Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
I. Veḷudvāra Vagga

Sutta 6

Thapatayo Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayam Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Tena kho pana samayena sambahulā bhikkhū Bhagavato cīvarakammaɱ karonti:|| ||

"Niṭṭhitacīvaro Bhagavā temāsaccayena cārikaɱ pakkamissatīti".|| ||

Tena kho pana samayena Isidatta-Purāṇā thapatayo:||
sādhuke paṭivasanti kenacideva karaṇīyena,||
assosuɱ kho Isidatta-Purāṇā thapatayo sambahulā kira bhikkhū Bhagavato cīvarakammaɱ karonti,||
'Niṭṭhitacīvaro Bhagavā temāsaccayena cārikaɱ pakkamissatī' ti.|| ||

Atha kho Isidatta-Purāṇā thapatayo magge purisaŋ ṭhapesuɱ:|| ||

"Yadā tvaɱ ambho purisa,||
passyeyāsi Bhagavantaɱ āgacchantaɱ arahantaɱ sammāsambuddhaɱ atha kho amhākaɱ1 āroceyyāsī" ti.|| ||

Davīhatīhaɱ ṭhito kho so puriso addasa Bhagavantaɱ durato va āgacchantaɱ disvāna yena Isidatta-Purāṇā thapatayo ten'upasaŋkami.|| ||

Upasaŋkamitvā Isidatta-Purāṇā thapatayo etad avoca:|| ||

"Ayaɱ so bhante, Bhagavā āgacchati arahaɱ sammāsambuddho yassadāni kālaɱ maññathā" ti.|| ||

Atha kho Isidatta-Purāṇā thapatayo yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā Bhagavantaɱ piṭṭhito piṭṭhito anubandhiɱsu.|| ||

Atha kho Bhagavā maggā okkamma yenaññataraɱ rukkhamūlaɱ ten'upasaŋkami.|| ||

Upasaŋkamitvā paññatte [349] āsane nisīdi.|| ||

Isidatta-Purāṇā thapatayo Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinnā kho Isidatta-Purāṇā thapatayo Bhagavantaɱ etad avocuɱ:|| ||

"Yadā mayaɱ bhante Bhagavantaɱ suṇāma:||
'Sāvatthiyā Kosalesu cārikaɱ pakkamissatī' ti||
hoti no tasmiɱ samaye anattamanatā||
hoti domanassaŋ:||
'dūre no Bhagavā bhavissatī' ti.|| ||

Yadā pana mayaɱ bhante, Bhagavantaɱ suṇāma: 'Sāvatthiya Kosalesu cārikam pakkanto' ti,||
hoti no tasmiɱ samaye anattamanatā||
hoti domanassaŋ:||
'dūre no Bhagavā' ti.|| ||

Yadā mayaɱ bhante, Bhagavantaɱ suṇāma:||
'Kosalehi Mallesu cārikaɱ pakkamissatī' ti||
hoti no tasmiɱ samaye [350] anattamanatā||
hoti domanassaŋ:||
'dūre no Bhagavā bhavissatī' ti.|| ||

Yadā pana mayaɱ bhante, Bhagavantaɱ suṇāma:||
'Kosalehi Mallesu cārikaɱ pakkanto' ti||
hoti no tasmiɱ samaye anattamanatā||
hoti domanassaŋ:||
'dūre no Bhagavā' ti.|| ||

Yadā pana mayaɱ bhante, Bhagavantaɱ suṇāma:||
'Mallehi Vajjīsu cārikaɱ pakkamissatī' ti||
hoti no tasmiɱ samaye anattamanatā||
hoti domanassaŋ:||
'dūre no Bhagavā bhavissatī' ti.|| ||

Yadā pana mayaɱ bhante, Bhagavantaɱ suṇāma:||
'Mallehi Vajjīsu cārikaɱ pakkanto' ti||
hoti no tasmiɱ samaye anattamanatā||
hoti domanassaŋ:||
'dūre no Bhagavā' ti.|| ||

Yadā pana mayaɱ bhante, Bhagavantaɱ suṇāma:||
'Vajjīhi Kāsīsu cārikaɱ pakkamissatī' ti||
hoti no yasmiɱ samaye anattamanatā||
hoti domanassaŋ:||
'dūre no Bhagavā bhavissatī' ti.|| ||

Yadā pana mayaɱ bhante, Bhagavantaɱ suṇāma:||
'Vajjīhi Kāsīsu pakkanto' ti||
hoti no tasmiɱ samaye anattamanatā||
hoti domanassaŋ:||
'dūre no Bhagavā' ti.|| ||

Yadā pana mayaɱ bhante, Bhagavantaɱ suṇāma:||
'Kāsīhi Magadhesu cārikaɱ pakkamissatī' ti||
hoti no yasmiɱ samaye anattamanatā||
hoti domanassaŋ:||
'dūre no Bhagavā bhavissatī' ti.|| ||

Yadā pana mayaɱ bhante, Bhagavantaɱ suṇāma:||
'Kāsīhi Magadhesu pakkanto' ti||
hoti no tasmiɱ samaye anattamanatā||
hoti domanassaŋ:||
'dūre no Bhagavā' ti.|| ||

Yadā pana mayaɱ bhante, Bhagavantaɱ suṇāma:||
'Kāsīhi Magadhesu cārikaɱ pakkamissatī' ti||
hoti no yasmiɱ samaye anattamanatā||
hoti domanassaŋ:||
'dūre no Bhagavā bhavissatī' ti.|| ||

Yadā pana mayaɱ bhante, Bhagavantaɱ suṇāma:||
'Kāsīhi Magadhesu pakkanto' ti||
hoti no tasmiɱ samaye anattamanatā||
hoti domanassaŋ:||
'dūre no Bhagavā' ti.|| ||

 


 

Yadā pana mayaɱ bhante, Bhagavantaɱ suṇāma:||
'Magadhehi Kāsīsu cārikaɱ pakkamissatī' ti||
hoti no tasmiɱ samaye attamanatā,||
hoti somanassaŋ,||
'āsanne no Bhagavā bhavissatī' ti.|| ||

Yadā pana mayaɱ bhante, Bhagavantaɱ suṇāma:||
'Magadhehi Kāsīsu cārikaɱ pakkanto' ti||
hoti no tasmiɱ samaye attamanatā||
hoti somanassaŋ:||
"āsanne no Bhagavā' ti.|| ||

Yadā pana mayaɱ bhante, Bhagavantaɱ suṇāma:||
'Kāsīhi Vajjīsu cārikaɱ pakkamissatī' ti||
hoti no tasmiɱ samaye attamanatā,||
hoti somanassaŋ,||
'āsanne no Bhagavā bhavissatī' ti.|| ||

Yadā pana mayaɱ bhante, Bhagavantaɱ suṇāma:||
'Kāsīhi Vajjīsu cārikaɱ pakkanto' ti||
hoti no tasmiɱ samaye attamanatā||
hoti somanassaŋ:||
"āsanne no Bhagavā' ti.|| ||

Yadā pana mayaɱ bhante, Bhagavantaɱ suṇāma:||
'Vajjīhi Mallesu cārikaɱ pakkamissatī' ti||
hoti no tasmiɱ samaye attamanatā,||
hoti somanassaŋ,||
'āsanne no Bhagavā bhavissatī' ti.|| ||

Yadā pana mayaɱ bhante, Bhagavantaɱ suṇāma:||
'Vajjīhi Mallesu cārikaɱ pakkanto' ti||
hoti no tasmiɱ samaye attamanatā||
hoti somanassaŋ:||
"āsanne no Bhagavā' ti.|| ||

Yadā pana mayaɱ bhante, Bhagavantaɱ suṇāma:||
'Mallehi Kosalesu cārikaɱ pakkamissatī' ti||
hoti no tasmiɱ samaye attamanatā,||
hoti somanassaŋ,||
'āsanne no Bhagavā bhavissatī' ti.|| ||

Yadā pana mayaɱ bhante, Bhagavantaɱ suṇāma:||
'Mallehi Kosalesu cārikaɱ pakkanto' ti||
hoti no tasmiɱ samaye attamanatā||
hoti somanassaŋ:||
"āsanne no Bhagavā' ti.|| ||

Yadā pana mayaɱ bhante, Bhagavantaɱ suṇāma:||
"Kosalehi Sāvatthiɱ cārikaɱ pakkamissatī' ti||
hoti no tasmiɱ samaye attamanatā||
hoti somanassaŋ:||
'āsanne no Bhagavā bhavissatī' ti.|| ||

Yadā pana mayaɱ bhante, Bhagavantaɱ suṇāma:||
'Sāvatthiyaɱ viharati Jetavane Anāthapiṇḍikassa ārāme' ti||
hoti anappikā no tasmiɱ samaye attamanatā,||
hoti anappakaɱ somanassaŋ:||
'āsanne no Bhagavā' ti."|| ||

 


 

"Tasmā ti ha thapatayo sambādho gharāvāso rajāpatho,||
abbhokāso pabbajjā.|| ||

Alañca pana vo thapatayo appamādāyā" ti.|| ||

"Atthi kho no bhante,||
etamhā sambādhā añño sambādho sambādhataro c'eva sambādhasaŋkhātataro cā" ti.|| ||

[351] "Katamo pana vo thapatayo etamhā sambādhā añño sambādho sambādhataro c'eva sambādhasaŋkhātatarocā" ti?|| ||

"Idha mayaɱ bhante, yadā rājā Pasenadi kosalo uyyānabhūmiɱ niyyātukāmo hoti,||
ye te rañño Pasenadissa Kosalassa nāgā opavayhā te kappetvā yā tā rañño Pasenadissa Kosalassa pajāpatiyo piyā manāpā tā ekaɱ purato ekaɱ pacchato nisīdāpema.|| ||

Tāsaŋ kho pana bhante,||
bhaginīnaɱ evarūpo gandho hoti:||
'seyyathā pi nāma gandhakaraṇaḍakassa tāvadeva vivariyamānassa yathā taɱ,||
rājārahena gandhena vibhūsitānaɱ.|| ||

Tāsaŋ kho pana bhante, bhaginīnaɱ evarūpo kāyasamphasso hoti,||
seyyathā pi nāma tūlapicuno vā kappāsapicuno vā yathā taɱ rājakaññānaɱ sukhedhitānaɱ.|| ||

Tasmiɱ kho pana bhante,||
samaye nāgo pi rakkhitabbo hoti,||
tāpi bhaganiyo rakkhitabbā honti,||
attā pi rakkhitabbo hoti.|| ||

Na kho pana mayaɱ bhante,||
abhijānāma,||
tāsu bhaginīsu pāpakaɱ cittaɱ uppādetā.|| ||

Ayaɱ kho no bhante,||
etamhā sambādhā añño sambādho sambādhataro c'eva sambādhasaŋkhātatataro cā" ti.|| ||

"Tasmā ti ha thapatayo sambādho gharāvāso rajāpatho,||
abbhokāso pabbajjā,||
alañca pana vo thapatayo appamādāya.|| ||

Catūhi kho thapatayo dhammehi samannāgato ariyasāvako sotāpanto hoti avinipātadhammo niyato sambodhiparāyaṇo.|| ||

Katamehi catūhi?|| ||

Idha thapatayo ariyasāvako buddhe avecca pasādena samannāgato hoti:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Dhamme avecca pasādena samannāgato hoti:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Saŋghe avecca pasādena samannāgato hoti:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Vigatamalamaccherena cetasā agāraɱ ajjhāvasati.|| ||

Muttacāgo payatapāṇi vossaggarato yācayogo dānasaŋvibhāgarato.|| ||

Ime hi kho thapatayo catūhi dhammehi [352] samannāgato ariyasāvako sotāpanno hoti||
avinipātadhammo niyato sambodhiparāyaṇo.|| ||

Tumhehi kho thapatayo, buddhe avecca pasādena samannāgato:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Dhamme avecca pasādena samannāgatā:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Saŋghe avecca pasādena samannāgato hoti:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Yaɱ kho pana kiñci kule deyyadhammaɱ sabbaɱ taɱ appaṭivibhattaɱ sīlavantehi kalyāṇadhammehi.|| ||

Taɱ kiɱ maññatha thapatayo?|| ||

Katividhā te Kosalesu manussā ye tumhākaɱ samasamā||
yad idaɱ dānasaŋvibhāge" ti?|| ||

"Lābhā no bhante,||
suladdhaɱ no bhante||
yesaŋ no Bhagavā evaɱ jānātī" ti.|| ||

 


Contact:
E-mail
Copyright Statement   Webmaster's Page