Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
51. Iddhipāda Saŋyutta

Sutta 15

Brāhmaṇa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][olds] Evam me sutaɱ:|| ||

Ekaɱ samayaɱ āyasmā Ānando Kosambiyaɱ viharati Ghositārāme.|| ||

2. Atha kho Uṇṇābho brāhmaṇo yen'āyasmā Ānando ten'upasaŋkami.|| ||

Upasaŋkamitvā āyasmatā Ānandena saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho Uṇṇābho brāhmaṇo āyasmantaɱ Ānandaɱ etad avoca:|| ||

3. Kim atthi yaɱ nu kho bho Ānanda,||
samaṇe Gotame brahmacariyaɱ vussatī ti?|| ||

Chanda-pahānatthaɱ kho brāhmaṇa Bhagavati brahmacariyaɱ vussatī ti.|| ||

4. Atthi pana bho Ānanda,||
maggo atthi paṭipadā etassa chandassa pahānāyā ti?|| ||

Atthi kho brāhmaṇa,||
maggo atthi paṭipadā etassa chandassa pahānāyā ti.|| ||

5. Katamo pana bho Ānanda,||
maggo katamā paṭipadā etassa pahānāyā ti?|| ||

Idha brāhmaṇa bhikkhu||
chanda-samādhi-padhāna-sankhāra-samannāgataɱ iddhipādaɱ bhāveti,||
viriya-samādhi-padhāna-sankhāra-samannāgataɱ iddhipādaɱ bhāveti,||
citta-samādhi-padhāna-sankhāra-samannāgataɱ iddhipādaɱ bhāveti,||
vīmaɱsā-samādhi-padhāna-sankhāra-samannāgataɱ iddhipādaɱ bhāveti.|| ||

Ayaɱ kho brāhmaṇa maggo||
ayaɱ paṭipadā etassa chandassa pahānāyā ti.|| ||

6. Evaɱ sante kho Ānanda santakaɱ hoti no asantakaɱ,||
chandena ca chandaɱ pajahi'satī ti||
n'etaɱ ṭhānaɱ vijjatī ti.|| ||

Tena hi brāhmaṇa,||
taññevettha paṭipucchissāmi yathā te khameyya tathā taɱ vyākareyyāsi.|| ||

7. Taɱ kiɱ maññasi brāhmaṇa,||
ahosi te pubbe chando ārāmaɱ gamissāmī ti.|| ||

Tassa te ārāmagatassa yo tajjo chando so paṭippassaddho ti.|| ||

Evaɱ bho.|| ||

Ahosi te pubbe viriyaɱ ārāmaɱ gamissāmī ti tassa te ārāmagatassa yaɱ tajjaɱ viriyaɱ taɱ paṭippassaddhanti.|| ||

Evaɱ bho.|| ||

Ahosi te pubbe cittaɱ ārāmaɱ gamissāmī ti.|| ||

Tassa te ārāmagatassa yaɱ tajjaɱ cittaɱ taɱ paṭippassaddhanti.|| ||

Evaɱ bho.|| ||

Ahosi te pubbe vīmaɱsā ārāmaɱ gamissāmī ti.|| ||

Tassa te ārāmagatassa yā tajjā vīmaɱsā sā paṭippassaddhā ti.|| ||

Evaɱ bho.|| ||

8. Evam eva kho brāhmaṇa,||
yo so bhikkhu arahaɱ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaŋyojano sammadaññā vimutto.|| ||

Tassa yo pubbe chando ahosi arahattappattiyā||
arahatte patte yo tajjo chando so paṭippassaddho.|| ||

Yaɱ pubbe viriyaɱ ahosi arahattappattiyā||
arahatte patte yaɱ tajjaɱ viriyaɱ taɱ paṭippassaddhaɱ.|| ||

Yaɱ pubbe cittaɱ ahosi arahattappattiyā,||
arahatte patte yaɱ tajjaɱ cittaɱ taɱ paṭippassaddhaɱ.|| ||

Yā pubbe vīmaɱsā ahosi arahattappattiyā||
arahatte patte yā tajjā vīmaɱsā sā paṭipipassaddhā.|| ||

9. Taɱ kiɱ maññasi brāhmaṇa,||
iti evaɱ sante santakaɱ vā hoti no asantakaɱ vā ti?|| ||

Addhā bho Ānanda,||
evaɱ sante santakaɱ hoti no asantakaɱ.|| ||

10. Abhikkantaɱ bho Ānanda,||
abhikkantaɱ bho Ānanda,||
seyyathā pi bho Ānanda nikkujjitaɱ vā ukkujjeyya,||
paṭicchannaɱ vā vivareyya,||
mūḷhassa vā maggaɱ ācikkheyya' andhakāre vā telapajjotaɱ dhāreyya,||
"cakkhumanto rapāni dakkhintī" ti,||
evam eva bhotā Ānandena aneka pariyāyena dhammo pakāsito.|| ||

Esāhaɱ bho Ānanda,||
bhavantaɱ Gotamaɱ saraṇaɱ gacchāmi||
dhammañ ca||
bhikkhu-saŋghañ ca.|| ||

Upāsakaɱ maɱ bhavaɱ Ānando dhāretu ajjatagge pāṇupetaɱ saraṇaɱ gatanti.|| ||


Contact:
E-mail
Copyright Statement   Webmaster's Page