Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
I. Veḷudvāra Vagga

Sutta 5

Dutiya Sāriputta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayam Bhagavā Sāvatthiyaɱ viharati Jetavane Anāthapindikassa ārāme.|| ||

Atha kho āyasmā Sāriputto yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho āyasmantaɱ Sāriputtaɱ Bhagavā etad avoca:|| ||

"'Sotāpattiyaŋgaɱ! sotāpattiyaŋgan! ti'|| ||

h'idaɱ Sāriputta, vuccati.|| ||

Katamannukho Sāriputta, sotāpattiyaŋgan" ti?|| ||

"Sappurisasaŋsevohi bhante, sotāpattiyaŋgaɱ,||
saddhammasavanaɱ sotāpattiyaŋgaɱ,||
yoniso-manasikāro sotāpattiyaŋgaɱ,||
dhammānudhammapaṭipatti sotāpattiyaŋgan" ti.|| ||

Sādhu sādhu Sāriputta,||
sappurisasaŋsevo hi Sāriputta, sotāpattiyaŋgaɱ,||
saddhammasavanaɱ sotāpattiyaŋgaɱ,||
yoniso-manasikāro sotāpattiyaŋgaɱ,||
dhammānudhammapaṭipatti sotāpattiyaŋgaɱ.|| ||

'Soto soto' ti|| ||

h'idaɱ Sāriputta, vuccati.|| ||

Katamo nukho Sāriputta, soto" ti?|| ||

"Ayam eva hi bhante, ariyo aṭṭhaŋgiko maggo soto.|| ||

Seyyathīdaɱ:|| ||

Sammā-diṭṭhi||
sammā-saŋkappo||
sammā-vācā||
sammā-kammanto||
sammā-ājīvo||
sammā-vāyāmo||
sammā-sati||
sammā-samādhī" ti.|| ||

"Sādhu sādhu Sāriputta,||
ayam eva hi Sāriputta ariyo aṭṭhaŋgiko maggo soto.|| ||

Seyyathīdaɱ:|| ||

Sammā-diṭṭhi||
sammā-saŋkappo||
sammā-vācā||
sammā-kammanto||
sammā-ājīvo||
sammā-vāyāmo||
sammā-sati||
sammā-samādhī ti.|| ||

[348] 'Sotāpanno sotāponno' ti|| ||

h'idaɱ Sāriputta, vuccati.|| ||

Katamo nukho Sāriputta, sotāpanno" ti?|| ||

"Yo hi bhante, iminā ariyena aṭṭhaŋgikena maggena samannāgato,||
ayaɱ vuccati sotāpanno||
yo'yaɱ āyasmā evaɱ nāmo||
evaɱ gotto" ti.|| ||

"Sādhu sādhu Sāriputta,||
yo hi Sāriputta,||
iminā ariyena aṭṭhaŋgikena maggena samannāgato||
ayaɱ vuccati sotāpanno||
yo'yaɱ āyasmā evaɱ-nāmo||
evaɱ-gotto" ti.|| ||

 


Contact:
E-mail
Copyright Statement   Webmaster's Page