Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
48. Indriya Saŋyutta
VI. Sūkarakhata-vagga

Sutta 53

Sekha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evam me sutaɱ:|| ||

Ekaɱ samayaɱ Bhagavā Kosambiyaɱ viharati Ghositārāme.|| ||

Tatra kho Bhagavā bhikkhū āmantesi: atthi nu kho bhikkhave, pariyāyo: yaɱ pariyāya āgamma sekho bhikkhu sekhabhūmiyaɱ ṭhito sekho'smīti pajāneyya, asekho bhikkhu asekhabhūmiyaɱ ṭhito asekho'smīti pajāneyyā'ti.|| ||

"Bhagavaɱ-mūlakā no bhante, dhammā,||
Bhagavaɱ-nettikā||
Bhagavaɱ-paṭisaraṇā.|| ||

Sādhu vata bhante,||
Bhagavantaɱ yeva paṭibhātu etassa bhāsitassa attho.|| ||

Bhagavato sutvā bhikkhū dhāressantī" ti.|| ||

Atthi bhikkhave, pariyāyo:||
yaɱ pariyāyaɱ āgamma sekho bhikkhu sekhabhūmiyaɱ||
'ṭhito sekhosmī' ti pajāneyya,||
asekho bhikkhu asekhabhūmiyaɱ||
'ṭhito asekhosmī' ti pajāneyya.|| ||

Katamo ca bhikkhave, pariyāyo,||
yaɱ pariyāyaɱ āgamma sekho bhikkhu sekhabhūmiyaɱ||
'ṭhito sekhosmī' ti pajānāti?|| ||

Idha, bhikkhave, sekho bhikkhu||
'idaɱ dukkhan' ti yathābhūtaɱ pajānāti.|| ||

'Ayaɱ dukkhasamudayo' ti yathābhūtaɱ pajānāti.

'Ayaɱ dukkhanirodho' ti yathābhūtaɱ pajānāti.|| ||

'Ayaɱ dukkhanirodhagāminīpaṭipadā' ti yathabhūtaɱ pajānāti.|| ||

Ayam pi kho bhikkhave, pariyāyo,||
yaɱ pariyāyaɱ āgamma sekho bhikkhu sekhabhūmiyaɱ||
'ṭhito sekhosmī' ti pajānāti.|| ||

Puna ca paraɱ bhikkhave,||
sekho bhikkhu iti paṭisañcitkhati:|| ||

'Atthi nu kho ito bahiddhā añño samaṇo vā brāhmaṇo vā yo evaɱ bhūtaɱ tacchaɱ tathā dhammaɱ [230] deseti, yathā Bhagavā' ti?|| ||

So evaɱ pajānati:|| ||

'N'atthi ito bahiddhā añño samaṇo vā brāhmaṇo vā yo evaɱ bhūtaɱ tacchaɱ tathā dhammaɱ deseti, yathā Bhagavā' ti.|| ||

Ayam pi kho bhikkhave, pariyāyo:||
yaɱ pariyāyaɱ āgamma sekho bhikkhu sekhabhūmiyaɱ||
'ṭhito sekhosmī" ti pajānāti.|| ||

Puna ca paraɱ bhikkhave, sekho bhikkhu pañcindriyāni pajānāti:||
saddhindriyaɱ||
viriyindriyaɱ||
satindriyaɱ||
samādhindriyaɱ||
paññindriyaɱ,||
yaɱgatikāni||
yaɱparamāni||
yaɱbalāni||
yaɱpariyosānāni,||
naheva kho kāyena phusitvā viharati,||
paññāya ca ativijjha passati.

Ayam pi kho bhikkhave: pariyāyo:||
yaɱ pariyāyaɱ āgamma sekho bhikkhu sekhabhūmiyaɱ||
'ṭhito sekhosmī' ti pajānāti.|| ||

Katamo ca bhikkhave, pariyāyo,||
yaɱ pariyāyaɱ āgamma asekho bhikkhu asekhabhūmiyaɱ||
'ṭhito asekhosmī' ti pajānāti?|| ||

Idha, bhikkhave, asekho bhikkhu||
pañcindriyāni pajānāti||
saddhindriyaɱ||
viriyindriyaɱ||
satindriyaɱ||
samādhindriyaɱ||
paññindriyaɱ||
yaɱgatatikāni||
yaɱparamāni||
yaɱbalāni||
yaɱpariyosānāti.|| ||

Kāyena ca phusitvā viharati,||
paññāya ca ativijjha passati.|| ||

Ayam pi kho bhikkhave, pariyāyo||
yaɱ pariyāyaɱ āgamma asekho bhikkhu asekhabhūmiyaɱ||
'ṭhito asekhosmī' ti pajānāti.|| ||

Puna ca paraɱ bhikkhave,||
asekho bhikkhu cha indriyāni pajānāti.|| ||

'Cakkhundriyaɱ||
sotindriyaɱ||
ghānindriyaɱ||
jivhindriyaɱ||
kāyindriyaɱ||
manindriyaɱ,||
imāni cha indriyāni||
sabbena||
sabbaɱ||
sabbathā||
sabbaɱ aparisesaɱ nirujjhanti.

Aññāni cha indriyāni||
na kuhiñci kismiñci uppajjissantī' ti pajānāti.|| ||

Ayam pi kho bhikkhave, pariyāyo||
yaɱ pariyāyaɱ āgamma asekho bhikkhu asekhabhūmiyaɱ||
'ṭhito asekhosmī' ti pajānātī" ti.|| ||

 


Contact:
E-mail
Copyright Statement   Webmaster's Page