Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
II. Sahassaka or Rājakārama Vagga

Sutta 16

Paṭhama Mittenāmaccā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayam Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Ye hi bhikkhave, anukampeyyātha,||
ye ca sotabbaɱ maññeyyuɱ||
mittā vā||
amaccā vā||
ñāti vā||
sālohitā vā,||
te kho bhikkhave, catusu sotāpattiyaŋgesu samādapetabbā||
nivesetabbā||
patiṭṭhāpetabbā.|| ||

Katamesu catusu?|| ||

[365] Buddhe aveccappasāde samādapetabbā,||
nivesetabbā,||
patiṭṭhāpetabbā:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Dhamme aveccappasāde samādapetabbā,||
nivesetabbā,||
patiṭṭhāpetabbā:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Saŋghe aveccappasāde samādapetabbā,||
nivesetabbā,||
patiṭṭhāpetabbā:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Ariyakantehi sīlehi samannāgato hoti||
akhaṇḍāni||
acchiddāni||
asabalāni||
akammāsāni||
bhujissāni||
viññuppasatthāti||
aparāmaṭṭhāni||
samādhi-saŋvattanikāni.|| ||

Imesu catusu sotāpattiyaŋgesu samādapetabbā||
nivesetabbā||
patiṭṭhāpetabbā" ti.|| ||

 


Contact:
E-mail
Copyright Statement   Webmaster's Page