Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
51. Iddhipāda Saŋyutta
III. Ayoguḷa-vaggo

Sutta 29

Paṭhama Sambahula Bhikkhu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][olds] Evam me sutaɱ:|| ||

Sāvatthiyaɱ:|| ||

2. Atha kho sambahulā bhikkhū yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

2. Eka-m-antaɱ nisinnā kho te bhikkhū Bhagavantaɱ etad avocuɱ:|| ||

Katamā nu kho bhante, iddhi?|| ||

Katamo iddhipādo?|| ||

Katamā iddhipādabhāvanā?|| ||

Katamā iddhipādabhāvanāgāminī paṭipadā? ti.|| ||

3. Idha bhikkhave, bhikkhu aneka-vihitaɱ iddhividhaɱ paccanubhoti:|| ||

"Eko pi hutvā bahudhā hoti bahudhā pi hutvā eko hoti.|| ||

Āvībhāvaɱ tirobhāvaɱ tirokuḍḍaɱ tiropākāraɱ tiropabbataɱ asajjamānova gacchati,||
seyyathā pi ākāse.|| ||

Paṭhaviyā pi ummujjanimujjaɱ karoti seyyathā pi udake.|| ||

Udake pi abhijjamāno gacchati seyyathā pi paṭhaviyaɱ.|| ||

Ākāse pi pallaŋkena kamati seyyathā pi pakkhī sakuṇo.|| ||

Ime pi candimasuriye evaɱ mahiddhike evaɱ mahānubhāve pāṇinā parāmasati,||
parimajjati.|| ||

Yāva brahmalokā pi kāyena vasaɱ vatteti.|| ||

Ayaɱ vuccati bhikkhave, iddhi.|| ||

4. Katamo ca bhikkhave, iddhipādo?|| ||

Yo bhikkhave, maggo yā paṭipadā iddhilābhāya iddhipaṭilābhāya saŋvattati.|| ||

Ayaɱ vuccat bhikkhave, iddhipādo.|| ||

5. Katamā ca bhikkhave, iddhipādabhāvanā?|| ||

Idha, bhikkhave, bhikkhu chanda-samādhi-padhāna-sankhāra-samannāgataɱ iddhipādaɱ bhāveti.|| ||

Viriya-samādhi-padhāna-sankhāra-samannāgataɱ iddhipādaɱ bhāveti:|| ||

Citta-samādhi-padhāna-sankhāra-samannāgataɱ iddhipādaɱ bhāveti:|| ||

Vimaɱsā-samādhi-padhāna-sankhāra-samannāgataɱ iddhipādaɱ bhāveti:|| ||

Ayaɱ vuccati bhikkhave, iddhipādabhāvanā.|| ||

6. Katamā ca bhikkhave, iddhipādabhāvanāgāminī paṭipadā?|| ||

Ayam eva ariyo aṭṭhaŋgiko maggo.|| ||

Seyyathīdaɱ:|| ||

Sammādiṭṭhi,||
sammāsaŋkappo,||
sammāvācā,||
sammākammanko,||
sammāājīvo,||
sammāvāyāmo,||
sammāsati,||
sammāsamādhi.|| ||

Ayaɱ vuccati bhikkhave, iddhipādabhāvanāgāminī paṭipadā ti.|| ||


Contact:
E-mail
Copyright Statement   Webmaster's Page