Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
I. Veḷudvāra Vagga

Sutta 3

Dīghāvu Upāsaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayaɱ Bhagavā Rājagahe viharati Veluvane Kalandakanivāpe.|| ||

Tena kho pana samayena Dīghāvu upāsako ābādhiko hoti||
dukkhito||
bāḷahgilāno.|| ||

Atha kho Dīghāvu upāsako pitaraɱ Jotikaɱ gahapatiɱ āmantesi:|| ||

"Ehi tvaɱ gahapati,||
yena Bhagavā ten'upasaŋkama.|| ||

Upasaŋkamitvā mama vacanena Bhagavato pāde sirasā vanda:|| ||

'Dīghāvu bhante, upāsako ābādhiko hoti||
dukkhito||
bāḷahgilāno.|| ||

So Bhagavato pāde sirasā vandati.|| ||

Evañ ca vadeti:|| ||

'Sādhu kira bhante,||
Bhagavā yena Dīghāvussa upāsakassa nivesanaɱ||
ten'upasaŋkamatu anukampaɱ upādāyā'" ti.|| ||

"Evaɱ tātā" ti kho Jotiko gahapati,||
Dīghāvussa upāsakassa paṭissutvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Jotiko gahapati Bhagavantaɱ etad avoca:|| ||

"Dīghāvu bhante, upāsako ābādhiko hoti||
dukkhito||
bāḷhagilāno.|| ||

So Bhagavato pāde sirasā vandati.|| ||

Evañ ca vadeti:|| ||

'Sādhu kira bhante,||
Bhagavā yena Dīghāvussa upāsakassa nivesanaɱ||
ten'upasaŋkamatu anukampaɱ upādāyā'" ti.|| ||

Adhivāsesi Bhagavā tuṇhībhāvena.|| ||

Atha kho Bhagavā nivāsetvā pattacīvaram ādāya||
yena Dīghāvussa upāsakassa nivesanaɱ ten'upasaŋkami.|| ||

[345] Upasaŋkamitvā paññatte āsane nisīdi.|| ||

Nisajja kho Bhagavā Dīghāvuɱ upāsakaɱ etad avoca:|| ||

"Kacci te Dīghāvu khamanīyaɱ?|| ||

Kacci yāpanīyaɱ?|| ||

Kacci dukkhā vedanā paṭikkamanti?|| ||

No abhikkamanti?|| ||

Paṭikkamo sānaɱ paññāyati||
no abhikkamo" ti?|| ||

"Na me bhante, khamanīyaɱ,||
na yāpanīyaɱ||
bāḷahā me dukkhā vedanā abhikkamanti||
no paṭikkamanti.|| ||

Abhikkamo sānaɱ paññāyati||
no paṭikkamo" ti.|| ||

"Tasmā ti ha te Dīghāvu,||
evaɱ sikkhitabbaɱ:|| ||

'Buddhe aveccappasādena samannāgato bhavissāmi:|| ||

"Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā" ti.|| ||

Dhamme aveccappasādena samannāgato bhavissāmi:|| ||

"Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī" ti.|| ||

Saŋghe aveccappasādena samannāgato bhavissāmi:|| ||

"Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā" ti.|| ||

Ariyakantehi sīlehi samannāgato hoti||
akhaṇḍehi||
acchiddehi||
asabalehi||
akammāsehi||
bhujissehi||
viññuppasatthehi||
aparāmaṭṭhehi||
samādhi-saɱvattanikehi.'|| ||

Evaɱ hi te Dīghāvu, sikkhitabban" ti.|| ||

"Yān'imāni bhante, Bhagavatā cattāri sotipattiyaŋgāni desitāni.|| ||

Saŋvijjante te dhammā mayi.|| ||

Ahañ ca tesu dhammesu sandissāmi.|| ||

Ahaɱ hi bhante, buddhe avecca pasādena samannāgato:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Dhamme avecca pasādena samannāgato:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Saŋghe aveccappasādena samannāgato:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Ariyakantehi sīlehi samannāgato||
akhaṇḍehi||
acchiddehi||
asabalehi||
akammāsehi||
bhujissehi||
viññuppasatthehi||
aparāmaṭṭhehi||
samādhi-saɱvattanikehi" ti.|| ||

"Tasmā ti ha tvaɱ Dīghāvu,||
imesu catusu sotāpattiyaŋgesu patiṭṭhāya||
cha vijjābhāgiye dhamme uttariɱ bhāveyyāsi.|| ||

Idha tvaɱ Dīghāvu:||
'Sabba sankhāresu aniccānupassī viharāhi,||
anicce dukkhasaññī||
dukkhe anattasaññī||
pahāṇasaññī virāgasaññī nirodhasaññī' ti.|| ||

Evaɱ hi te Dīghāvu, sikkhitabban" ti.|| ||

"Ye me bhante, Bhagavatā cha vijjābhāgiyā dhammā desitā||
saŋvijjante te dhammā mayi.|| ||

Ahañ ca tesu dhammesu sandissāmi.|| ||

Ahaɱ hi bhante, sabbasankhāresu aniccānupassī viharāmī.|| ||

Anicce dukkhasaññī||
dukkhe anattasaññī||
pahāṇasaññī virāgasaññī nirodhasaññī.|| ||

Api ca me bhante, evaɱ hoti:|| ||

'Mā hevāyaɱ Jotiko gahapati mam accayena vighātaɱ āpajjī'" ti.|| ||

[346] "Mā tvaɱ tāta, Dīghāvu,||
evaɱ manasākāsi.|| ||

Iŋgha, tvaɱ tāta, Dīghāvu,||
yadeva Bhagavā āha,||
tad eva tvaɱ sādhukaɱ manasi karohī" ti.|| ||

Atha kho Bhagavā Dīghāvuɱ upāsakaɱ||
iminā ovādena ovaditvā uṭṭhāy'āsanā pakkami.|| ||

Atha kho Dīghāvu upāsako acirapakkantassa Bhagavato kālam akāsi.|| ||

Atha kho sambahulā bhikkhū yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinnā kho te bhikkhū Bhagavantaɱ etad avocuɱ:|| ||

"Yo so bhante, Dīghāvu nāma upāsako Bhagavatā saŋkhittena ovādena ovadito||
so kālakato.|| ||

Tassa kā gati ko abhisamparāyo" ti?|| ||

"Paṇḍito bhikkhave, Dīghāvu upāsako ahosi.|| ||

Paccapādi dhammassānudhammaɱ||
na ca maɱ dhammādhikaraṇaɱ vihesesi.|| ||

Dīghāvu bhikkhave, upāsako||
pañcannaɱ orambhagiyānaɱ saŋyojanānaɱ parikkhayā||
opapātiko hoti||
tattha parinibbāyī anāvattidhammo tasmā lokā" ti.

 


Contact:
E-mail
Copyright Statement   Webmaster's Page