Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
I. Veḷudvāra Vagga

Sutta 1

Rāja Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evam me sutaɱ:|| ||

Ekaɱ samayam Bhagavā Sāvatthiyaɱ viharati Jetavane Anāthapindikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Kiñcā pi bhikkhave, rājā cakkavatti catunnaɱ dīpānaɱ issariyādhipaccaɱ rajjaɱ kāretvā kāyassa bhedā param maraṇā sugatiɱ saggaɱ lokaɱ uppajjati,||
devānaɱ Tāvatiɱsānaɱ sahavyataɱ.|| ||

So tattha Nandana vane accharāsaŋghaparivuto dibbehi ca pañcahi kāma-guṇehi samappito samaŋgībhūto parivāreti.|| ||

So catūhi dhammehi asamannāgato.|| ||

Atha kho so aparimutto ca nirayā,||
aparimutto tiracchānayoniso,||
aparimutto pettivisayā,||
aparimutto ca apāya-duggati-vinipātā.|| ||

Kiñcā pi bhikkhave, ariyasāvako piṇḍiyā lopena yāpeti nantatāni ca dhāreti.|| ||

So catūhi dhammehi samannāgato.|| ||

Atha kho so parimutto ca nirayā,||
parimutto tiracchānayoniyā,||
parimutto pettivisayā,||
parimutto apāya-duggati-vinipātā.|| ||

Katamehi catūhi?|| ||

[343] Idha bhikkhave, ariyasāvako Buddhe avecca pasādena samannāgato hoti:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Dhamme avecca pasādena samannāgato hoti:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Saŋghe avecca pasādena samannāgato hoti:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Ariyakantehi sīlehi samannāgato hoti||
akhaṇḍehi||
acchiddehi||
asabalehi||
akammāsehi||
bhujissehi||
viññuppasatthehi||
aparāmaṭṭhehi||
samādhi-saɱvattanikehi.|| ||

Imehi catūhi dhammehi samannāgato hoti.|| ||

Yo ca bhikkhave, catunnaɱ dīpānaɱ paṭilābho,||
yo catunnaɱ dhammānaɱ paṭilābho,||
catunnaɱ dīpānaɱ paṭilābho||
catunnaɱ dhammānaɱ paṭilābhassa||
kalaɱ n'agghati solasin" ti.|| ||

 


Contact:
E-mail
Copyright Statement   Webmaster's Page