Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
54 Ānāpāna Saŋyutta

1. Ekadhammavaggo

Sutta 9

Vesālī or Asubha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[320]

[1-2][pts][wp][bd][than] Evam me sutaɱ ekaɱ samayam Bhagavā Vesāliyaɱ viharati Mahāvane Kūṭāgārasālāyaɱ.|| ||

[2] Tena kho pana samayena Bhagavā bhikkhūnaɱ aneka-pariyāyena asubhakathaɱ katheti.||
Asubhāya vaṇṇaɱ bhāsati,||
asubhabhāvanāya vaṇṇaɱ bhāsati.|| ||

[3] Atha kho Bhagavā bhikkhū āmantesi:||
"Icchāmahaɱ bhikkhave,||
addhamāsaɱ paṭisallīyituɱ.||
Namhi kenaci upasaŋkamitabbo aññatra ekena piṇḍapātanīhārakenā" ti.|| ||

Evaɱ bhante ti kho te bhikkhū Bhagavāto paṭissutvā nāssudha koci Bhagavāntaɱ upasaŋkamati aññatra ekena piṇḍapātanīhārakena.|| ||

[4] Atha kho te bhikkhū Bhagavā aneka-pariyāyena asubhakathaɱ kathesi asubhāya vaṇṇaɱ bhāsati.||
Asubhabhāvanāya vaṇṇaɱ bhāsatī ti||
anekākāra-vokāraɱ asubhabhāvanānuyogam anuyuttā viharanti.|| ||

Te iminā kāyena aṭṭīyamānā harāyamānā jigucchamānā satthahārakaɱ pariyesanti.||
Dasa pi bhikkhū ekāhena satthaɱ āharanti.||
Vīsatim pi bhikkhū ekāhena satthaɱ āharanti.||
Tiɱsam pi bhikkhū ekāhena satthaɱ āharanti.|| ||

[5] Atha kho Bhagavā tassa uḍḍhamāsassa accayena paṭisallānā vuṭṭhito āyasmantaɱ Ānandaɱ āmantesi:|| ||

"Kiɱ nu kho Ānanda,||
tanubhūto viya bhikkhūsaŋgho" ti.|| ||

[6] Tathā hi pana bhante Bhagavā bhikkhūnaɱ aneka-pariyāyena asubhakathaɱ kathesi asubhāya vaṇṇaɱ [321] bhāsati,||
asubhabhāvanāya vaṇṇaɱ bhāsati.||
[te ca bhante, bhikkhū:||
"Bhagavā kho aneka-pariyāyena asubhakathaɱ kathesi.||
Asubhāya vaṇṇaɱ bhāsati,||
asubhabhāvanāya vaṇṇaɱ bhāsatī" ti] anekākāravokāraɱ asubhabhāvanānuyogam anuyuttā viharanti.|| ||

Te iminā kāyena aṭṭīyamānā harāyamānā satthahārakaɱ pariyesanti dasa pi bhikkhū vīsampi tiŋsam pi bhikkhū ekāhena satthaɱ āharanti.|| ||

Sādhu bhante, Bhagavā aññam pariyāyaɱ ācikkhatu tathā yathā-yaɱ bhikkhūsaŋgho aññāya saṇṭhaheyyā" ti.|| ||

[7] Tenah'Ānanda yāvatikā bhikkhū Vesāliɱ upanissāya viharanti,||
te sabbe upaṭṭhānasālāyaɱ sannipātehī ti.|| ||

Evaɱ bhante' ti kho āyasmā Ānando Bhagavāto paṭissutvā yāvatikā bhikkhū Vesāliɱ upanissāya viharanti,||
te sabbe upaṭṭhānasālāyaɱ sannipātetvā yena Bhagavā ten'upasaŋkami.||
Upasaŋkamitvā Bhagavāntaɱ etad avoca:||
"Sannipatito bhante bhikkhūsaŋgho yassa dāni Bhagavā kālaɱ maññatī" ti.|| ||

[8] Atha kho Bhagavā yena upaṭṭhānasālā ten'upasaŋkami.||
Upasaŋkamitvā paññatte āsane nisīdi.||
Nisajja kho Bhagavā bhikkhū āmantesi:|| ||

[9] "Ayam pi kho bhikkhave, ānāpānasati-samādhi bhāvito bahulīkato santo c'eva paṇīto ca asecanako sukho ca vihāro uppannuppanne ca pāpake akusale dhamme ṭhānaso antaradhāpeti vūpasameti.|| ||

[10] seyyathā pi, bhikkhave, gimhānaɱ pacchime māse ūhataɱ rajojallaɱ,||
tam enaɱ mahā akālamegho ṭhānaso antaradhāpeti vūpasameti||
Evam eva kho bhikkhave ānāpānasati-samādhi bhāvito bahulīkato santo c'eva paṇīto [322] ca asecanako ca sukho ca vihāro uppannuppanne ca pāpake akusale dhamme ṭhānaso antaradhāpeti vūpasameti.|| ||

[11] Kathaɱ bhāvito bhikkhave, ānāpānasati-samādhi kathaɱ bahulīkato santo c'eva paṇīto ca asecanako ca sukho ca vihāro uppannuppanne ca pāpake akusale dhamme ṭhānaso antaradhāpeti vūpasameti?|| ||

[12] Idha, bhikkhave,, bhikkhū araññagato vā rukkhamūlagato vā suññāragato vā nisīdati pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭhapetvā so sato va assasati sato va passasati.|| ||

[13] Dīghaɱ vā assasanto dīghaɱ assasāmīti pajānāti.||
Dīghaɱ vā passasanto dīghaɱ passasāmīti pajānāti.|| ||

Rassaɱ vā assasanto rassaɱ assasāmīti pajānāti.||
Rassaɱ vā passasanto rassaɱ passasāmīti pajānāti.|| ||

[14] Sabbakāyapaṭisaŋvedī assasissāmīti sikkhati.||
Sabbakāyapaṭisaŋvedī passissāmīti sikkhati.|| ||

Passam-bhayaɱ kāyasankhāraɱ assasissāmīti sikkhati.||
Passam-bhayaɱ kāyasankhāraɱ passasissāmīti sikkhati.|| ||

[15] Pītipaṭisaŋvedī assasissāmīti sikkhati.||
Pītipaṭisaŋvedī passasissāmīti sikkhati.|| ||

Sukhapaṭisaŋvedī assasissāmīti sikkhati.||
Sukhapaṭisaŋvedī passasissāmīti sikkhati.|| ||

Cittasankhārapaṭisaŋvedī assasissāmīti sikkhati.||
Cittasankhārapaṭisaŋvedī passasissāmīti sikkhati.|| ||

Passam-bhayaɱ cittasankhāraɱ assasissāmīti sikkhati.||
Passam-bhayaɱ cittasankhāraɱ passasissāmīti sikkhati.|| ||

[16] Cittasankhārapaṭisaŋvedī assasissāmīti sikkhati.||
Cittasankhārapaṭisaŋvedī passasissāmīti sikkhati.|| ||

Passam-bhayaɱ cittasankhāraɱ assasissāmīti sikkhati.||
Passam-bhayaɱ cittasankhāraɱ passasissāmīti sikkhati.|| ||

Cittapaṭisaŋvedī assasissāmīti sikkhati.||
Cittapaṭisaŋvedī passasissāmīti sikkhati.|| ||

[17] Abhippamodayaɱ cittaɱ assasissāmīti sikkhati.||
Abhippamodayaɱ cittaɱ passasissāmīti sikkhati.|| ||

Samādahaɱ cittaɱ assasissāmīti sikkhati.||
Samādahaɱ cittaɱ passasissāmīti sikkhati.|| ||

Vimocayaɱ cittaɱ assasissāmīti sikkhati.||
Vimocayaɱ cittaɱ passasissāmīti sikkhati.|| ||

[18] Aniccānupassī assasissāmīti sikkhati.||
Aniccānupassī passasissāmīti sikkhati.|| ||

Virāgānupassī assasissāmīti sikkhati.||
Virāgānupassī passasissāmīti sikkhati.|| ||

Nirodhānupassī assasissāmīti sikkhati.||
Nirodhānupassī passasissāmīti sikkhati.|| ||

Paṭinissaggānupassī passasissāmīti sikkhati.||
Paṭinissaggānupassī passasissāmīti sikkhati.|| ||

[19] Evaɱ bhāvito kho bhikkhave, ānāpānasati-samādhi evaɱ bahulīkato santo c'eva paṇīto ca asecanako ca sukho ca vihāro uppannuppanne ca pāpake akusale dhamme ṭhānaso antaradhāpeti vūpasametī ti.|| ||

 


Contact:
E-mail
Copyright Statement   Webmaster's Page