Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya,
V: Mahā-Vagga
51. Iddhipāda Saɱyutta

Sutta 14

Moggallāno Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][olds] Evam me sutaɱ:|| ||

Ekaɱ samayam Bhagavā Sāvatthiyaɱ viharati||
Pubbārāme Migāra-mātu pāsāde.|| ||

2. Tena kho pana samayena sambahulā bhikkhū heṭṭhā Migāra-mātu pāsāde viharanti,||
uddhatā uṇṇaḷā capalā mukharā vikiṇṇa-vācā muṭṭha-s-satino asampajānā asamāhitā vibbhanta-cittā pākat'indriyā.|| ||

3. Atha kho Bhagavā āyasmantaɱ Mahā-Moggallānaɱ āmantesi:|| ||

"Ete kho Moggallāna sabrahma-cāriya heṭṭhā Migāra-mātu pāsāde viharanti uddhatā uṇṇaḷā capalā mukharā vikiṇṇa-vācā muṭṭha-s-satino asampajānā asamāhitā vibbhanta-cittā pākat'indriyā.|| ||

Gaccha Moggallāna, te bhikkhu saŋvejehī ti.|| ||

'Evaɱ bhante' ti kho āyasmā Mahā-Moggallāno Bhagavato paṭissutvā||
tathā-rūpaɱ iddhābhisankhāraɱ abhisankhāresi
yathā pādaŋguṭṭhakena Migāra-mātupāsādaɱ||
saŋkampesi,||
sampakampesi,||
sampacālesi.|| ||

4. Atha kho te bhikkhū saŋviggā loma-haṭṭha-jātā eka-m-antaɱ aṭṭhaɱsu.|| ||

Acchariyaɱ vata bho abbhutaɱ vata bho
nivātañ ca vata ayañ ca Migāra-mātupāsādo gambhīranemo||
sunikhāto, acalo, asampakampī||
atha ca pana||
saŋkampito||
sampakampito||
sampacālitoti.|| ||

5. Atha kho Bhagavā yena te bhikkhu ten'upasankami.|| ||

Upasaŋkamitvā te bhikkhu etad avoca:|| ||

"Kiɱ nu tumhe bhikkhave,||
saŋviggā loma-haṭṭha-jātā eka-m-antaɱ ṭhitā ti?|| ||

Acchariyaɱ bhante,||
abbhutaɱ bhante,||
nivātañ ca vata,||
ayañ ca Migāra-mātupāsādo gambhīranemo||
sunikhāto acalo asampakampī
atha ca pana||
saŋkampito||
sampakampito||
sampacālito ti.|| ||

6. Tumh'eva kho bhikkhave,||
saŋvejetukāmena Moggallānena bhikkhunā pādaŋguṭṭhena Migāra-mātupāsādo
saŋkampito||
sampakampito||
sampacālito.|| ||

Taɱ kiɱ maññatha bhikkhave,||
katamesaɱ dhammānaɱ bhāvitattā bahulī-katattā Moggallāno bhikkhu evaɱ mahiddhiko evaɱ mah-ā-nubhāvo ti.|| ||

Bhagava mūlakā no bhante,||
dhammā Bhagavaɱ-nettikā Bhagavam paṭisaraṇā.|| ||

Sādhu vata bhante Bhagavantaɱ yeva paṭibhātu etassa bhāsitassa attho:|| ||

Bhagavato sutvā bhikkhū dhāressantī ti.|| ||

7. Tena bhikkhave suṇātha.|| ||

Catunnaɱ kho bhikkhave,||
iddhi-pādānaɱ bhāvitattā bahulī-katattā Moggallāno bhikkhu evaɱ mahiddhiko evaɱ mah-ā-nubhāvo.|| ||

Katamesaɱ catunnaɱ?|| ||

8. Idha, bhikkhave, Moggallāno bhikkhu||
chanda-samādhi-padhāna-sankhāra-samannāgataɱ iddhi-pādaɱ bhāveti.|| ||

Iti me chando na ca atilīno bhavissati,||
na ca atipaggahito bhavissati,||
na ca ajjhattaɱ saŋkhitto bhavissati,||
na ca bahiddhā vikkhitto bhavissati.|| ||

Pacchā-pure-saññī ca viharati.|| ||

Yathā pure tathā pacchā,||
yathā pacchā tathā pure.|| ||

Yathā adho tathā uddhaɱ,||
yathā uddhaɱ tathā adho.|| ||

Yathā divā tathā rattiɱ,||
yathā rattiɱ tathā divā.|| ||

Iti vivaṭena cetasā apariyonaddhena cetasā sa-p-pabhāsaɱ cittaɱ bhāveti.|| ||

Viriya-samādhi-padhāna-sankhāra-samannāgataɱ iddhi-pādaɱ bhāveti.|| ||

Iti me viriyaɱ na ca atilīno bhavissati,||
na ca atipaggahito bhavissati,||
na ca ajjhattaɱ saŋkhitto bhavissati,||
na ca bahiddhā vikkhitto bhavissati.|| ||

Pacchā-pure-saññī ca viharati.|| ||

Yathā pure tathā pacchā,||
yathā pacchā tathā pure.|| ||

Yathā adho tathā uddhaɱ,||
yathā uddhaɱ tathā adho.|| ||

Yathā divā tathā rattiɱ,||
yathā rattiɱ tathā divā.|| ||

Iti vivaṭena cetasā apariyonaddhena cetasā sa-p-pabhāsaɱ cittaɱ bhāveti.|| ||

Citta-samādhi-padhāna-sankhāra-samannāgataɱ iddhi-pādaɱ bhāveti.|| ||

Iti me cittaɱ na ca atilīno bhavissati,||
na ca atipaggahito bhavissati,||
na ca ajjhattaɱ saŋkhitto bhavissati,||
na ca bahiddhā vikkhitto bhavissati.|| ||

Pacchā-pure-saññī ca viharati.|| ||

Yathā pure tathā pacchā,||
yathā pacchā tathā pure.|| ||

Yathā adho tathā uddhaɱ,||
yathā uddhaɱ tathā adho.|| ||

Yathā divā tathā rattiɱ,||
yathā rattiɱ tathā divā.|| ||

Iti vivaṭena cetasā apariyonaddhena cetasā sa-p-pabhāsaɱ cittaɱ bhāveti.|| ||

Vīmaɱsā-samādhi-padhāna-sankhāra-samannāgataɱ iddhi-pādaɱ bhāveti.|| ||

Iti me vimaɱsā na ca atilīno bhavissati,||
na ca atipaggahito bhavissati,||
na ca ajjhattaɱ saŋkhitto bhavissati,||
na ca bahiddhā vikkhitto bhavissati.|| ||

Pacchā-pure-saññī ca viharati.|| ||

Yathā pure tathā pacchā,||
yathā pacchā tathā pure.|| ||

Yathā adho tathā uddhaɱ,||
yathā uddhaɱ tathā adho.|| ||

Yathā divā tathā rattiɱ,||
yathā rattiɱ tathā divā.|| ||

Iti vivaṭena cetasā apariyonaddhena cetasā sa-p-pabhāsaɱ cittaɱ bhāveti.|| ||

9. Imesaɱ kho bhikkhave,||
catunnaɱ iddhi-pādānaɱ bhāvitattā bahulī-katattā Moggallāno bhikkhu evaɱ mahiddhiko evaɱ mah-ā-nubhāvo.|| ||

10. Imesaɱ ca pana bhikkhave,||
catunnaɱ iddhi-pādānaɱ bhāvitattā bahulī-katattā Moggallāno bhikkhu aneka-vihitaɱ iddhi-vidhaɱ paccanubhoti ekopi hutvā bahudhā hoti.|| ||

Bahudhā pi hutvā eko hoti.|| ||

Āvībhāvaɱ tiro-bhāvaɱ tiro-kuḍḍaɱ tiro-pākāraɱ tiro-pabbataɱ asajja-māno gacchati seyyathā pi ākāse.|| ||

Paṭhaviyā pi ummujjani-mujjaɱ karoti seyyathā pi udake.|| ||

Udake pi abhijjamāno gacchati seyyathā pi paṭhaviyaɱ.|| ||

Ākāse'pi pallaŋkena kamati seyyathā pi pakkhisakuṇo.|| ||

Ime pi candima-suriye evaɱ mahiddhike evaɱ mah-ā-nubhāve pāṇinā parāma-sati parimajjati yāva Brahma-lokā pi kāyena vasaɱ vatteti.|| ||

11. Evaɱ bhāvitesu kho bhikkhave,||
bhikkhu catusu iddhi-pādesu evaɱ bahulī-katesu||
dibbāya sota-dhātuyā visuddhāya atikkanta mānusikāya ubho sadde suṇāti dibbe ca mānuse ca ye dūre santike vā ti.|| ||

12. Evaɱ bhāvitesu kho bhikkhave,||
bhikkhu catusu iddhi-pādesu evaɱ bahulī-katesu||
para-sattānaɱ para-puggalānaɱ cetasā ceto paricca pajānāti.|| ||

Sarāgaɱ vā cittaɱ sarāgaɱ cittan ti pajānāti.|| ||

Vīta-rāgaɱ vā cittaɱ vīta-rāgaɱ cittan ti pajānāti.|| ||

Sadosaɱ vā cittaɱ sadosaɱ cittan ti pajānāti.|| ||

Vīta-dosaɱ vā cittaɱ vīta-dosaɱ cittan ti pajānāti.|| ||

Samohaɱ vā cittaɱ samohaɱ cittan ti pajānāti.|| ||

Vīta-mohaɱ vā cittaɱ vīta-mohaɱ cittan ti pajānāti.|| ||

Sankhittaɱ vā cittaɱ sankhittaɱ cittan ti pajānāti.|| ||

Vikkhittaɱ vā cittaɱ vikkhittaɱ cittan ti pajānāti.|| ||

Amahaggataɱ vā cittaɱ amahaggataɱ cittan ti pajānāti.|| ||

Mahaggataɱ vā cittaɱ mahaggataɱ cittan ti pajānāti.|| ||

Sauttaraɱ vā cittaɱ sauttaraɱ cittan ti pajānāti.|| ||

Anuttaraɱ vā cittaɱ anuttaraɱ cittan ti pajānāti.|| ||

Asamāhitaɱ vā cittaɱ asamāhitaɱ cittanti pajānāti.|| ||

Samāhitaɱ vā cittaɱ samāhitaɱ cittan ti pajānāti.|| ||

Avimuttaɱ vā cittaɱ avimuttaɱ cittanti pajānāti.|| ||

Vimuttaɱ vā cittaɱ vimuttaɱ cittan ti pajānāti.|| ||

13. Evaɱ bhāvitesu kho bhikkhave,||
bhikkhu catusu iddhi-pādesu evaɱ bahulī-katesu||
aneka-vihitaɱ pubbe nivāsaɱ anussarati.|| ||

Seyyath'īdaɱ:|| ||

"Ekam pi jātiɱ,||
dve pi jātiyo,||
tisso pi jātiyo,||
catasso pi jātiyo,||
pañca pi jātiyo,||
dasa pi jātiyo,||
vīsampi1 jātiyo,||
tiɱsam pi jātiyo,||
cattārīsam pi jātiyo,||
paññāsam pi jātiyo,||
jāti satam pi||
jāti-sahassam pi||
jāti-sata-sahassam pi||
aneke pi saŋvaṭṭakappe||
aneke pi vivaṭṭa-kappe||
aneke pi saŋvaṭṭa-vivaṭṭa-kappe.|| ||

Amutrāsiɱ:|| ||

Evaɱ nāmo||
evaɱ gotto||
evaɱ vaṇṇo||
evam āhāro||
evaɱ sukha-dukkha-paṭisaŋvedī||
evam āyu-pariyanto.|| ||

So tato cuto amutra udapādiɱ.|| ||

Tatrāvāsiɱ:|| ||

Evaɱ nāmo||
evaɱ gotto||
evaɱ vaṇṇo||
evam āhāro||
evaɱ sukha-dukkha-paṭisaŋvedī||
evam āyu-pariyanto.|| ||

So tato cuto idh'ūpapanno" ti.|| ||

Iti sākāraɱ sauddesaɱ aneka-vihitaɱ pubbe nivāsaɱ anussarati.|| ||

14. Evaɱ bhāvitesu kho bhikkhave,||
bhikkhu catusu iddhi-pādesu evaɱ bahulī-katesu||
dibbena cakkhunā visuddhena atikkanta-mānusa-kena satte passati:|| ||

"Cavamāne uppajjamāne hīne paṇīte suvaṇṇe dubbaṇṇe sugate duggate yathā-kammupage satte pajānāti:|| ||

Ime vata bhonto sattā||
kāya-du-c-caritena samantāgatā||
vacī-du-c-caritena samannāgatā||
mano-du-c-caritena samannāgatā||
ariyānaɱ upavādakā||
micchā-diṭṭhikā||
micchā-diṭṭhi-kamma-samādānā.|| ||

Te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā.|| ||

Ime kho pana bhonto sattā||
kāya-sucaritena samannāgatā||
vacī-sucaritena samannāgatā||
mano-sucaritena samannāgatā||
ariyānaɱ anupavādakā||
sammā-diṭṭhikā||
sammā-diṭṭhi-kamma-samādānā.|| ||

Te kāyassa bhedā param maraṇā sugatiɱ saggaɱ lokaɱ upapannā" ti.|| ||

Iti dibbena cakkhunā visuddhena atikkanta-mānusa-kena satte passati:|| ||

"Cavamāne uppajjamāne hīne paṇīte suvaṇṇe dubbaṇṇe sugate duggate yathā-kammūpage satte pajānātī" ti.|| ||

15. Evaɱ bhāvitesu kho bhikkhave,||
bhikkhu catusu iddhi-pādesu evaɱ bahulī-katesu āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe'va dhamme sayaɱ abhiññā sacchi-katvā upasampajja viharatī ti.|| ||


Contact:
E-mail
Copyright Statement