Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
I. Veḷudvāra Vagga

Sutta 10

Tatiya Giñjakāvasatha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayaɱ Bhagavā Ñātike viharati Giñjakāvasathe.|| ||

Atha kho āyasmā Ānando yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Ānando Bhagavantaɱ etad avoca:|| ||

Kakudho nāma bhante,||
Ñātike upāsako kālakato.|| ||

Tassa kā gati,||
ko abhisamparāyo?|| ||

Kāliŋgo nāma bhante,||
Ñātike upāsako kālakato.|| ||

Tassa kā gati,||
ko abhisamparāyo?|| ||

Nikata nāma bhante,||
Ñātike upāsako kālakato..|| ||

Tassa kā gati,||
ko abhisamparāyo?|| ||

Kaṭissaho nāma bhante,||
Ñātike upāsako kālakato..|| ||

Tassa kā gati,||
ko abhisamparāyo?|| ||

Tuṭṭho nāma bhante,||
Ñātike upāsako kālakato..|| ||

Tassa kā gati,||
ko abhisamparāyo?|| ||

Santuṭṭho nāma bhante,||
Ñātike upāsako kālakato.|| ||

Tassa kā gati,||
ko abhisamparāyo?|| ||

Bhaddo nāma bhante,||
Ñātike upāsako kālakato.|| ||

Tassa kā gati,||
ko abhisamparāyo?|| ||

Subhaddo nāma bhante,||
Ñātike upāsako kālakato.|| ||

Tassa kā gati,||
ko abhisamparāyo" ti?

 


 

Kakudho Ānanda, upāsako kālakato||
pañcantaɱ orambhāgiyānaɱ saŋyojanānaɱ parikkhayā||
opapātiko||
tattha parinibbāyī||
anāvattidhammo tasmā lokā.|| ||

Kāliŋgo [359] Ānanda Ānanda, upāsako kālakato||
pañcantaɱ orambhāgiyānaɱ saŋyojanānaɱ parikkhayā||
opapātiko||
tattha parinibbāyī||
anāvattidhammo tasmā lokā.|| ||

Nikato Ānanda, upāsako kālakato||
pañcantaɱ orambhāgiyānaɱ saŋyojanānaɱ parikkhayā||
opapātiko||
tattha parinibbāyī||
anāvattidhammo tasmā lokā.|| ||

Kaṭissaho Ānanda, upāsako kālakato||
pañcantaɱ orambhāgiyānaɱ saŋyojanānaɱ parikkhayā||
opapātiko||
tattha parinibbāyī||
anāvattidhammo tasmā lokā.|| ||

Tuṭṭho Ānanda, upāsako kālakato||
pañcantaɱ orambhāgiyānaɱ saŋyojanānaɱ parikkhayā||
opapātiko||
tattha parinibbāyī||
anāvattidhammo tasmā lokā.|| ||

Santuṭṭho Ānanda, upāsako kālakato||
pañcantaɱ orambhāgiyānaɱ saŋyojanānaɱ parikkhayā||
opapātiko||
tattha parinibbāyī||
anāvattidhammo tasmā lokā.|| ||

Bhaddo Ānanda, upāsako kālakato||
pañcantaɱ orambhāgiyānaɱ saŋyojanānaɱ parikkhayā||
opapātiko||
tattha parinibbāyī||
anāvattidhammo tasmā lokā.|| ||

Subhaddo Ānanda, upāsako kālakato||
pañcantaɱ orambhāgiyānaɱ saŋyojanānaɱ parikkhayā||
opapātiko||
tattha parinibbāyī||
anāvattidhammo tasmā lokā.|| ||

Paropaññāsā Ānanda, Ñātike upāsakā kālakatā pañcannaɱ orambhāgiyānaɱ saŋyojanānaɱ parikkhayā||
opapātikā||
tattha parinibbāyino anāvattidhammā tasmā lokā.|| ||

Sādhikanavuti Ānanda, Ñātike upāsakā kālakatā||
tiṇṇaɱ saŋyojanānaɱ parikkhayā||
rāga-dosa-mohānaɱ tanuttā||
sakadāgāmino||
sakideva imaɱ lokaɱ āgantvā dukkhassantaɱ karissanti.|| ||

Cha atirekāni kho Ānanda, pañca-satāni, Ñātike upāsakā kālakatā||
tiṇṇaɱ saŋyojanānaɱ parikkhayā||
sotāpannā||
avinipātadhammā||
niyatā||
sambodhi-parāyaṇā.|| ||

 


 

Anacchariyaɱ kho pan'etaɱ Ānanda,||
yaɱ manussabhūto kālaɱ kareyya.|| ||

Tasmiɱ tasmiɱ ce maɱ kālakate upasaŋkamitvā||
etam atthaɱ paṭipucjissatha.|| ||

Vihesā p'esā Ānanda, assa Tathāgatassa.|| ||

Tasmā ti h'Ānanda, dhammādāsaŋ nāma dhamma-pariyāyaɱ desissāmi.|| ||

Yena samannāgato ariyasāvako ākaŋkhamāno attanā va attānaɱ vyākareyya:|| ||

'Khīṇa-nirayo'mhi||
khīṇa-tiracchānayoniko||
khīṇa-pettivisayo||
khīṇā-pāya-duggati-vipāto.|| ||

Sotāpanno'ham asmi||
avinipāta-dhammo||
niyato||
sambodhi-parāyano'|| ||

Katamo ca so Ānanda, dhammādāso dhamma-pariyāyo yena samannāgato ariyasāvako ākaŋkhamāno attanāva attānaɱ vyākareyya:|| ||

'Khīṇa-nirayo'mhi||
khīṇa-tiracchānayoniko||
khīṇa-pettivisayo||
khīṇā-pāya-duggati-vipāto.|| ||

Sotāpanno'ham asmi||
avinipāta-dhammo||
niyato||
sambodhi-parāyano'?|| ||

Idh'Ānanda, ariyasāvako buddhe avecca pasādena samannāgato hoti:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Dhamme avecca pasādena samannāgato hoti:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Saŋghe avecca pasādena samannāgato hoti:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Ariyakantehi sīlehi samannāgato hoti||
akhaṇḍehi||
acchiddehi||
asabalehi||
akammāsehi||
bhujissehi||
viññuppasatthehi||
aparāmaṭṭhehi||
samādhi-saɱvattanikehi.|| ||

Ayaɱ kho so Ānanda, dhammādāso dhamma-pariyāyo yena samannāgato ariyasāvako ākaŋkhamāno attanāva attānaɱ vyākareyya:|| ||

'Khīṇa-nirayo'mhi||
khīṇa-tiracchānayoniko||
khīṇa-pettivisayo||
khīṇā-pāya-duggati-vipāto.|| ||

Sotāpanno'ham asmi||
avinipāta-dhammo||
niyato||
sambodhi-parāyano'" ti.|| ||

 


Contact:
E-mail
Copyright Statement   Webmaster's Page