Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
5. Mahā-Vagga
48. Indriya Saɱyutta
1. Suddhika Vagga

Sutta 10

Dutiya Vibhaŋga Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[197]

[1][pts][than] Evam me sutaɱ:|| ||

Ekaɱ samayam Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuɱ.|| ||

Bhagavā etad avoca:|| ||

"Pañc'imāni bhikkhave, indriyāni.|| ||

Katamāni pañca?|| ||

Saddh'indriyaɱ,||
viriy'indriyaɱ,||
sat'indriyaɱ,||
samādh'indriyaɱ,||
paññ'indriyaɱ.|| ||

 

§

 

Katamañ ca bhikkhave, saddh'indriyaɱ?|| ||

Idha bhikkhave, ariya-sāvako saddho hoti,||
sadda-hati Tathāgatassa bodhiɱ:|| ||

"Iti pi so Bhagavā||
arahaɱ||
Sammā Sambuddho||
vijjā-caraṇa-sampanno||
Sugato||
loka-vidū anuttaro||
purisa-damma-sārathī||
Satthā deva-manussānaɱ||
Buddho||
Bhagavā" ti.|| ||

Idaɱ vuccati bhikkhave, saddh'indriyaɱ.|| ||

[198] Katamañ ca bhikkhave viriy'indriyaɱ?|| ||

Idha bhikkhave, ariya-sāvako āraddha-viriyo viharati,||
akusalānaɱ dhammānaɱ pahānāya,||
kusalānaɱ dhammānaɱ upasampadāya thāmavā daḷha-parakkamo anikkhitta-dhuro kusalesu dhammesu.|| ||

So anuppannānaɱ pāpakānaɱ akusalānaɱ dhammānaɱ anuppādāya chandaɱ janeti vāyamati ārabhati cittaɱ paggaṇhāti padahati.|| ||

Uppannānaɱ pāpakānaɱ akusalānaɱ dhammānaɱ pahānāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Anuppannānaɱ kusalānaɱ dhammānaɱ uppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ kusalānaɱ dhammānaɱ ṭhitiyā asammosāya bhīyyobhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Idaɱ vuccati bhikkhave, viriy'indriyaɱ.|| ||

Katamañ ca bhikkhave, sat'indriyaɱ?|| ||

Idha bhikkhave, ariya-sāvako satimā hoti||
paramena sati-nepakkena sannāgato cira-katam pi cira-bhāsitam pi saritā anussaritā.|| ||

So kāye kāy'ānupassī viharati||
ātāpī sampajāno satimā||
vineyya loke abhijjhā-domanassaɱ.|| ||

Vedanāsu vedan'ānupassī viharati||
ātāpī sampajāno satimā||
vineyya loke abhijjhā-domanassaɱ.|| ||

Citte citt'ānupassī viharati||
ātāpī sampajāno satimā||
vineyya loke abhijjhā-domanassaɱ.|| ||

Dhammesu Dhamm'ānupassī viharati||
ātāpī sampajāno satimā||
vineyya loke abhijjhā-domanassaɱ.|| ||

Idaɱ vuccati bhikkhave, sat'indriyaɱ.|| ||

Katamañ ca bhikkhave, samādh'indriyaɱ?|| ||

Idha bhikkhave, ariya-sāvako vossagg'ārammaṇaɱ karitvā labhati samādhiɱ,||
labhati cittassek'aggataɱ.|| ||

So vivicc'eva kāmehi||
vivicca akusalehi dhammehi||
sa-vitakkaɱ||
sa-vicāraɱ||
vikkejaɱ pīti-sukhaɱ||
paṭhamaɱ-jhānaɱ upasampajja viharati.|| ||

Vitakka-vicāranaɱ vūpasamā||
ajjhattaɱ sampasādanaɱ||
cetaso ekodi-bhāvaɱ||
avitakkaɱ||
avicāraɱ||
samādhi-jaɱ pīti-sukhaɱ||
dutiyaɱ-jhānaɱ upasampajja viharati.|| ||

Pītiyā ca virāgā||
upekkhako ca viharati||
sato ca sampajāno||
sukhaɱ ca kāyena paṭisaŋvedeti||
yan taɱ ariyā ācikkhanti||
'Upekkhako satimā sukha-vihārī' ti||
taɱ tatiyaɱ-jhānaɱ upasampajja viharati.|| ||

Sukhassa ca pahānā||
dukkhassa ca pahānā||
pubb'eva somanassa-domanassānaɱ attha-gamā||
adukkha-ɱ-asukhaɱ||
upekhāsati-pārisuddhiɱ||
catutthaɱ-jhānaɱ upasampajja viharati.|| ||

Idaɱ vuccati bhikkhave samādh'indriyaɱ.|| ||

[199] Katamañ ca bhikkhave paññ'indriyaɱ?|| ||

Idha bhikkhave, ariya-sāvako paññavā hoti||
uday'attha-gāminiyā paññāya samannāgato,||
ariyāya nibbedhi-kāya sammā-dukkha-k-khaya-gāminiyā.|| ||

So 'idaɱ dukkhan' ti||
yathā-bhūtaɱ pajānāti.|| ||

'Ayaɱ dukkha-samudayo' ti||
yathā-bhūtaɱ pajānāti.|| ||

'Ayaɱ dukkha-nirodho' ti||
yathā-bhūtaɱ pajānāti.|| ||

'Ayaɱ dukkha-nirodha-gāminī-paṭipadā' ti||
yathā-bhūtaɱ pajānāti.|| ||

Idaɱ vuccati bhikkhave paññ'indriyaɱ.|| ||

Imāni kho bhikkhave, pañc'indriyānī" ti.|| ||

 

Suddhaka Vagga Paṭhama

 


Contact:
E-mail
Copyright Statement