Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
III. Saraṇāni Vagga

Sutta 30

Nandaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evam me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgārasālāyaɱ.|| ||

Atha kho Nandako Licchavī mahāmatto yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Nandakaɱ Licchavī mahāmattaɱ Bhagavā etad avoca:|| ||

"Catūhi kho Nandaka, dhammehi samannāgato ariyasāvako sotāpanno [390] hoti avinipātadhammo niyato sambodhiparāyaṇo.|| ||

Katamehi catūhi?|| ||

Idha Nandaka, ariyasāvako Buddhe avecca pasādena samannāgato hoti:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Dhamme avecca pasādena samannāgato hoti:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Saŋghe avecca pasādena samannāgato hoti:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Ariyakantehi sīlehi samannāgato hoti:|| ||

Akhaṇḍehi||
acchiddehi||
asabalehi||
akammāsehi||
bhujissehi||
viññuppasatthehi||
aparāmaṭṭhehi||
samādhi-saɱvattanikehi.|| ||

Imehi kho Nandaka, catūhi dhammehi samannāgato ariyasāvako sotāpanno hoti||
avinipātadhammo||
niyato||
sambodhiparāyaṇo.|| ||

Imehi ca pana Nandaka,||
catūhi dhammehi samannāgato ariyasāvako āyunā saɱyutto hoti||
dibbena pi||
mānusene pi.|| ||

Vaṇṇena saɱyutto hoti||
dibbena pi||
mānusena pi.|| ||

Sukhena saɱyutto hoti||
dibbena pi||
mānuse pi.|| ||

Yasena saɱyutto hoti||
dibbena pi||
mānusena pi.|| ||

Ādhipateyyena saɱyutto hoti||
dibbena pi||
mānusena pi.|| ||

Taɱ kho panāhaɱ Nandaka,||
nāññassa samaṇassa vā brāhmaṇassa vā sutvā vadāmi.|| ||

Api ca yadeva mayā sāmaɱ ñātaɱ sāmaɱ diṭṭhaɱ sāmaɱ viditaɱ tadevāhaɱ vadāmī" ti.|| ||

Evaɱ vutte aññataro puriso Nandakaɱ Licchavī mahāmantaɱ etad avoca:|| ||

"Nahānakālo bhante," ti.|| ||

"Alandāni bhaṇe,||
etena bāhirena nahānena.|| ||

Alam idaɱ ajjhattaɱ nahānaɱ.|| ||

Bhavissati yad idaɱ Bhagavatippasādo" ti.|| ||

 

Sarakānivaggo tatiyo

 


Contact:
E-mail
Copyright Statement   Webmaster's Page