṇa-sammatā||
brāhmaṇesu vā brāhmaṇa-sammatā||
na ca pana te āyasmanto sāmaññatthaɱ vā brahmaññatthaɱ vā||
diṭṭhe va dhamme sayaɱ abhiññāsacchi-katvā upasampajja viharanti.|| ||

Ye ca kho keci bhikkhave, samaṇā vā brāhmaṇā vā||
saddhindriyaɱ pajānanti,||
saddhindriya-samudayaɱ pajānanti,||
saddhindriya-nirodhaɱ pajānanti,||
saddhindriya-nirodha-gāminī-paṭipadaɱ pajānanti;|| ||

viriyindriyaɱ pajānanti,||
viriyindriya-samudayaɱ pajānanti,||
viriyindriya-nirodhaɱ pajānanti,||
viriyindriya-nirodha-gāminī-paṭipadaɱ pajānanti;|| ||

satindriyaɱ pajānanti,||
Satindriya-samudayaɱ pajānanti,||
satindriya-nirodhaɱ pajānanti,||
satindriya-nirodha-gāminī-paṭipadaɱ pajānanti;|| ||

samādhindriyaɱ pajānanti,||
samādhindriya-samudayaɱ pajānanti,||
samādhindriya-nirodhaɱ pajānanti,||
samādhindriya-nirodha-gāminī-paṭipadaɱ pajānanti;|| ||

[196] paññindriyaɱ pajānanti,||
paññindriya-samudayaɱ pajānanti,||
paññindriya-nirodhaɱ pajānanti,||
paññindriya-nirodha-gāminī-paṭipadaɱ pajānanti;|| ||

te kho'me bhikkhave, samaṇā vā brāhmaṇā vā||
samaṇesu ceva samaṇa-sammatā||
brāhmaṇesu ca brāhmaṇa-sammatā||
te ca panāyasmanto sāmaññatthañ ca brahmaññatthañ ca||
diṭṭhe va dhamme sayaɱ abhiññāsacchi-katvā upasampajja viharantī" ti.|| ||


Contact:
E-mail
Copyright Statement   Webmaster's Page