Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
V. MahāVagga
55. Sotapatti Saŋyuttaa
V: Sagātha-Puññā-Bhisanda Vaggo

Sutta 42

Dutiya Abhisanda or Sahaka or Asaŋkheyya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts]Evam me sutaɱ:|| ||

Ekaɱ samayam Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Cattāro me bhikkhave, puññābhisandā||
kusalābhisandā||
sukhass'āhārā.|| ||

Katame cattāro?|| ||

Idha bhikkhave, ariyasāvako buddhe avecca pasādena samannāgato hoti:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.

Ayaɱ paṭhamo puññābhisando kusalābhisando sukhassāhāro.|| ||

Dhamme avecca pasādena samannāgato hoti:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Ayaɱ dutiyo puññābhisando kusalābhisando sukhassāhāro.|| ||

Saŋghe avecca pasādena samannāgato hoti:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Ayaɱ tatiyo puññābhisando kusalābhisando sukhassāhāro.|| ||

Puna ca paraɱ bhikkhave, ariyasāvako vigatamala-maccerena cetasā agāraɱ ajjhāvasati.|| ||

Muttacāgo payatapāṇī||
vossaggarato||
yācayogo||
dānasaŋvibhāgarato.|| ||

Ayaɱ catuttho puññābhisando kusalābhisando sukhassāhāro.|| ||

Ime kho bhikkhave, cattāro puññābhisandā||
kusalābhisandā||
sukhass'āhārā.|| ||

Imehi kho bhikkhave, catūhi puññābhisandehi||
kusalābhisandehi||
samannāgatassa||
ariyasāvakassa na sukaraɱ||
puññassa||
pamāṇaɱ gaṇetuɱ.|| ||

'Ettako puññābhisando||
kusalābhisando||
sukhass'āhāro' ti.|| ||

Atha kho 'asaŋkheyyo||
appameyyo||
mahāpuññakkhandho'||
tv'eva saŋkhaɱ gacchati.|| ||

Seyyathā pi, bhikkhave, yatthimā mahānadiyo saŋsandanti, samenti.|| ||

Seyyathīdaɱ:||
Gaŋgā||
Yamunā||
Aciravatī||
Sarabhū||
Mahī.|| ||

Tattha na sukaraɱ udakassa pamāṇaɱ gaṇetuɱ, || ||

'ettakāni udakāḷhakānī' ti vā||
'ettakāni udakāḷhaka satānī' ti vā||
'ettakāni udakāḷhakasahassānī' ti vā.|| ||

Atha kho 'asaŋkheyyo||
appameyyo||
mahāudakakkhandho'||
tv'eva saŋkhaɱ gacchati.|| ||

Evam eva kho bhikkhave, imehi catūhi puññābhisandehi||
kusalābhisandehi||
samannāgatassa||
ariyasāvakassa na sukaraɱ puññassa pamāṇaɱ gaṇetuɱ,||
'ettako puññābhisando||
kusalābhisando||
sukhassāhāro' ti.|| ||

Atha kho asaŋkheyyo||
appameyyo||
mahāpuññakkhandho||
tv'eva saŋkhaɱ gacchatī'" ti.|| ||

Idam avoca Bhagavā||
idaɱ vatvā sugato athāparaɱ||
etad avoca satthā:|| ||

Mahodadhiɱ aparimitaɱ mahāsaraɱ,||
Bahubheravaɱ ratanagaṇānam ālayaɱ||
Najjo yathā naragaṇasaŋghasevitā,||
Puthū savantī upayanti sāgaraɱ.|| ||

Evaɱ naraɱ annadapānavatthadaɱ||
Seyyānisajjattharaṇassa dāyakaɱ,||
Puññassa dhārā upayanti paṇaḍitaɱ||
Najjo yathā vārivahāva sāgaran" ti.|| ||

 


Contact:
E-mail
Copyright Statement   Webmaster's Page