Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saṃyutta Nikāya
5. Mahā-Vagga
52. Anuruddha Saṃyutta
1. Raho-Gata Vagga

Sutta 3

Sutanu Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[297]

[1][pts] Evam me sutaṃ:|| ||

Ekaṃ samayaṃ āyasmā Anuruddho Sāvatthiyaṃ viharati||
Sutanu-tīre.|| ||

Atha kho sambahulā bhikkhū yen'āyasmā Anuruddho ten'upasaṅkamiṃsu.|| ||

Upasaṅkamitvā āyasmatā anuruddhena saddhiṃ sammodiṃsu.|| ||

Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdiṃsu.|| ||

[298] Eka-m-antaṃ nisinnā kho te bhikkhu āyasmantaṃ Anuruddhaṃ etad avocuṃ:|| ||

"Katamesaṅ āyasmā Anuruddho dhammānaṃ||
bhāvitattā||
bahulī-katattā||
mahābhiññataṃ patto" ti?|| ||

"Catunnaṃ kho ahaṃ āvuso, sati-paṭṭhānānaṃ||
bhāvitattā||
bahulī-katattā||
mahābhiññataṃ patto.|| ||

Katamesaṅ catunnaṃ?|| ||

Idh'āhaṃ āvuso kāye kāy'ānupassī viharāmi,||
ātāpī sampajāno satimā||
vineyya loke abhijjhā domanassaṅ,|| ||

Vedanāsu vedan'ānupassī viharāmi,||
ātāpī sampajāno satimā||
vineyya loke abhijjhā domanassaṃ.|| ||

Citte citt'ānupassī viharāmi,||
ātāpī sampajāno satimā||
vineyya loke abhijjhā domanassaṃ.|| ||

Dhammesu Dhamm'ānupassī viharāmi,||
ātāpī sampajāno satimā||
vineyya loke abhijjhā-domanassaṃ.|| ||

Imesaṃ kho ahaṃ āvuso, catunnaṃ sati-paṭṭhānānaṃ||
bhāvitattā||
bahulī-katattā||
mahābhiññataṃ patto.|| ||

Imesañ ca panāhaṃ āvuso,||
catunnaṃ sati-paṭṭhānānaṃ||
bhāvitattā||
bahulī-katattā||
hīnaṃ dhammaṃ||
hīnato abbhaññāsiṃ,||
majjhimaṃ dhammaṃ majjhimato abbhaññāsiṃ,||
paṇītaṃ dhammaṃ paṇītato abbhaññāsin" ti.|| ||

 


Contact:
E-mail
Copyright Statement