Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya,
V: Mahā Vagga
52. Anuruddha Saɱyutta
I. Rahogata Vagga

Adapted from the 1995 edition of the digital version of the Sri Lanka Buddha Jayanti Tripitaka Series.

Sutta 4

Paṭhama Kaṇṭakī Suttaɱ

 


 

[1][pts][olds] Evam me sutaɱ:|| ||

Ekaɱ samayaɱ āyasmā ca Anuruddho āyasmā ca Sāriputto āyasmā ca Mahā Moggallāno Sākete viharanti Kaṇṭakīvane.|| ||

2. Atha kho āyasmā ca Sāriputto āyasmā ca Mahā Moggallāno sāyaṇha-samayaɱ paṭisallāṇā vuṭṭhitā yen'āyasmā Anuruddho ten'upasankamiɱsu.|| ||

Upasaŋkamitvā āyasmatā Anuruddhena saddhiɱ sammodiɱsu.|| ||

Sammodanīyaɱ kathaɱ sāraṇīyaɱ vīti-sāretvā eka-m-antaɱ nisīdiɱsu.|| ||

3. Eka-m-antaɱ nisinno kho āyasmā Sāriputto āyasmantaɱ Anuruddhaɱ etad avoca:|| ||

"Sekhena āvuso, Anuruddha, bhikkhunā katame dhammā upasampajja vihātabbā" ti?|| ||

Sekhena āvuso Sāriputta, bhikkhunā cattāro sati-paṭṭhānā upasampajja vihātabbā.|| ||

Katame cattāro?|| ||

4. Idh'āvuso bhikkhu kāye kāy'ānupassī viharati ātāpī sampajāno satimā vineyya loke abhijjhā-domanassaɱ.|| ||

Vedanāsu vedan'ānupassī viharati, ātāpī sampajāno satimā vineyya loke abhijjhā-domanassaɱ.|| ||

Citte citt'ānupassī viharati ātāpī sampajāno satimā vineyya loke abhijjhā domanassaɱ.|| ||

Dhammesu Dhamm'ānupassī viharati ātāpī sampajāno satimā vineyya loke abhijjhā-domanassaɱ.|| ||

Sekhena āvuso Sāriputta, bhikkhunā ime cattāro sati-paṭṭhānā upasampajja vihātabbāti.|| ||

 


 

Sutta 5

Dutiya Kaṇṭakī Suttaɱ

 


 

[1][pts][olds] Evam me sutaɱ:|| ||

2. Sākete nidānam.|| ||

Eka-m-antaɱ nisinno kho āyasmā Sāriputto āyasmantaɱ Anuruddhaɱ etad avoca:|| ||

3. "Asekhena āvuso, Anuruddha, bhikkhunā katame dhammā upasampajja vihātabbā" ti?|| ||

Asekhena āvuso Sāriputta, bhikkhunā cattāro sati-paṭṭhānā upasampajja vihātabbā.|| ||

Katame cattāro?|| ||

4. Idh'āvuso bhikkhu kāye kāy'ānupassī viharati ātāpī sampajāno satimā vineyya loke abhijjhā-domanassaɱ.|| ||

Vedanāsu vedan'ānupassī viharati, ātāpī sampajāno satimā vineyya loke abhijjhā-domanassaɱ.|| ||

Citte citt'ānupassī viharati ātāpī sampajāno satimā vineyya loke abhijjhā domanassaɱ.|| ||

Dhammesu Dhamm'ānupassī viharati ātāpī sampajāno satimā vineyya loke abhijjhā-domanassaɱ.|| ||

Asekhena āvuso Sāriputta, bhikkhunā ime cattāro sati-paṭṭhānā upasampajja vihātabbā ti.|| ||

 


 

Sutta 6

Tatiya Kaṇṭakī Suttaɱ

 


 

[1][pts][olds] Evam me sutaɱ:|| ||

2. Sākete nidānam.|| ||

Eka-m-antaɱ nisinno kho āyasmā Sāriputto āyasmantaɱ Anuruddhaɱ etad avoca:|| ||

3. Katamesaɱ āyasmā Anuruddho dhammānaɱ bhāvitattā bahulī-katattā mahābhiññataɱ patto ti?|| ||

Catunnaɱ khvāhaɱ āvuso, sati-paṭṭhānānaɱ bhāvitattā bahulī-katattā mahābhiññataɱ patto.|| ||

Katamesaɱ catunnaɱ?|| ||

4. Idh'āvuso bhikkhu kāye kāy'ānupassī viharati ātāpī sampajāno satimā vineyya loke abhijjhā-domanassaɱ.|| ||

Vedanāsu vedan'ānupassī viharati, ātāpī sampajāno satimā vineyya loke abhijjhā-domanassaɱ.|| ||

Citte citt'ānupassī viharati ātāpī sampajāno satimā vineyya loke abhijjhā domanassaɱ.|| ||

Dhammesu Dhamm'ānupassī viharati ātāpī sampajāno satimā vineyya loke abhijjhā-domanassaɱ.|| ||

5. Imesaɱ khvāhaɱ āvuso catunnaɱ sati-paṭṭhānānaɱ bhāvitattā bahulī-katattā mahābhiññataɱ patto.|| ||

Imesañ ca pan'āhaɱ āvuso catunnaɱ sati-paṭṭhānānaɱ bhāvitattā bahulī-katattā sahassaɱ lokaɱ abhijānāmī ti.|| ||


Contact:
E-mail
Copyright Statement