Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
48. Indriya Saŋyutta
V. Jarā-vagga

Sutta 47

Tatiya Pubbārama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayaɱ Bhagavā Sāvatthiyaɱ viharati Pubbārāme Migāramātupāsāde.|| ||

Tatra kho Bhagavā bhikkhū āmantesi "bhikkhavo" ti.|| ||

"Bhadante" ti te bhikkhū Bhagavato pacchassosuɱ Bhagavā etad avoca:|| ||

Katinnaɱ nu kho bhikkhave indriyānaɱ||
bhāvitattā||
bahulīkatattā||
khīṇāsavo bhikkhu aññaɱ vyākaroti:|| ||

'Khīṇā jāti||
vusitaɱ brahmacariyaɱ||
kataɱ karaṇīyaɱ||
nāparaɱ itthattāyā' ti pajānāmī" ti?"|| ||

"Bhagavaɱ-mūlakā no bhante, dhammā,||
Bhagavaɱ-nettikā||
Bhagavaɱ-paṭisaraṇā.|| ||

Sādhu vata bhante,||
Bhagavantaɱ yeva paṭibhātu etassa bhāsitassa attho.|| ||

Bhagavato sutvā bhikkhū dhāressantī" ti.|| ||

Catunnaɱ kho bhikkhave, indriyānaɱ||
bhāvitattā||
bahulīkatattā||
khīṇāsavo bhikkhu aññaɱ vyākaroti:|| ||

'Khīṇā jāti||
vusitaɱ brahmacariyaɱ||
kataɱ karaṇīyaɱ||
nāparaɱ itthattāyā' ti pajānāmī.|| ||

Katamesaŋ catunnaɱ?|| ||

Viriy'indriyassa,||
sat'indriyassa,||
samādh'indriyassa,||
paññ'indriyassa.|| ||

Imesaɱ kho bhikkhave, catunnaɱ indriyānaɱ||
bhāvitattā||
bahulīkatattā||
khīṇāsavo bhikkhu aññaɱ vyākaroti:|| ||

'Khīṇā jāti||
vusitaɱ brahmacariyaɱ||
kataɱ karaṇīyaɱ||
nāparaɱ itthattāyā' ti pajānāmī" ti.|| ||

 


Contact:
E-mail
Copyright Statement   Webmaster's Page