Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
II. Sahassaka or Rājakārama Vagga

Sutta 13

Ānanda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayaɱ āyasmā ca Sāriputto||
āyasmā ca Ānando||
Sāvatthiyaɱ viharanti||
Jetavane||
Anāthapiṇḍikassa ārāme.|| ||

Atha kho āyasmā Sāriputto sāyaṇha-samayaɱ paṭisallāṇā vuṭṭhito||
yen'āyasmā Ānando ten'upasaŋkami.|| ||

Upasaŋkamitvā āyasmatā Ānandena saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho āyasmā Sāriputto āyasmantaɱ Ānandaɱ etad avoca:|| ||

"Katīnaɱ kho āvuso Ānanda, dhammānaɱ pahānā||
katīnaɱ dhammānaɱ samannā-gamana-hetu||
evam ayaɱ pajā Bhagavatā vyākatā:|| ||

'Sotāpannā||
avinipāta-dhammā||
niyatā||
sambodhi-parāyaṇā'" ti?|| ||

"Catunnaɱ kho āvuso, dhammānaɱ pahānā||
catunnaɱ dhammānaɱ samannā-gamana-hetu||
evam ayaɱ pajā Bhagavatā vyākatā:|| ||

'Sotāpannā||
avinipāta-dhammā||
niyatā||
sambodhi-parāyaṇā' ti.|| ||

Katamesaɱ catunnaɱ?|| ||

Yathārūpena kho āvuso buddhe appasādena samannāgato assutavā puthujjano||
kāyassa bhedā||
param māraṇā||
apāyaɱ||
duggatiɱ||
vinipātaɱ||
nirayaɱ uppajjati.|| ||

Tathā-rūpassa [363] buddhe appasādo na hoti.|| ||

Yathārūpena ca kho āvuso, buddhe avecca pasādena samannāgato sutavā ariyasāvako||
kāyassa bhedā||
param māraṇā||
sugatiɱ||
saggaɱ lokaɱ uppajjati.|| ||

Tathā-rūpassa buddhe avecca pasādo hoti:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Yathārūpena kho āvuso, dhamme appasādena samannāgato assutavā puthujjano||
kāyassa bhedā||
param māraṇā||
apāyaɱ||
duggatiɱ||
vinipātaɱ||
nirayaɱ uppajjati.|| ||

Tathā-rūpassa dhamme appasādo na hoti.|| ||

Yathārūpena ca kho āvuso dhamme avecca pasādena samannāgato sutavā ariyasāvako||
kāyassa bhedā||
param māraṇā||
sugatiɱ||
saggaɱ lokaɱ uppajjati.|| ||

Tathā-rūpassa dhamme avecca pasādo hoti:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Yathārūpena kho āvuso, saŋghe appasādena samannāgato assutavā puthujjano||
kāyassa bhedā||
param māraṇā||
apāyaɱ||
duggatiɱ||
vinipātaɱ||
nirayaɱ uppajjati.|| ||

Tathā-rūpassa saŋghe appasādo na hoti.|| ||

Yathārūpena ca kho āvuso saŋghe avecca pasādena samannāgato sutavā ariyasāvako||
kāyassa bhedā||
param māraṇā||
sugatiɱ||
saggaɱ lokaɱ uppajjati.|| ||

Tathā-rūpassa saŋghe avecca pasādo hoti:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Yathārūpena kho āvuso, dussīlyena samannāgato assutavā puthujjano||
kāyassa bhedā||
param māraṇā||
apāyaɱ||
duggatiɱ||
vinipātaɱ||
nirayaɱ uppajjati.|| ||

Tathā-rūpassa dussīlyaɱ na hoti.

Yathārūpehi ca kho āvuso ariyakantehi sīlehi samannāgato sutavā ariyasāvako||
kāyassa bhedā||
param māraṇā||
sugatiɱ||
saggaɱ lokaɱ uppajjati.|| ||

Tathā-rūpassa ariyakantāni sīlāni honti||
akhaṇḍāni||
acchiddāni||
asabalāni||
akammāsāni||
bhujissāni||
viññuppasatthāti||
aparāmaṭṭhāni||
samādhi-saŋvattanikāni.|| ||

[364] Imesaŋ kho āvuso, catunnaɱ dhammānaɱ pahānā imesaŋ||
catunnaɱ dhammānaɱ samannā-gamana-hetu||
evam ayaɱ pajā Bhagavatā vyākatā:|| ||

'Sotāpannā||
avinipāta-dhammā||
niyatā||
sambodhi-parāyaṇā'" ti.|| ||

 


Contact:
E-mail
Copyright Statement   Webmaster's Page