Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
V. MahāVagga
55. Sotapatti Saŋyuttaa
IV: Puññābhisanda Vaggo

Sutta 39

Kāligodhā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts]Evam me sutaɱ:|| ||

Ekaɱ samayaɱ Bhagavā Sakkesu viharati Kapilavatthusmiɱ Nigrodhārāme.|| ||

2. Atha kho Bhagavā pubbaṇhasamayaɱ nivāsetvā pattacīvaram ādāya yena Kāligodhāya Sākiyāniyā nivesanaɱ ten'upasaŋkami.|| ||

Upasaŋkamitvā paññatte āsane nisīdi.|| ||

3. Atha kho Kāligodhā Sākiyāni yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Kāligodhaɱ Sākiyāniɱ Bhagavā etad avoca:|| ||

"Catūhi kho Godhe,||
dhammehi samannāgatā ariyasāvikā sotāpannā hoti avinipātadhammā niyatā sambodhiparāyaṇā.|| ||

Katamehi catūhi?|| ||

4. Idha Godhe ariyasāvikā buddhe aveccappasādena samannāgatā hoti:|| ||

'Iti pi so Bhagavā arahaɱ sammāsambuddho vijjācaraṇasampanno sugato lokavidu anuttaro purisadammasārathī satthā deva-manussānaɱ buddho Bhagavā' ti.|| ||

Dhamme aveccappasādena samannāgatā hoti:|| ||

'Svākkhāto Bhagavatā dhammo sandiṭṭhiko akāliko ehipassiko opanayiko paccattaɱ veditabbo viññūhī' ti.|| ||

Saŋaghe aveccappasādena samannāgatā hoti:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni aṭṭhapurisapuggalā esa Bhagavato sāvakasaŋgho āhuneyyo pāhuneyyo dakkhiṇeyyo añjalikaraṇīyo anuttaraɱ puññakkettaɱ lokassā' ti.|| ||

Vigata- [397] malamaccherena cetasā agāraɱ ajjhāvasati,||
muttacāgā payatapāṇī vossaggaratā yācayogā dānasaŋvibhāgaratā.|| ||

Imehi kho Godhe,||
catūhi dhammehi samannāgatā ariyasāvikā sotāpannā hoti avinipātadhammā niyatā sambodhiparāyaṇā" ti.|| ||

5. "Yān'imāni bhante, Bhagavatā cattāri sotāpattiyaŋgāni, desitāni||
saŋvijjante te dhammā mayi||
ahañ ca tesu dhammesu sandissāmi.|| ||

Ahaɱ hi bhante, buddhe aveccappasādena samannāgato:|| ||

'Iti pi so Bhagavā arahaɱ sammā sambuddho vijjācaraṇasampanno sugato lokavidu anuttaro purisadammasārathī satthā deva-manussānaɱ buddho Bhagavā' ti.|| ||

Dhamme aveccappasādena samannāgato:|| ||

'Svākkhāto Bhagavatā dhammo sandiṭṭhiko akāliko ehipassiko opanayiko paccattaɱ veditabbo viññūhī' ti.|| ||

Saŋaghe aveccappasādena samannāgato:|| ||

'Supaṭipanno Bhagavato sāvakasaŋgho, ujupaṭipanno Bhagavato sāvakasaŋgho, ñāyapaṭipanno Bhagavato sāvakasaŋgho, sāmīcipaṭipanno Bhagavato sāvakasaŋgho, yad idaɱ cattāri purisayugāni aṭṭhapurisapuggalā esaBhagavato sāvakasaŋgho āhuneyyo pāhuneyyo dakkhiṇeyyo añjalikaraṇīyo anuttaraɱ puññakkettaɱ lokassā' ti.|| ||

Yaɱ kho pana kiñci kule deyyadhammaɱ sabbaɱ taɱ appaṭivibhattaɱ sīlavantehi kalyāṇadhammehī" ti.|| ||

"Lābhā te Godhe,||
suladdhaɱ te Godhe,||
sotāpattiphalaɱ tayā Godhe,||
vyākatanti.

 


Contact:
E-mail
Copyright Statement   Webmaster's Page