Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
II. Sahassaka or Rājakārama Vagga

Sutta 17

Dutiya Mittenāmaccā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayam Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Ye hi bhikkhave, anukampeyyātha,||
ye ca sotabbaɱ maññeyyuɱ||
mittā vā||
amaccā vā||
ñāti vā||
sālohitā vā,||
te vo bhikkhave, catusu sotāpattiyaŋgesu samādapetabbā||
nivesetabbā||
patiṭṭhāpetabbā.|| ||

Katamesu catusu?|| ||

Buddhe aveccappasāde samādapetabbā,||
nivesetabbā,||
patiṭṭhāpetabbā:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Siyā bhikkhave, catunnaɱ mahābhutanaɱ aññathattaɱ||
Paṭhavīdhātuyā||
āpodhātuyā||
tejodhātuyā||
vayodhātuyā.|| ||

Na tv'eva buddhe avecca pasādena samannāgatassa ariyasāvakassa siyā aññathattaɱ.|| ||

Tatr'idaɱ aññathattaɱ:|| ||

'So vata buddhe avecca pasādena samannāgato ariyasāvako nirayaɱ vā||
tiracchānayoniɱ vā||
pettivisayaɱ vā uppajjissatī' ti.|| ||

N'etaɱ ṭhānaɱ vijjati.|| ||

Dhamme aveccappasāde samādapetabbā,||
nivesetabbā,||
patiṭṭhāpetabbā:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Siyā bhikkhave, catunnaɱ mahābhutanaɱ aññathattaɱ||
Paṭhavīdhātuyā||
āpodhātuyā||
tejodhātuyā||
vayodhātuyā.|| ||

Na tv'eva dhamme avecca pasādena samannāgatassa ariyasāvakassa siyā aññathattaɱ.|| ||

Tatr'idaɱ aññathattaɱ:|| ||

'So vata dhamme avecca pasādena samannāgato ariyasāvako nirayaɱ vā||
tiracchānayoniɱ vā||
pettivisayaɱ vā uppajjissatī' ti.|| ||

N'etaɱ ṭhānaɱ vijjati.|| ||

Saŋghe aveccappasāde samādapetabbā,||
nivesetabbā,||
patiṭṭhāpetabbā:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Siyā bhikkhave, catunnaɱ mahābhutanaɱ aññathattaɱ||
Paṭhavīdhātuyā||
āpodhātuyā||
tejodhātuyā||
vayodhātuyā.|| ||

Na tv'eva saŋghe avecca pasādena samannāgatassa ariyasāvakassa siyā aññathattaɱ.|| ||

Tatr'idaɱ aññathattaɱ:|| ||

'So vata saŋghe avecca pasādena samannāgato ariyasāvako nirayaɱ vā||
tiracchānayoniɱ vā||
pettivisayaɱ vā uppajjissatī' ti.|| ||

N'etaɱ ṭhānaɱ vijjati.|| ||

Ariyakantesu sīlesu samadapetabbā||
nivesetabbā||
patiṭṭhāpetabbā.|| ||

Akhaṇḍāni||
acchiddāni||
asabalāni||
akammāsāni||
bhujissāni||
viññuppasatthāti||
aparāmaṭṭhāni||
samādhi-saŋvattanikāni.|| ||

Siyā bhikkhave, catunnaɱ mahābhutanaɱ aññathattaɱ||
Paṭhavīdhātuyā||
āpodhātuyā||
tejodhātuyā||
vayodhātuyā.|| ||

Na tv'eva ariyakantehi [366] sīlehi samannāgatassa ariyasāvakassa siyā aññathattaɱ.|| ||

Tatr'idaɱ aññathattaɱ:|| ||

'So vata ariyakantehi sīlehi samannāgato ariyasāvako nirayaɱ vā||
tiracchānayoniɱ vā||
pettivisayaɱ vā uppajjissatī' ti.|| ||

N'etaɱ ṭhānaɱ vijjati.|| ||

"Ye bhikkhave, anukampeyyātha,||
ye ca sotabbaɱ maññeyyuɱ||
mittā vā||
amaccā vā||
ñāti vā||
sālohitā vā.|| ||

Te vo bhikkhave, imesu catusu sotāpattiyaŋgesu samādapetabbā||
nivesetabbā||
patiṭṭhāpetabbā" ti.|| ||

 


Contact:
E-mail
Copyright Statement   Webmaster's Page