Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga

10. (54) ĀnāpānaSaŋyutta

2. Ānanda
or
Dutiyo vaggo

Sutta 16

Dutiya Bhikkhū Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1994 Pali Text Society Saŋyutta-Nikaya Part V, edited by M. Leon Feer

 


 

[1-2][pts][wp] Savatthi|| ||

Atha kho sambahulā bhikkhū yena Bhagavā ten'upasaŋkamiɱsu.||
Upasaŋkamitvā Bhagavtaɱ abhivādetvā eka-m-antaɱ nisīdiɱsu.|| ||

Bhikkhū saddhiɱ sammodi.|| ||

Eka-m-antaɱ nisinnā kho te bhikkhū Bhagavāntaɱ etad avocuɱ:|| ||

"Atthi nu kho bhikkhave eko dhammā bhāvito bahulīkato cattāro dhamme paripūreti,||
cattāro dhammā bhāvitā bahulīkatā satta dhamme paripūrenti,||
satta dhammā bhāvitā bahulīkatā dve dhamme paripūrentī" ti?|| ||

Bhagavammūlakā no bhante dhammā,||
dhammā Bhagavānnettikā,||
Bhagavāmpaṭisaraṇā.|| ||

Sādhu vata bhante,||
Bhagavāntaɱyeva paṭibhātu etassa bhāsitassa attho,||
Bhagavāto sutvā bhikkhū dhāressantī ti.|| ||

"Atthi bhikkhave eko dhammā bhāvito bahulīkato cattāro dhamme paripūreti,||
cattāro dhammā bhāvitā bahulīkatā satta [335] dhamme paripūrenti,||
satta dhammā bhāvitā bahulīkatā dve dhamme paripūrentī" ti.|| ||

Katamo pana bhikkhave, eko dhammo bhāvito bahulīkato cattāro dhamme paripūrenti,||
cattāro dhammā bhāvitā bahulīkatā satta dhamme paripūrenti,||
satta dhammā bhāvitā bahulīkatā dve dhamme paripūrenti:|| ||

Ānāpānasatisamādhi kho bhikkhave eko dhammo bhāvito bahulīkato cattāro satipaṭṭhāne paripūreti,||
cattāro satipaṭṭhānā bhāvitā bahulīkatā satta bojjhaŋge paripūrenti,||
satta bojjhaŋgā bhāvitā bahulīkatā vijajāvimuttiɱ paripūrenti.|| ||

 

i

 

Kathaɱ bhāvito ca bhikkhave, ānāpānasati-samādhi kathaɱ bahulīkato cattāro satipaṭṭhāne paripūreti:|| ||

Idha, bhikkhave,, bhikkhū araññagato vā rukkhamūlagato vā suññāragato vā nisīdati pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭhapetvā so sato va assasati sato va passasati.|| ||

Dīghaɱ vā assasanto dīghaɱ assasāmīti pajānāti.||
Dīghaɱ vā passasanto dīghaɱ passasāmīti pajānāti.|| ||

Rassaɱ vā assasanto rassaɱ assasāmīti pajānāti.||
Rassaɱ vā passasanto rassaɱ passasāmīti pajānāti.|| ||

Sabbakāyapaṭisaŋvedī assasissāmīti sikkhati.||
Sabbakāyapaṭisaŋvedī passissāmīti sikkhati.|| ||

Passam-bhayaɱ kāyasankhāraɱ assasissāmīti sikkhati.||
Passam-bhayaɱ kāyasankhāraɱ passasissāmīti sikkhati.|| ||

Pītipaṭisaŋvedī assasissāmīti sikkhati.||
Pītipaṭisaŋvedī passasissāmīti sikkhati.|| ||

Sukhapaṭisaŋvedī assasissāmīti sikkhati.||
Sukhapaṭisaŋvedī passasissāmīti sikkhati.|| ||

Cittasankhārapaṭisaŋvedī assasissāmīti sikkhati.||
Cittasankhārapaṭisaŋvedī passasissāmīti sikkhati.|| ||

Passam-bhayaɱ cittasankhāraɱ assasissāmīti sikkhati.||
Passam-bhayaɱ cittasankhāraɱ passasissāmīti sikkhati.|| ||

Cittapaṭisaŋvedī assasissāmīti sikkhati.||
Cittapaṭisaŋvedī passasissāmīti sikkhati.|| ||

Abhippamodayaɱ cittaɱ assasissāmīti sikkhati.||
Abhippamodayaɱ cittaɱ passasissāmīti sikkhati.|| ||

Samādahaɱ cittaɱ assasissāmīti sikkhati.||
Samādahaɱ cittaɱ passasissāmīti sikkhati.|| ||

Vimocayaɱ cittaɱ assasissāmīti sikkhati.||
Vimocayaɱ cittaɱ passasissāmīti sikkhati.|| ||

Aniccānupassī assasissāmīti sikkhati.||
Aniccānupassī passasissāmīti sikkhati.|| ||

Virāgānupassī assasissāmīti sikkhati.||
Virāgānupassī passasissāmīti sikkhati.|| ||

Nirodhānupassī assasissāmīti sikkhati.||
Nirodhānupassī passasissāmīti sikkhati.|| ||

Paṭinissaggānupassī passasissāmīti sikkhati.||
Paṭinissaggānupassī passasissāmīti sikkhati.|| ||

Yasmiɱ samaye bhikkhave bhikkhū dīghaɱ vā assasanto dīghaɱ assasāmīti pajānāti,||
dīghaɱ vā passasanto dīghaɱ passasāmī ti pajānāti.||
Rassaɱ vā assasanto rassaɱ assasāmīti pajānāti,||
rassaɱ vā passasanto rassaɱ passasāmīti pajānāti.||
Sabbakāyapaṭisaŋvedī assasissāmīti sikkhati,||
sabbakāyapaṭisaŋvedī passasissāmīti sikkhati.||
Passam-bhayaɱ kāyasankhāraɱ assasissāmīti sikkhati,||
passam-bhayaɱ kāyasankhāraɱ passasissāmīti sikkhati.||
Kāye kāyānupassī bhikkhave, bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.||
Taɱ kissa hetu?|| ||

Kāyaññatarāhaɱ bhikkhave etaɱ vadāmi, yad idaɱ assāsapassāsaɱ.||
Tasmā ti h'bhikkhave, kāye kāyānupassī bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.|| ||

Yasmiɱ samaye bhikkhave, bhikkhū pītipaṭisaŋvedī assasissāmīti sikkhati,||
pītipaṭisaŋvedī passasissāmiti sikkhati.||
Sukhapaṭisaŋvedī assasissāmīti sikkhati,||
sukhapaṭiɱvedī passasissāmiti sikkhati.||
Cittasankhārapaṭisaŋvedī assasissāmīti sikkhati,||
cittasankhārapaṭisaŋvedī passasissāmīti sikkhati.||
Passam-bhayaɱ cittasankhāraɱ assasissāmīti sikkhati,||
passam-bhayaɱ cittasankhāraɱ passasissāmīti sikkhati.||
Vedanāsu vedanānupassī bhikkhave, bhikkhū tasmiɱ samaye viharati ātāpī sampajāno satimā vineyaya loke abhijjhādomanassaɱ.||
Taɱ kissa hetu?|| ||

Vedanaññatarāhaɱ bhikkhave, etaɱ vadāmi yad idaɱ assāsapassāsānaɱ sādhukaɱ manasikāraɱ.||
Tasmā ti ha bhikkhave, vedanāsu vedanānupassī bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.|| ||

Yasmiɱ samaye bhikkhave, bhikkhū cittapaṭisaŋvedī assasissāmīti sikkhati,||
cittapaṭisaŋvedī passasissāmīti sikkhati.||
Abhippamodayaɱ cittaɱ assasissāmīti sikkhati,||
abhippamodayaɱ cittaɱ passasissāmīti sikkhati.||
Samādahaɱ cittaɱ assasissāmīti sikkhati,||
samādahaɱ cittaɱ passasissāmīti sikkhati.||
Vimocayaɱ cittaɱ assasissāmīti sikkhati,||
vimocayaɱ cittaɱ passasissāmīti sikkhati.||
Citte cittānupassī bhikkhave, bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.||
Taɱ kissa hetu?|| ||

Nāhaɱ bhikkhave, muṭṭhassatissa asampajānassa ānāpānasati-samādhibhāvanaɱ vadāmi.||
Tasmā ti ha bhikkhave, citte cittānupassī bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.|| ||

Yasmiɱ samaye bhikkhave, bhikkhū aniccānupassī||
assasissāmīti sikkhati,||
aniccānupassī passasissāmīti sikkhati.||
Virāgānupassī assasissāmīti sikkhati,||
virāgānupassi passasissāmīti sikkhati.||
Nirodhānupassī assasissāmīti sikkhati,||
nirodhānupassī passasissāmīti sikkhati.||
Paṭinissaggānupassī assasissāmīti sikkhati,||
paṭinissaggānupassī passasissāmīti sikkhati.||
Dhammesu dhammānupassī bhikkhave, bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.|| ||

So yaɱ taɱ hoti abhijjhādomanassānaɱ pahānaɱ taɱ paññāya disvā sādhukaɱ ajjhupekkhitā hoti.||
Tasmā ti h'bhikkhave, dhammesu dhammānupassī bhikkhū tasmiɱ samaye viharati ātāpī sampajāno satimā vineyya loke abhijjhādomanassaɱ.|| ||

Evaɱ bhāvito kho bhikkhave ānāpānasati-samādhi evaɱ bahulīkato cattāro satipaṭṭhāne paripūreti.|| ||

 

ii

 

Kathaɱ bhāvitā ca bhikkhave cattāro satipaṭṭhānā kathaɱ bahulīkatā satta sambojjhaŋge paripūrenti.|| ||

Yasmiɱ samaye bhikkhave bhikkhū kāye kāyānupassī viharati upaṭṭhitāsati tasmiɱ samaye bhikkhave bhikkhuno sati hoti asammuṭṭhā.||
Yasmiɱ samaye bhikkhave bhikkhūno upaṭṭhitā sati asammuṭṭhā satisambojjhaŋgo tasmiɱ samaye bhikkhūno āraddho hoti.||
Satisambojjhaŋgaɱ tasmiɱ samaye bhikkhave bhikkhū bhāveti.||
Satisambojjhaŋgo tasmiɱ samaye bhikkhūno bhāvanā-pāripūriɱ gacchati.||
So tathā sato viharanto taɱ dhammaɱ paññāya pavicinati pavicarati parivīmaɱsam āpajjati.|| ||

Yasmiɱ samaye bhikkhave, bhikkhū tathā sato viharanto taɱ dhammaɱ paññāya pavicināti parivīmaɱsam āpajjati.||
Dhammavicayasambojjhaŋgo tasmiɱ samaye bhikkhūno āraddho hoti.||
Dhammavicayasambojjhaŋgaɱ tasmiɱ samaye bhikkhū bhāveti.||
Dhammavicayasambojjhaŋgo tasmiɱ samaye bhikkhūno bhāvanāpāripūriɱ gacchati.||
Tassa taɱ dhammaɱ paññāya pavicanato pavicarato parivīmaɱsam āpajjato āraddhaɱ hoti viriyaɱ asallīnaɱ.|| ||

Yasmiɱ samaye bhikkhave, bhikkhūno taɱ dhammaɱ paññāya pavicinato pavicarato parivīmaɱsam āpajjato āraddhaɱ hoti viriyaɱ asallīnaɱ,||
viriyasambojjhaŋgo tasmiɱ samaye bhikkhūno āraddho hoti.||
Viriyasambojjhaŋgaɱ tasmiɱ samaye bhikkhū bhāveti.||
Viriyasambojjhaŋgo tasmiɱ samaye bhikkhūno bhāvanāpāripūriɱ gacchati.||
Āraddhaviriyassa uppajjati pīti nirāmisā.|| ||

Yasmiɱ samaye bhikkhave, bhikkhūno āraddhaviriyassa uppajjati pīti nirāmisā,||
pītisambojjhaŋgo tasmiɱ samaye bhikkhūno āraddho hoti.||
Pītisambojjhaŋgaɱ tasmiɱ samaye bhikkhū bhāveti.||
Pītisambojjhaŋgo tasmiɱ samaye bhikkhūno bhāvanāpāripūriɱ gacchati.||
Pītimanassa kāyopi passambhati. Cittampi passambhati.|| ||

Yasmiɱ samaye bhikkhave bhikkhūno pītimanassa kāyo pi passambhati,||
cittam pi passambhati,||
passaddhisambojjhaŋgo tasmiɱ samaye bhikkhūno āraddho hoti.||
Passaddhisambojjhaŋgaɱ tasmiɱ samaye bhikkhū bhāveti.||
Passaddhisambojjhaŋgo tasmiɱ samaye bhikkhūno bhāvanāpāripūriɱ gacchati.||
Passaddhakāyassa sukhino cittaɱ samādhiyati.|| ||

Yasmiɱ samaye bhikkhave bhikkhūno passaddhakāyassa sukhino cittaɱ samādhiyati,||
samādhisambojjhaŋgo tasmiɱ samaye bhikkhūno āraddho hoti.||
Samādhisambojjhaŋgaɱ tasmiɱ samayo bhikkhū bhāveti.||
Samādhisambojjhaŋgo tasmiɱ samaye bhikkhūno bhāvanāpāripūriɱ gacchati.||
So tathā samāhitaɱ cittaɱ sādhukaɱ ajjhupekkhitā hoti.|| ||

Yasmiɱ samaye bhikkhave bhikkhū tathā samāhitaɱ cittaɱ sādhukaɱ ajjhupekkhitā hoti,||
upekhāsambojjhaŋgo tasmiɱ samaye bhikkhūno āraddho hoti.||
Upekhāsambojjhaŋgaɱ tasmiɱ samaye bhikkhū bhāveti.||
Upekhāsambojjhaŋgo tasmiɱ samaye bhikkhūno bhāvanāpāripūriɱ gacchati.|| ||

Yasmiɱ samaye bhikkhave bhikkhū vedanāsu vedanānupassī...||
Citte cittānupassī...||
Dhammesu dhammānupassī viharati upaṭṭhitāsati tasmiɱ samaye bhikkhave bhikkhuno sati hoti asammuṭṭhā.|| ||

Yasmiɱ samaye bhikkhave bhikkhūno upaṭṭhitā sati hoti asammuṭṭhā,||
satisambojjhaŋgo tasmiɱ samaye bhikkhūno āraddho hoti.||
Satisbojjhaŋgaɱ tasmiɱ samaye bhikkhū bhāveti.||
Satisambojjhaŋgo tasmiɱ samaye bhikkhūno bhāvanā-pāripūriɱ gacchati.|| ||

Yathā pathamaɱ satipaṭṭhānam evaɱ vitthāretabbaɱ|| ||

So tathā sato viharanto taɱ dhammaɱ paññāya pavicanati pavicarati parivīmaɱsamāpajjati.|| ||

Yasmiɱ samaye bhikkhave bhikkhū tathā sato viharanto taɱ dhammaɱ paññāya pavicanāti.|| ||

Pavicarati parivīmaɱsamāpajjati.|| ||

Dhammavicayasambojjhaŋgo tasmiɱ samaye bhikkhūno āraddho hoti.|| ||

Dhammavicayasambojjhaŋgaɱ tasmiɱ samaye bhikkhūno bhāveti.|| ||

Dhammavicayasambojjhaŋgo tasmiɱ samaye bhikkhūno bhāvanāpāripūriɱ gacchati.|| ||

Tassa taɱ dhammaɱ paññāya pavicanato pavicarato parivīmaɱsamāpajjato āraddhaɱ hoti viriyaɱ asallīnaɱ.|| ||

Yasmiɱ samaye bhikkhave bhikkhūno taɱ dhammaɱ paññāya pavicanato pavicarato parivīmaɱsamāpajjato āraddhaɱ hoti viriyaɱ asallīnaɱ,||
viriyasambojjhaŋgo tasmiɱ samaye bhikkhūno āraddho hoti.|| ||

Viriyasambojjhaŋgaɱ tasmiɱ samaye bhikkhū bhāveti.|| ||

Viriyasambojjhaŋgo tasmiɱ samaye bhikkhūno bhāvanāpāripūriɱ gacchati.|| ||

Āraddhaviriyassa uppajjati pīti nirāmisā.|| ||

Yasmiɱ samaye bhikkhave bhikkhūno āraddhaviriyassa uppajjati pīti nirāmisā,||
pītisambojjhaŋgo tasmiɱ samaye bhikkhūno āraddho hoti.|| ||

Pitisambojjhaŋgo tasmiɱ samaye bhikkhūno bhāvanāpāripūriɱ gacchati.|| ||

Pītimanassa kāyopi passambhati.|| ||

Cittampi passambhati.|| ||

Yasmiɱ samaye bhikkhave bhikkhūno pītimanassa kāyo pi passambhati,||
cittampi passambhati,||
passaddhisambojjhaŋgo tasmiɱ samaye bhikkhūno āraddho hoti.|| ||

Passaddhisambojjhaŋgaɱ tasmiɱ samaye bhikkhū bhāveti.|| ||

Passaddhisambijjheŋgo tasmiɱ samaye bhikkhūno bhāvanāpāripūriɱ gacchati.|| ||

Passaddhakāyassa sukhino cittaɱ samādhiyati.|| ||

Yasmiɱ samaye bhikkhave, bhikkhūno passaddhakāyassa sukhino cittaɱ samādhiyati,||
samādhisambojjhaŋgo tasmiɱ samaye bhikkhūno āraddho hoti.|| ||

Samādhisambojjhaŋgaɱ tasmiɱ samaye bhikkhū bhāveti.|| ||

Samādhisambojjhaŋgo tasmiɱ samaye bhikkhūno bhāvanāpāripūriɱ gacchati.|| ||

So tathā samāhitaɱ cittaɱ sādhukaɱ ajjhupekkhitā hoti.|| ||

Yasmiɱ samaye bhikkhave, bhikkhū tathā samāhitaɱ cittaɱ sādhukaɱ ajjhupekkhitā hoti,||
upekhāsambojjhaŋgo tasmiɱ samaye bhikkhūno āraddho hoti.|| ||

Upekhāsambojjhaŋgaɱ tasmiɱ samaye bhikkhū bhāveti.|| ||

Upekhāsambojjhaŋgo tasmiɱ samaye bhikkhūno bhāvanāpāripūriɱ gacchati.|| ||

Evaɱ bhāvitā kho bhikkhave cattāro satipaṭṭhānā evaɱ bahulīkatā satta bojjhaŋge paripūrenti.|| ||

 

iii

 

Kathaɱ bhāvitā ca bhikkhave satta bojjhaŋgā kathaɱ bahulīkatā vijjāvimuttiɱ paripūrenti:|| ||

Idh'bhikkhave, bhikkhū satisambojjhaŋgaɱ bhāveti vivekanissitaɱ||
virāganissitaɱ nirodhanissitaɱ vossaggapariṇāmi.|| ||

Dhammavicayasambojjhaŋgaɱ bhāveti vivekanisissitaɱ virāganissitaɱ nirodhanissitaɱ vossaggapariṇāmiɱ.|| ||

Viriyasambojjhaŋgaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ.|| ||

Pītisambojjhagaɱ bhāveti vivekanissitaɱ virāganissitaɱ nirodhanissitaɱ vossaggapariṇāmi.|| ||

Passaddhisambojjhaŋgaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ.|| ||

Samādhisambojjhaŋgaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ.|| ||

Upekkhāsambojjhaŋgaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ.|| ||

Evaɱ bhāvitā kho bhikkhave, satta bojjhaŋgā evaɱ bahulīkatā vijjāvimuttiɱ paripūrentī ti.|| ||

Yathā purimasuttanto evam vitthāretabbaɱ|| ||

 


Contact:
E-mail
Copyright Statement   Webmaster's Page