Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
48. Indriya Saŋyutta
I. Suddhika-vaggo

Sutta 9

Paṭhama Vibhaŋga Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayam Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuɱ.|| ||

Bhagavā etad avoca:|| ||

"Pañcimāni bhikkhave, indriyāni.|| ||

Katamāni pañca?|| ||

Saddhindriyaɱ,||
viriyindriyaɱ,||
satindriyaɱ,||
samādhindriyaɱ,||
paññindriyaɱ.|| ||

Katamañ ca bhikkhave, saddhindriyaɱ?|| ||

Idha bhikkhave, ariyasāvako saddho hoti.|| ||

Saddahati Tathāgatassa [197] bodhiɱ:|| ||

"Iti pi so Bhagavā arahaɱ||
sammāsambuddho||
vijjācaraṇa-sampanno||
sugato||
lokavidū||
anuttaro purisa-damma-sārathī||
satthā deva-manussānaɱ||
buddho||
Bhagavā" ti.|| ||

Idaɱ vuccati bhikkhave, saddhindriyaɱ.|| ||

Katamañ ca bhikkhave viriyindriyaɱ?|| ||

Idha bhikkhave, ariyasāvako āraddhaviriyo viharati.|| ||

Akusalānaɱ dhammānaɱ pahānāya,||
kusalānaɱ dhammānaɱ upasampadāya||
thāmavā daḷhaparakkamo anikkhittadhuro kusalesu dhammesu.|| ||

Idaɱ vuccati bhikkhave, viriyindriyaɱ.|| ||

Katamañ ca bhikkhave, satindriyaɱ?|| ||

Idha bhikkhave, ariyasāvako satimā hoti||
paramena satinepakkena samannāgato||
cirakatam pi||
cirabhāsitam pi||
saritā anussaritā.|| ||

Idaɱ vuccati bhikkhave, satindriyaɱ.|| ||

Katamañ ca bhikkhave, samādhindriyaɱ?|| ||

Idha bhikkhave, ariyasāvako vossaggārammaṇaɱ karitvā labhati samādhiɱ,||
labhati cittassa ekaggataɱ.|| ||

Idaɱ vuccati bhikkhave samādhindriyaɱ.|| ||

Katamañ ca bhikkhave paññindriyaɱ?|| ||

Idha bhikkhave, ariyasāvako paññavā hoti udayatthagāminiyā paññāya samannāgato,||
ariyāya nibbedhikāya sammādukkhakkhayagāminiyā.|| ||

Idaɱ vuccati bhikkhave paññindriyaɱ.|| ||

Imāni kho bhikkhave, pañcindriyānī" ti.|| ||


Contact:
E-mail
Copyright Statement   Webmaster's Page