Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
III. Saraṇāni Vagga

Sutta 21

Paṭhama Mahānāma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evam me sutaɱ:|| ||

[369] Ekaɱ samayaɱ Bhagavā Sakkesu viharati Kapilavatthusmiɱ Nigrodhārāme. Atha kho Mahānāmo Sakko yena Bhagavā ten'upasaŋkami. Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Mahānāmo Sakko Bhagavantaɱ etad avoca: "idaɱ bhante, Kapilavatthu iddhañc'eva phītañ ca bāhujaññaɱ ākiṇṇamanussaɱ sambādhabyuhaɱ. So khvāhaɱ bhante, Bhagavantaɱ payirupāsitvā manobhāvanīyaɱ vā bhikkhuɱ, sāyaṇhasamayaɱ Kapilavatthuɱ pavisanto bhantenapi hatthinā samāgacchāmi. Bhantenapi assena samāgacchāmi. Bhantenapi purisena samāgacchāmi. Tassa mayhaɱ bhante, tasmiɱ samaye mussateva Bhagavantaɱ ārabbha sati. Mussati dhammaɱ ārabbha sati mussati saŋghaɱ ārabbha sati. Tassa mayhaɱ bhante, evaɱ hoti: "imehi cāhaɱ samaye kālaɱ kareyyaɱ kā mam'assa gati, ko abhisamparāyo" ti.|| ||

Mā bhāyi Mahānāma, mā bhāyi Mahānāma apāpakaɱ te maraṇaɱ bhavissati, apāpikā kālakiriyā. Yassa kassaci Mahānāma, dīgha-rattaɱ saddhāparibhāvitaɱ cittaɱ, sīlaparibhāvitaɱ cittaɱ, sutaparibhāvitaɱ cittaɱ, cāgaparibhāvitaɱ cittaɱ, paññāparibhāvitaɱ cittaɱ, tassa yo hi khvāyaɱ kāyo rūpī cātum-mahā-bhūtiko mātā- [370] pettika-sambhavo odanakummāsūpacayo aniccucchādana-parimaddana-bhedana-viddhaɱsanadhammo, taɱ idh'eva kākā vā khādanti, gijjhā vā khādanti, kulalā vā khādanti, supānā vā khādanti, sigālā vā khādanti, vividhā vā pāṇakajātā khādanti, yañ ca khvassa cittaɱ dīgha-rattaɱ saddhāparibhāvitaɱ, sīlaparibhāvitaɱ, sutaparibhāvitaɱ, cāgaparibhāvitaɱ, paññāparibhāvitaɱ, taɱ uddhaɱgāmī hoti visesagāmī.|| ||

seyyathā pi Mahānāma, balavā puriso sappikumbhaɱ vā telakumbhaɱ vā gambhīraɱ udakarahadaɱ ogāhetvā bhindeyya, tatra yāssa1 sakkharā vā kaṭhalā vā sā adhogāmī assa. Yaṇ ca khvassa tatra sappi vā telaɱ vā taɱ uddhaŋgāmī assa visesagāmi. Evam eva kho Mahānāma, yassa kassaci dīgha-rattaɱ saddhāparibhāvitaɱ cittaɱ sīlaparibhāvitaɱ cittaɱ, sutaparibhāvitaɱ cittaɱ, cāgaparibhāvitaɱ cittaɱ, paññāparibhāvitaɱ cittaɱ, tassa yo hi khvāyaɱ kāyo rūpī cātum-mahā-bhūtiko matāpettikasambhavo odanakummāsūpacayo aniccucchādana-parimaddana-bhedana-viddhaɱsanadhammo, taɱ idh'eva kākā vā khādanti, gijjhā vā khādanti, kulalā vā khādanti, supānā vā khādanti, sigālā vā khādanti, vividhā vā pāṇakajātā khādanti, yañ ca khvassa cittaɱ saddhāparibhāvitaɱ, sīlaparibhāvitaɱ, sutaparibhāvitaɱ, cāgaparibhāvitaɱ, paññāparibhāvitaɱ cittaɱ taɱ uddhaŋgāmī hoti visesagāmī. Tuyhaɱ kho pana Mahānāma, dīgha-rattaɱ saddhāparibhāvitaɱ cittaɱ sīlaparibhāvitaɱ, sutaparibhāvitaɱ, cāgaparibhāvitaɱ, paññāparibhāvitaɱ. Mā bhāyi Mahānāma, ma bhāyi Mahānāma, apāpakaɱ te maraṇaɱ bhavissati. Apāpikā kālakiriyāti.|| ||

 


Contact:
E-mail
Copyright Statement   Webmaster's Page