Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
54 Ānāpāna Saŋyutta

1. Ekadhammavaggo

Sutta 10

Kimbila Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1994 Pali Text Society Saŋyutta-Nikaya Part V, edited by M. Leon Feer

 


 

[1-2][pts][wp][bd] Evaɱ me sutaɱ ekaɱ samayaɱ Bhagavā Kimbilāyaɱ viharati Veluvane.|| ||

[2] Tatra kho Bhagavā āyasmantaɱ Kimbilaɱ āmantesi:||
"Kathaɱ bhāvito nu kho Kimbila ānāpānasati-samādhi kathaɱ bahulīkato mahapphalo hoti mahānisamso ti.|| ||

Evaɱ vutte āyasmā Kimbilo tuṇhī ahosi.|| ||

[3] Dutiyam pi kho Bhagavā āyasmantaɱ Kimbilaɱ āmantesi:||
"Kathaɱ bhāvito kho Kimbila ānāpānasati-samādhi kathaɱ bahulīkato mahapphalo hoti mahānisamso" ti.|| ||

Dutiyam pi kho āyasmā Kimbilo tuṇhī ahosi.|| ||

[4] Tatiyam pi kho Bhagavā āyasmantaɱ Kimbilaɱ āmantesi:||
"Kathaɱ bhāvito nu kho Kimbila, ānāpānasati-samādhi kathaɱ bahulīkato mahapphalo hoti mahānisamso" ti.|| ||

Tatiyam pi kho āyasmā Kimbilo tuṇhī ahosi.|| ||

[323] [5] Evaɱ vutte āyasmā Ānando Bhagavāntaɱ etad avoca:|| ||

"Etassa Bhagavā kālo||
etassa Sugata kālo yaɱ Bhagavā ānāpānasati-samādhiɱ bhāseyya.||
Bhagavato sutvā bhikkhū dhāressantī" ti.|| ||

Tenah'Ānanda suṇāhi sādhukaɱ manasi-karohi bhāsissāmī ti.|| ||

Evaɱ bhante ti kho āyasmā Ānando Bhagavāto paccassosi.|| ||

[6] Bhagavā etad avoca:|| ||

"Kathaɱ bhāvito ca Ānanda ānāpānasati-samādhi kathaɱ bahlīkato mahapphalo hoti mahānisamso:|| ||

[7] Idha, bhikkhave,, bhikkhū araññagato vā rukkhamūlagato vā suññāragato vā nisīdati pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭhapetvā so sato va assasati sato va passasati.|| ||

[8] Dīghaɱ vā assasanto dīghaɱ assasāmīti pajānāti.||
Dīghaɱ vā passasanto dīghaɱ passasāmīti pajānāti.|| ||

Rassaɱ vā assasanto rassaɱ assasāmīti pajānāti.||
Rassaɱ vā passasanto rassaɱ passasāmīti pajānāti.|| ||

[9] Sabbakāyapaṭisaŋvedī assasissāmīti sikkhati.||
Sabbakāyapaṭisaŋvedī passissāmīti sikkhati.|| ||

Passam-bhayaɱ kāyasankhāraɱ assasissāmīti sikkhati.||
Passam-bhayaɱ kāyasankhāraɱ passasissāmīti sikkhati.|| ||

[10] Pītipaṭisaŋvedī assasissāmīti sikkhati.||
Pītipaṭisaŋvedī passasissāmīti sikkhati.|| ||

Sukhapaṭisaŋvedī assasissāmīti sikkhati.||
Sukhapaṭisaŋvedī passasissāmīti sikkhati.|| ||

Cittasankhārapaṭisaŋvedī assasissāmīti sikkhati.||
Cittasankhārapaṭisaŋvedī passasissāmīti sikkhati.|| ||

Passam-bhayaɱ cittasankhāraɱ assasissāmīti sikkhati.||
Passam-bhayaɱ cittasankhāraɱ passasissāmīti sikkhati.|| ||

[11] Cittasankhārapaṭisaŋvedī assasissāmīti sikkhati.||
Cittasankhārapaṭisaŋvedī passasissāmīti sikkhati.|| ||

Passam-bhayaɱ cittasankhāraɱ assasissāmīti sikkhati.||
Passam-bhayaɱ cittasankhāraɱ passasissāmīti sikkhati.|| ||

Cittapaṭisaŋvedī assasissāmīti sikkhati.||
Cittapaṭisaŋvedī passasissāmīti sikkhati.|| ||

[12] Abhippamodayaɱ cittaɱ assasissāmīti sikkhati.||
Abhippamodayaɱ cittaɱ passasissāmīti sikkhati.|| ||

Samādahaɱ cittaɱ assasissāmīti sikkhati.||
Samādahaɱ cittaɱ passasissāmīti sikkhati.|| ||

Vimocayaɱ cittaɱ assasissāmīti sikkhati.||
Vimocayaɱ cittaɱ passasissāmīti sikkhati.|| ||

[13] Aniccānupassī assasissāmīti sikkhati.||
Aniccānupassī passasissāmīti sikkhati.|| ||

Virāgānupassī assasissāmīti sikkhati.||
Virāgānupassī passasissāmīti sikkhati.|| ||

Nirodhānupassī assasissāmīti sikkhati.||
Nirodhānupassī passasissāmīti sikkhati.|| ||

Paṭinissaggānupassī passasissāmīti sikkhati.||
Paṭinissaggānupassī passasissāmīti sikkhati.|| ||

[14] Evaɱ bhāvito kho Ānanda, ānāpānasati-samādhi evaɱ bahulīkato mahapphalo hoti mahānisamso.|| ||

[15] Yasmiɱ samaye Ānanda bhikkhū||
dīghaɱ vā assasanto dīghaɱ assasāmīti pajānāti,||
dīghaɱ vā passasanto dīghaɱ passasāmīti pajānā ti,||
rassaɱ vā assasanto rassaɱ assasāmīti pajānāti.||
rassaɱ vā passasanto rassaɱ passasāmīti pajānā ti.||
sabbakāyapaṭisaŋvedī assasissāmī ti sikkhati,||
sabbakāyapaṭisaŋvedī passasissāmīti sikkhati,||
passam-bhayaɱ kāyasankhāraɱ assasissāmīti sikkhati,||
passam-bhayaɱ kāyasankhāraɱ passasissāmīti sikkhati,||
Kāye kāyānupassī Ānanda bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.|| ||

Taɱ kissa hetu?|| ||

[16] Kāyaññatarāhaɱ Ānanda etaɱ vadāmi yad idaɱ assāsapassāsaɱ.||
Tasmā ti h'Ānanda, kāye kāyānupassī bhikkhū tasmiɱ samaye viharati||
ātāpī sampajāno satimā vineyya loke abhijjhādomanassaɱ.|| ||

[17] Tasmiɱ samaye Ānanda, bhikkhū pītipaṭisaŋvedī assasissāmīti sikkhati,||
pītipaṭisaŋvedī passasissāmīti sikkhati,||
sukhapaṭisaɱvidī assasissāmīti sikkhati,||
sukhapaṭisaŋvedī passasissāmīti sikkhati,||
cittasankhārapaṭisaɱ- [324] vedī assasissāmīti sikkhati.||
Cittasankhārapaṭisaŋvedī passasissāmīti sikkhati.||
Passam-bhayaɱ cittasankhāraɱ assasissāmīti sikkhati,||
passam-bhayaɱ cittasankhāraɱ passasissāmīti sikkhati,||
Vedanāsu vedanānupassī Ānanda bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.|| ||

Taɱ kissa hetu?|| ||

[18] Vedanaññatarāhaɱ Ānanda etaɱ vadāmi yad idaɱ assāsapassāsānaɱ sādhukaɱ manasikāraɱ.||
Tasmā ti h'Ānanda vedanāsu vedanānupassī bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.|| ||

[19] Yasmiɱ samaye Ānanda, bhikkhū cittapaṭisaŋvedī assasissāmīti sikkhati,||
cittapaṭisaŋvedī passasissāmīti sikkhati,||
abhippamodayaɱ cittaɱ assasissāmīti sikkhati,||
abhippamodayaɱ cittaɱ passasissāmīti sikkhati,||
samādahaɱ cittaɱ assasissāmīti sikkhati,||
samādahaɱ cittaɱ passasissāmīti sikkhati,||
vimocayaɱ cittaɱ assasissāmīti sikkhati,||
vimocayaɱ cittaɱ passasissāmīti sikkhati,||
Citte cittānupassī Ānanda, bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.|| ||

Taɱ kissa hetu?|| ||

[20] Nāhaɱ Ānanda, muṭṭhassatissa asampajānassa ānāpānasati-samādhi-bhāvanaɱ vadāmi.||
Tasmā ti h'Ānanda, citte cittānupassī bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.|| ||

[21] Yasmiɱ samaye Ānanda, bhikkhū aniccānupassī assasissāmīti sikkhati,||
aniccānupassī passasissāmīti sikkhati,||
virāgānupassī assasissāmīti sikkhati,||
virāgānupassī passasissāmīti sikkhati,||
nirodhānupassī assasissāmīti sikkhati,||
nirodhānupassī passasissāmīti sikkhati,||
paṭinissaggānupassī assasissāmīti sikkhati,||
paṭinissagaggānupassī passasissāmīti sikkhati,||
Dhammesu dhammānupassī Ānanda, bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.|| ||

So yaɱ taɱ hoti abhijjhādomanassānaɱ pahānaɱ,||
taɱ paññāya disvā disvā sādhukaɱ ajjhupekkhitā hoti.||
Tasmā ti h'Ānanda, dhammesu dhammānupassī bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.|| ||

[325] [22] seyyathā pi Ānanda cātummahāpathe mahāpaɱsupuñjo puratthimāya ce pi disāya āgaccheyya sakaṭaɱ vā ratho vā upahanateva taɱ paɱsupuñjaɱ.||
Pacchimāya ce pi disāya āgaccheyya sakaṭaɱ vā ratho vā upahanateva taɱ paɱsupuñjaɱ.||
Uttarāya ce pi disāya āgaccheyya sakaṭaɱ vā ratho vā upahanateva taɱ paɱsupuñjaɱ.||
Dakkhiṇāya ce pi disāya āgaccheyya sakaṭaɱ vā ratho vā upahanateva taɱ paɱsupuñjaɱ.|| ||

Evam eva kho Ānanda, bhikkhū kāye kāyānupassī viharanto pi upahanateva pāpake akusale dhamme.||
Vedanāsu vedanānupassī viharanto pi upahanateva pāpake akusale dhamme.||
Citte cittānupassī viharanto pi upahanateva pāpake akusale dhamme.||
Dhammesu dhammānupassī viharanto pi upahanateva pāpake akusale dhammeti.|| ||

Ekadhammavaggo paṭhamo.|| ||

 


Contact:
E-mail
Copyright Statement   Webmaster's Page