Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
II. Sahassaka or Rājakārama Vagga

Sutta 12

Brāhmaṇā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Brāhmaṇā bhikkhave, udayagāminiɱ nāma paṭipadaɱ paññāpenti.|| ||

Te sāvakaɱ evaɱ samādapeti:|| ||

'Ehi tvaɱ ambho purisa, kālasseva uṭṭhāya pācīnamukho yāhi.|| ||

So tvaɱ mā sobbhaɱ parivajjehi,||
mā papātaɱ,||
mā khāṇuɱ,||
mā kaṇṭakādhānaɱ,||
mā candanikaɱ,||
mā oligallaɱ.|| ||

Yattha pateyyāsi,||
tattheva māraṇaɱ āgaccheyyāsi.|| ||

Evaɱ tvaɱ ambho purisa,||
kāyassa bhedā param māraṇā sugatiɱ saggaɱ lokaɱ uppajjissasī' ti.|| ||

Taɱ kho pan'etaɱ bhikkhave,||
brāhmaṇānaɱ bāla gamaname taɱ.|| ||

Mūḷhagamaname taɱ,||
na nibbidāya,||
na virāgāya,||
na nirodhāya,||
na upasamāya,||
na abhiññāya,||
na sambodhāya,||
na nibbānāya saŋvattati.|| ||

Ahañ ca kho bhikkhave, ariyassa vinaye udayagāminiɱ paṭipadaɱ paññāpemi,||
yā ekantanibbidāya||
virāgāya||
nirodhāya||
upasamāya||
abhiññāya||
sambodhāya||
nibbānāya saŋvattati.|| ||

Katamā ca sā bhikkhave,||
udayagāminī paṭipadā||
yā ekantanibbidāya||
virāgāya||
nirodhāya||
upasamāya||
abhiññāya||
sambodhāya||
nibbānāya saŋvattati?|| ||

[362] Idha bhikkhave, ariyasāvako buddhe avecca pasādena samannāgato hoti:

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Dhamme avecca pasādena samannāgato hoti:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Saŋghe avecca pasādena samannāgato hoti:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Ariyakantehi sīlehi samannāgato hoti||
akhaṇḍehi||
acchiddehi||
asabalehi||
akammāsehi||
bhujissehi||
viññuppasatthehi||
aparāmaṭṭhehi||
samādhi-saɱvattanikehi.|| ||

Ayaɱ kho sā bhikkhave,||
udayagāminī paṭipadā,||
yā ekantanibbidāya||
virāgāya||
nirodhāya||
upasamāya||
abhiññāya||
sambodhāya||
nibbānāya saŋvattatī" ti.

 


Contact:
E-mail
Copyright Statement   Webmaster's Page