Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
51. Iddhipāda Saŋyutta
III. Ayoguḷa-vaggo

Sutta 32

Tathāgato Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][olds] Evam me sutaɱ:|| ||

Sāvatthiyaɱ:|| ||

2. Tatra kho Bhagavā bhikkhū āmantesi.|| ||

3. Taɱ kiɱ maññatha bhikkhave, katamesaŋ dhammānaɱ bhāvitattā bahulīkatattā tathāgato evaɱ mahiddhiko evaɱ mahānubhāvo ti?|| ||

Bhagavammūlakā no bhante dhammā Bhagavannettikā Bhagavampaṭisaraṇā sādhu vata bhante Bhagavantaɱ yeva paṭibhātu etassa bhāsitassa attho:|| ||

Bhagavato sutvā bhikkhū dhāressantī ti.|| ||

Tena hi bhikkhave suṇāhi sādhukaɱ manasi karohi bhāsissāmī ti.|| ||

Evaɱ bhante' ti kho bhikkhū Bhagavato paccassosi.|| ||

Bhagavā etad avoca:|| ||

4. Catunnaɱ kho bhikkhave,||
iddhipādānaɱ bhāvitattā bahulīkatattā tathāgato evaɱ mahiddhiko evaɱ mahānubhāvo.|| ||

Katamesaɱ catunnaɱ?|| ||

5. Idha, bhikkhave, tathāgato||
chanda-samādhi-padhāna-sankhāra-samannāgataɱ iddhipādaɱ bhāveti.|| ||

Iti me chando na ca atilīno bhavissati,||
na ca atipaggahito bhavissati,||
na ca ajjhattaɱ saŋkhitto bhavissati,||
na ca bahiddhā vikkhitto bhavissati.|| ||

Pacchā-pure-saññī ca viharati.|| ||

Yathā pure tathā pacchā,||
yathā pacchā tathā pure.|| ||

Yathā adho tathā uddhaɱ,||
yathā uddhaɱ tathā adho.|| ||

Yathā divā tathā rattiɱ,||
yathā rattiɱ tathā divā.|| ||

Iti vivaṭena cetasā apariyonaddhena cetasā sappabhāsaɱ cittaɱ bhāveti.|| ||

6. Viriya-samādhi-padhāna-sankhāra-samannāgataɱ iddhipādaɱ bhāveti.|| ||

Iti me viriyaɱ na ca atilīno bhavissati,||
na ca atipaggahito bhavissati,||
na ca ajjhattaɱ saŋkhitto bhavissati,||
na ca bahiddhā vikkhitto bhavissati.|| ||

Pacchā-pure-saññī ca viharati.|| ||

Yathā pure tathā pacchā,||
yathā pacchā tathā pure.|| ||

Yathā adho tathā uddhaɱ,||
yathā uddhaɱ tathā adho.|| ||

Yathā divā tathā rattiɱ,||
yathā rattiɱ tathā divā.|| ||

Iti vivaṭena cetasā apariyonaddhena cetasā sappabhāsaɱ cittaɱ bhāveti.|| ||

7. Citta-samādhi-padhāna-sankhāra-samannāgataɱ iddhipādaɱ bhāveti.|| ||

Iti me cittaɱ na ca atilīno bhavissati,||
na ca atipaggahito bhavissati,||
na ca ajjhattaɱ saŋkhitto bhavissati,||
na ca bahiddhā vikkhitto bhavissati.|| ||

Pacchā-pure-saññī ca viharati.|| ||

Yathā pure tathā pacchā,||
yathā pacchā tathā pure.|| ||

Yathā adho tathā uddhaɱ,||
yathā uddhaɱ tathā adho.|| ||

Yathā divā tathā rattiɱ,||
yathā rattiɱ tathā divā.|| ||

Iti vivaṭena cetasā apariyonaddhena cetasā sappabhāsaɱ cittaɱ bhāveti.|| ||

8. Vīmaɱsā-samādhi-padhāna-sankhāra-samannāgataɱ iddhipādaɱ bhāveti.|| ||

Iti me vimaɱsā na ca atilīno bhavissati,||
na ca atipaggahito bhavissati,||
na ca ajjhattaɱ saŋkhitto bhavissati,||
na ca bahiddhā vikkhitto bhavissati.|| ||

Pacchā-pure-saññī ca viharati.|| ||

Yathā pure tathā pacchā,||
yathā pacchā tathā pure.|| ||

Yathā adho tathā uddhaɱ,||
yathā uddhaɱ tathā adho.|| ||

Yathā divā tathā rattiɱ,||
yathā rattiɱ tathā divā.|| ||

Iti vivaṭena cetasā apariyonaddhena cetasā sappabhāsaɱ cittaɱ bhāveti.|| ||

9. Imesaɱ kho bhikkhave,||
catunnaɱ iddhipādānaɱ bhāvitattā bahulīkatattā tathāgato evaɱ mahiddhiko evaɱ mahānubhāvo.|| ||

10. Imesaɱ ca pana bhikkhave,||
catunnaɱ iddhipādānaɱ bhāvitattā bahulīkatattā tathāgato aneka-vihitaɱ iddhividhaɱ paccanubhoti.|| ||

Eko pi hutvā bahudhā hoti.|| ||

Bahudhā pi hutvā eko hoti.|| ||

Āvībhāvaɱ tirobhāvaɱ tirokuḍḍaɱ tiropākāraɱ tiropabbataɱ asajjamāno gacchati seyyathā pi ākāse.|| ||

Paṭhaviyā pi ummujjanimujjaɱ karoti seyyathā pi udake.|| ||

Udake pi abhijjamāno gacchati seyyathā pi paṭhaviyaɱ.|| ||

Ākāse'pi pallaŋkena kamati seyyathā pi pakkhisakuṇo.|| ||

Ime pi candimasuriye evaɱ mahiddhike evaɱ mahānubhāve pāṇinā parāmasati parimajjati yāva brahmalokā pi kāyena vasaɱ vatteti.|| ||

11. Evaɱ bhāvitesu kho bhikkhave,||
tathāgato catusu iddhipādesu evaɱ bahulīkatesu||
dibbāya sotadhātuyā visuddhāya atikkanta mānusikāya ubho sadde suṇāti dibbe ca mānuse ca ye dūre santike vā ti.|| ||

12. Evaɱ bhāvitesu kho bhikkhave,||
tathāgato catusu iddhipādesu evaɱ bahulīkatesu||
parasattānaɱ parapuggalānaɱ cetasā ceto paricca pajānāti.|| ||

Sarāgaɱ vā cittaɱ sarāgaɱ cittan ti pajānāti.|| ||

Vītarāgaɱ vā cittaɱ vītarāgaɱ cittan ti pajānāti.|| ||

Sadosaɱ vā cittaɱ sadosaɱ cittan ti pajānāti.|| ||

Vītadosaɱ vā cittaɱ vītadosaɱ cittan ti pajānāti.|| ||

Samohaɱ vā cittaɱ samohaɱ cittan ti pajānāti.|| ||

Vītamohaɱ vā cittaɱ vītamohaɱ cittan ti pajānāti.|| ||

Saŋkhittaɱ vā cittaɱ saŋkhittaɱ cittan ti pajānāti.|| ||

Vikkhittaɱ vā cittaɱ vikkhittaɱ cittan ti pajānāti.|| ||

Amahaggataɱ vā cittaɱ amahaggataɱ cittan ti pajānāti.|| ||

Mahaggataɱ vā cittaɱ mahaggataɱ cittan ti pajānāti.|| ||

Sauttaraɱ vā cittaɱ sauttaraɱ cittan ti pajānāti.|| ||

Anuttaraɱ vā cittaɱ anuttaraɱ cittan ti pajānāti.|| ||

Asamāhitaɱ vā cittaɱ asamāhitaɱ cittanti pajānāti.|| ||

Samāhitaɱ vā cittaɱ samāhitaɱ cittan ti pajānāti.|| ||

Avimuttaɱ vā cittaɱ avimuttaɱ cittanti pajānāti.|| ||

Vimuttaɱ vā cittaɱ vimuttaɱ cittan ti pajānāti.|| ||

13. Evaɱ bhāvitesu kho bhikkhave,||
tathāgato catusu iddhipādesu evaɱ bahulīkatesu||
aneka-vihitaɱ pubbe nivāsaɱ anussarati.|| ||

Seyyathīdaɱ:|| ||

"Ekam pi jātiɱ,||
dve pi jātiyo,||
tisso pi jātiyo,||
catasso pi jātiyo,||
pañca pi jātiyo,||
dasa pi jātiyo,||
vīsampi1 jātiyo,||
tiɱsam pi jātiyo,||
cattārīsam pi jātiyo,||
paññāsam pi jātiyo,||
jāti satam pi||
jāti-sahassam pi||
jāti-sata-sahassam pi||
aneke pi saŋvaṭṭakappe||
aneke pi vivaṭṭakappe||
aneke pi saŋvaṭṭa-vivaṭṭakappe.|| ||

Amutrāsiɱ:|| ||

Evaɱ nāmo||
evaɱ gotto||
evaɱ vaṇṇo||
evam āhāro||
evaɱ sukha-dukkha-paṭisaŋvedī||
evam āyu-pariyanto.|| ||

So tato cuto amutra udapādiɱ.|| ||

Tatrāvāsiɱ:|| ||

Evaɱ nāmo||
evaɱ gotto||
evaɱ vaṇṇo||
evam āhāro||
evaɱ sukha-dukkha-paṭisaŋvedī||
evam āyu-pariyanto.|| ||

So tato cuto idhūpapanno" ti.|| ||

Iti sākāraɱ sauddesaɱ aneka-vihitaɱ pubbe nivāsaɱ anussarati.|| ||

14. Evaɱ bhāvitesu kho bhikkhave,||
tathāgato catusu iddhipādesu evaɱ bahulīkatesu||
dibbena cakkhunā visuddhena atikkanta-mānusakena satte passati:|| ||

"Cavamāne uppajjamāne hīne paṇīte suvaṇṇe dubbaṇṇe sugate duggate yathākammupage satte pajānāti:|| ||

Ime vata bhonto sattā||
kāyaduccaritena samantāgatā||
vacīduccaritena samannāgatā||
manoduccaritena samannāgatā||
ariyānaɱ upavādakā||
micchādiṭṭhikā||
micchādiṭṭhikammasamādānā.|| ||

Te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā.|| ||

Ime kho pana bhonto sattā||
kāyasucaritena samannāgatā||
vacīsucaritena samannāgatā||
manosucaritena samannāgatā||
ariyānaɱ anupavādakā||
sammādiṭṭhikā||
sammādiṭṭhikammasamādānā.|| ||

Te kāyassa bhedā param maraṇā sugatiɱ saggaɱ lokaɱ upapannā" ti.|| ||

Iti dibbena cakkhunā visuddhena atikkantamānusakena satte passati:|| ||

"Cavamāne uppajjamāne hīne paṇīte suvaṇṇe dubbaṇṇe sugate duggate yathākammūpage satte pajānātī" ti.|| ||

15. Imesaɱ ca pana bhikkhave catunnam iddhipādānam bhāvitattā bahulīkatattā tathāgato āsavānaɱ khayā anāsavaɱ cetovimuttiɱ paññāvimuttiɱ diṭṭhe va dhamme sayaɱ abhiññā sacchi-katvā upasampajja viharatī ti.|| ||


Contact:
E-mail
Copyright Statement   Webmaster's Page