Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
48. Indriya Saŋyutta
II. Mudatara-vaggo

Sutta 11

Paṭilābho Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayam Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuɱ.|| ||

Bhagavā etad avoca:|| ||

"Pañcimāni bhikkhave, indriyāni.|| ||

Katamāni pañca?|| ||

Saddhindriyaɱ,||
viriyindriyaɱ,||
satindriyaɱ,||
samādhindriyaɱ,||
paññindriyaɱ.|| ||

Katamañ ca bhikkhave, saddhindriyaɱ?|| ||

Idha bhikkhave, ariyasāvako saddho hoti, saddahati Tathāgatassa bodhiɱ:|| ||

"Iti pi so Bhagavā arahaɱ Sammā-sambuddho vijjā-caraṇa-sampanno sugato loka-vidū anuttaro purisa-damma-sārathī satthā deva-manussānaɱ buddho Bhagavā" ti.|| ||

Idaɱ vuccati bhikkhave, saddhindriyaɱ.|| ||

Katamañ ca bhikkhave viriyindriyaɱ?|| ||

Yaɱ kho bhikkhave, cattāro sammappadhāne ārabbha viriyaɱ paṭilabhati.|| ||

Idaɱ vuccati bhikkhave, viriyindriyaɱ.|| ||

[200] Katamañ ca bhikkhave, satindriyaɱ?|| ||

Yaɱ kho bhikkhave cattāro satipaṭṭhāne ārabbha satiɱ paṭilabhati.|| ||

Idaɱ vuccati bhikkhave, satindriyaɱ.|| ||

Katamañ ca bhikkhave, samādhindriyaɱ?|| ||

Idha bhikkhave, ariyasāvako vossaggārammaṇaɱ karitvā labhati samādhiɱ,||
labhati cittassa ekaggataɱ.|| ||

Idaɱ vuccati bhikkhave samādhindriyaɱ.|| ||

Katamañ ca bhikkhave paññindriyaɱ?|| ||

Idha bhikkhave, ariyasāvako paññavā hoti udayatthagāminiyā paññāya samannāgato, ariyāya nibbedhikāya sammā-dukkhakkhaya-gāminiyā.|| ||

Idaɱ vuccati bhikkhave paññindriyaɱ.|| ||

Imāni kho bhikkhave, pañcindriyānī" ti.|| ||

 


Contact:
E-mail
Copyright Statement   Webmaster's Page